No Fuel : ఢిల్లీలో నేటి నుంచి ఆ వాహనాలకు పెట్రోల్, డీజిల్ బంద్‌.. ఎందుకంటే?
దీని ప్రకారం, 10 సంవత్సరాల కంటే పాత డీజిల్ వాహనాలు మరియు 15 సంవత్సరాల కంటే పాత పెట్రోల్ వాహనాలకు ఇకపై ఢిల్లీలోని పెట్రోల్ బంకుల్లో ఇంధనం నింపడం కుదరదు. చాలా ముందుగానే దీని గురించి ప్రభుత్వం హెచ్చరించింది. ఇప్పుడు, ఈ నిబంధనను అమలుచేయడానికి ఢిల్లీ ట్రాన్స్‌పోర్ట్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ (DTIDC) ప్రముఖ పాత్ర పోషిస్తోంది.
- By Latha Suma Published Date - 10:48 AM, Tue - 1 July 25
No Fuel : వాతావరణ కాలుష్యాన్ని నియంత్రించేందుకు ఢిల్లీ ప్రభుత్వం కీలక చర్యలను అమలు చేస్తోంది. తాజాగా, జీవితకాలం ముగిసిన వాహనాలకు ఆయిల్‌ పంపుల వద్ద ఇంధనం (పెట్రోల్, డీజిల్) నింపకుండా నిషేధం విధిస్తూ తీసుకున్న నిర్ణయం మంగళవారం నుంచి అమల్లోకి వచ్చింది. దీని ప్రకారం, 10 సంవత్సరాల కంటే పాత డీజిల్ వాహనాలు మరియు 15 సంవత్సరాల కంటే పాత పెట్రోల్ వాహనాలకు ఇకపై ఢిల్లీలోని పెట్రోల్ బంకుల్లో ఇంధనం నింపడం కుదరదు. చాలా ముందుగానే దీని గురించి ప్రభుత్వం హెచ్చరించింది. ఇప్పుడు, ఈ నిబంధనను అమలుచేయడానికి ఢిల్లీ ట్రాన్స్‌పోర్ట్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ (DTIDC) ప్రముఖ పాత్ర పోషిస్తోంది. దేశ రాజధానిలోని 500 పెట్రోల్ బంకుల్లో ఆటోమేటెడ్ నంబర్ ప్లేట్ రికగ్నిషన్ (ANPR) కెమెరా సిస్టమ్‌లను ఏర్పాటు చేసింది. ఈ సాంకేతిక పరిజ్ఞానం ద్వారా వాహనాల నంబర్ ప్లేట్లు స్కాన్ చేయడం ద్వారా వాటి వయస్సును గుర్తించడమో, వాటికి ఇంధన పంపిణీ అర్హత ఉందో లేదో నిర్ధారించవచ్చు.
Read Also: Weather Updates : తెలుగు రాష్ట్రాల్లో మరో మూడు రోజులు వర్షాలు
ఇక, వాహనాల తనిఖీకి ప్రత్యేకంగా 100 బృందాలను ఢిల్లీ రవాణా శాఖ నియమించింది. వీటి సహాయంతో నిబంధనలు ఉల్లంఘించే వాహనదారులపై చర్యలు తీసుకుంటారు. ఇలా చేసి వాతావరణాన్ని కలుషితం చేసే వాహనాల రాకపై పట్టు సాధించాలనే ప్రభుత్వ ఉద్దేశ్యం. ఈ చర్యలు కేవలం ఢిల్లీలోనే కాకుండా, దీన్ని దశలవారీగా ఎన్సీఆర్ (నేషనల్ క్యాపిటల్ రీజియన్) ప్రాంతాలకూ విస్తరించనున్నారు. ఈ ఏడాది నవంబర్ 1 నుంచి గురుగ్రామ్, ఫరీదాబాద్, ఘజియాబాద్, గౌతమ్ బుద్ధ నగర్, సోనిపట్‌లలో కూడా ఈ నిబంధనలు అమలవుతాయి. 2026 ఏప్రిల్ 1 నుంచి మిగతా NCR ప్రాంతాల్లోనూ ఈ నిబంధనలు అమలులోకి వస్తాయి. గమనించదగ్గ విషయం ఏమిటంటే, ఢిల్లీ-ఎన్సీఆర్ ప్రాంతంలో జీవితకాలం ముగిసిన వాహనాలు భారీ సంఖ్యలో ఉన్నాయి. ఢిల్లీలో మాత్రమే 62 లక్షల ద్విచక్ర వాహనాలు, 41 లక్షల నాలుగుచక్ర వాహనాలు జీవితకాలం దాటిపోయాయి.
అలాగే, హర్యానాలో 27.5 లక్షలు, ఉత్తరప్రదేశ్‌లో 12.4 లక్షలు, రాజస్థాన్‌లో 6.1 లక్షల వాహనాలు ఇక ప్రయాణానికి అనర్హమైనవిగా గుర్తించబడ్డాయి. ఇంతమంది వాహనదారులపై ప్రభావం చూపే ఈ నిర్ణయం వెనుక, 2018లో సుప్రీంకోర్టు ఇచ్చిన తీర్పు ఉంది. అప్పట్లోనే 10 సంవత్సరాల కంటే పాత డీజిల్ వాహనాలు, 15 సంవత్సరాల కంటే పాత పెట్రోల్ వాహనాలు ఢిల్లీలో నిషేధించాలనే తీర్పు ఇచ్చింది. ఇప్పుడు ఆ తీర్పు ప్రకారం చర్యలు మరింత కఠినంగా అమలవుతున్నాయి. ఈ చర్యల వల్ల ఒకవైపు వాతావరణ కాలుష్యం తగ్గుతుందనేది ప్రభుత్వ నమ్మకం. మరోవైపు, పౌరులు తమ వాహనాల స్థితిని పరిశీలించి కొత్త వాహనాలవైపు మొగ్గు చూపాల్సిన అవసరం ఏర్పడుతోంది. ఇది కాలుష్యాన్ని తగ్గించడంలో గణనీయమైన ముందడుగు అనే అభిప్రాయం పర్యావరణ నిపుణుల్లో వ్యక్తమవుతోంది.
Read Also: Elon Musk : ఆ బిల్లును ఆమోదిస్తే.. రేపే కొత్త పార్టీ .. ట్రంప్‌కు ఎలాన్ మస్క్ షాక్
