Air India : ఎయిరిండియాలో వరుస సమస్యలు.. 8 విమాన సర్వీసులు రద్దు

Air India: అహ్మదాబాద్‌లో ఇటీవల జరిగిన ఘోర విమాన ప్రమాదం తర్వాత దేశీయ ఎయిర్‌లైన్‌ సంస్థ ఎయిరిండియా నిరంతరం వార్తల్లో నిలుస్తోంది. ఆ దుర్ఘటన మరవక ముందే, సంస్థకు చెందిన విమానాల్లో వరుస సాంకేతిక లోపాలు వెలుగులోకి రావడం ప్రయాణికులను ఆందోళనకు గురిచేస్తోంది. ఎయిరిండియాలో నిర్వహణ వ్యవస్థ లోపించిందని విమర్శలు వెల్లువెత్తుతున్నాయి. దీని ప్రభావంగా విమానాల ఆలస్యాలు, రద్దులు సాధారణమైపోతున్నాయి. తాజాగా శుక్రవారం (జూన్ 20) ఎయిరిండియా ఎనిమిది విమాన సర్వీసులను రద్దు చేసినట్లు అధికారికంగా ప్రకటించింది. ఈ రద్దులకు మెయింటెనెన్స్‌ సంబంధిత సమస్యలు, కార్యకలాపాల్లో ఏర్పడిన అవాంతరాలే ప్రధాన కారణమని వెల్లడించింది. విమానాల్లో భద్రతా ప్రమాణాలను మెరుగుపరచే పనిలో భాగంగా, నిరంతర తనిఖీలను నిర్వహించాల్సి వస్తోంది.

Read Also: Technical Problem : మరో విమానంలో సాంకేతిక సమస్య..ఈసారి ఎక్కడ..? ఏ విమానానికి అంటే..!!

మరోవైపు, అంతర్జాతీయ రూట్లలోనూ ఎయిరిండియా సేవలను తాత్కాలికంగా తగ్గించనున్నట్లు తెలిపింది. జూన్ 21 నుంచి జులై 15 వరకు 15 శాతం అంతర్జాతీయ విమాన సర్వీసులను తగ్గించనున్నట్లు ప్రకటించింది. ఈ చర్యల వల్ల ఉత్తర అమెరికా, ఐరోపా, ఆస్ట్రేలియాలోని ప్రధాన నగరాలకు వెళ్లే ప్రయాణికులు తీవ్రంగా ప్రభావితమయ్యే అవకాశం ఉంది. ఈ సమయంలో 16 అంతర్జాతీయ రూట్లలో సర్వీసులను తాత్కాలికంగా నిలిపివేస్తున్నట్లు కంపెనీ స్పష్టం చేసింది. ముఖ్యంగా ఢిల్లీ-నైరోబి, అమృత్‌సర్-లండన్, గోవా-లండన్ వంటి ప్రాముఖ్యత కలిగిన మార్గాల్లో వచ్చే నెల 15 (జులై 15) వరకు విమానాలు నడిచే అవకాశం ఉండదు. ఈ మార్గాల్లో పెద్ద ఎత్తున ప్రయాణికుల రద్దీ ఉండే పరిస్థితిలో సంస్థ తీసుకున్న నిర్ణయం విమర్శలకు దారితీస్తోంది.

ఇరాన్ గగనతలంలో ఉద్భవించిన భద్రతా పరిస్థితుల నేపథ్యంలో కొన్ని మార్గాల్లో విమాన మార్గాలను మళ్లించడం అవసరమైందని సంస్థ పేర్కొంది. దీనికితోడు, సంస్థకు చెందిన భారీ బోయింగ్ 777 విమానాల్లో మెరుగైన తనిఖీలను చేపట్టే ఉద్దేశంతో ఈ నిర్ణయం తీసుకున్నట్లు ఎయిరిండియా స్పష్టం చేసింది. ప్రయాణికులకు ఈ మార్పుల వల్ల కలిగే అసౌకర్యానికి సంస్థ క్షమాపణలు తెలిపింది. విమానాలు రద్దయిన ప్రయాణికులకు పూర్తి రీఫండ్ లేదా ప్రత్యామ్నాయ బుకింగ్‌ అవకాశం కల్పిస్తామని సంస్థ హామీ ఇచ్చింది. ఈ పరిస్థితులు ఎయిరిండియా నిర్వహణ సామర్థ్యం మీద తీవ్ర ప్రశ్నలు తెస్తున్నాయి. ప్రైవేటీకరణ అనంతరం సంస్థ సేవల్లో మెరుగుదల కనిపించాల్సిన సమయంలో, సాంకేతిక లోపాలు, నిర్వహణ లోపాలతో ప్రయాణికుల నమ్మకాన్ని కోల్పోతున్నట్లు విమర్శలు వెల్లువెత్తుతున్నాయి. ఇకపోతే సంస్థ భవిష్యత్తులో ఎలాంటి దిద్దుబాట్లు తీసుకుంటుందో వేచి చూడాల్సిందే.

రద్దయిన విమాన సర్వీసులు ఇవే..

.దుబాయ్‌ నుంచి చెన్నై రావాల్సిన ఏఐ906
.ఢిల్లీ నుంచి మెల్‌బోర్న్‌ వెళ్లాల్సిన ఏఐ308
.మెల్‌బోర్న్‌ నుంచి ఢిల్లీ రావాల్సిన ఏఐ309
.దుబాయ్‌ నుంచి హైదరాబాద్‌ రావాల్సిన ఏఐ2204
.పుణె నుంచి ఢిల్లీ వెళ్లాల్సిన ఏఐ874
.అహ్మదాబాద్‌ నుంచి ఢిల్లీ వెళ్లాల్సిన ఏఐ456
.హైదరాబాద్‌ నుంచి ముంబయి వెళ్లాల్సిన ఏఐ2872
.చెన్నై నుంచి ముంబయి వెళ్లాల్సిన ఏఐ571

Read Also: Iran-Israel : పశ్చిమాసియాలో రణరంగం.. మొదటిసారి క్లస్టర్‌ బాంబులను వాడిన ఇరాన్‌