Singareni : చరిత్రలో ఫస్ట్ టైం సింగరేణి సంస్థకు గోల్డెన్ చాన్స్ లభించింది

బొగ్గు తవ్వకాలతోనే గుర్తింపు పొందిన సింగరేణి (Singareni ) కాలరీస్ కంపెనీ లిమిటెడ్ (SCCL) ఇప్పుడు సరికొత్త అధ్యాయాన్ని ప్రారంభించింది. ఇన్నాళ్లుగా ‘నల్ల బంగారం’ (బొగ్గు) వెలికితీతకే పరిమితమైన సింగరేణి, తొలిసారిగా బంగారం, రాగి గనుల అన్వేషణ లైసెన్స్‌ను దక్కించుకుంది. కర్ణాటకలోని దేవదుర్గ్‌లో బంగారం, రాగి నిక్షేపాల కోసం కేంద్ర గనుల మంత్రిత్వ శాఖ నిర్వహించిన ఆన్‌లైన్ వేలంలో సింగరేణి 37.75 శాతం రాయల్టీని కోట్ చేసి L-1 బిడ్డర్‌గా నిలిచింది. ఈ విజయం సింగరేణి చరిత్రలో ఒక చారిత్రక మైలురాయి అని SCCL చైర్మన్, మేనేజింగ్ డైరెక్టర్ ఎన్ బలరామ్ తెలిపారు. రాష్ట్ర ప్రభుత్వ ఆదేశాల మేరకు సింగరేణి తన కార్యకలాపాలను విస్తరించడంలో ఇది తొలి విజయం అని ఆయన పేర్కొన్నారు.

CM Revanth Bhadrachalam Tour : సీఎం రేవంత్ రెడ్డి భద్రాద్రి పర్యటన వాయిదా

సింగరేణి అన్వేషణ విభాగం త్వరలో దేవదుర్గ్‌లో క్షేత్రస్థాయి పరిశోధనలు ప్రారంభించనుంది. ఈ అన్వేషణ ఐదేళ్లలో పూర్తవుతుంది, ఇందులో బంగారం, రాగి నిక్షేపాలు ఏ స్థాయిలో ఉన్నాయో తెలుసుకుంటారు. ఆ తర్వాత తుది నివేదికను కేంద్ర ప్రభుత్వానికి అందజేస్తారు. ఈ అన్వేషణకు అయ్యే మొత్తం ఖర్చు సుమారు రూ. 90 కోట్లు కాగా, ఇందులో రూ. 20 కోట్లు కేంద్ర ప్రభుత్వం సబ్సిడీగా అందిస్తుంది. అన్వేషణ పూర్తైన తర్వాత, వాణిజ్యపరమైన తవ్వకాల కోసం కేంద్రం మళ్లీ వేలం నిర్వహిస్తుంది. ఆ వేలంలో మైనింగ్ హక్కులు పొందిన కంపెనీ కర్ణాటక ప్రభుత్వానికి చెల్లించే రాయల్టీలో 37.75 శాతం సింగరేణికి గని జీవితకాలం పాటు లభిస్తుంది.

సింగరేణికి లభించిన ఈ అద్భుతమైన అవకాశంపై ముఖ్యమంత్రి రేవంత్ రెడ్డి, ఉపముఖ్యమంత్రి భట్టి విక్రమార్క హర్షం వ్యక్తం చేశారు. బొగ్గు మైనింగ్‌లో 136 సంవత్సరాల అనుభవం ఉన్న సింగరేణి, కీలకమైన ఖనిజాల అన్వేషణలో కూడా ప్రముఖ కంపెనీగా ఎదుగుతుందని వారు ఆశాభావం వ్యక్తం చేశారు. భవిష్యత్తులో SCCL ఒక అంతర్జాతీయ కంపెనీగా ఎదగడానికి ఇది ఒక గొప్ప అవకాశం అని వారు పేర్కొన్నారు. తెలంగాణ ప్రభుత్వ సహకారంతో సింగరేణి మరిన్ని రంగాల్లో విజయాలు సాధించగలదని వారు ధీమా వ్యక్తం చేశారు.