భారత్‌ వద్ద ఎంత బంగారం ఉందో తెలుసా?

Gold Reserves  భారత్ సహా ప్రపంచ దేశాల్లో ప్రస్తుతం బంగారానికి అత్యంత డిమాండ్ ఉందన్న సంగతి తెలిసిందే. ఇది ఆర్థిక స్థిరత్వాన్ని పెంపొందిస్తుంది. డాలరుపై ఆధారపడటాన్ని తగ్గిస్తుంది. ఆపదలో ఆదుకుంటుంది. అందుకే భారత్, చైనా సహా పలు ప్రపంచ దేశాలు బంగారం నిల్వల్ని విపరీతంగా పెంచుకుంటున్నాయి. చైనా కేంద్ర బ్యాంకు వరుసగా 15వ నెలా బంగారాన్ని కొనుగోలు చేసింది. మరి ఇప్పుడు ఏ దేశంలో ఎన్ని టన్నుల పసిడి ఉందో తెలుసుకుందాం.

• వరుసగా 15వ నెలా బంగారాన్ని కొనుగోలు చేసిన చైనా సెంట్రల్ బ్యాంక్
• మొత్తం 2306 టన్నుల పసిడి నిల్వలతో ప్రపంచంలో ఆరో స్థానం
• ఆర్బీఐ దగ్గర 880 టన్నుల గోల్డ్ రిజర్వ్స్

అత్యంత విలువైన లోహాల్లో బంగారం ఒకటి. దీనికి ఎక్కడ చూసినా విపరీతమైన డిమాండ్ ఉంటుంది. బంగారాన్ని అత్యంత వినియోగించే దేశాల్లో చైనా, భారత్ వంటివి ముందు వరుసలో ఉంటాయి. ఇవి ఎక్కువగా బంగారాన్ని దిగుమతి చేసుకుంటాయన్న సంగతి తెలిసిందే. ఇంకా ఎక్కువ బంగారం నిల్వలు ఉన్న దేశాల్లో అమెరికా అగ్రస్థానంలో ఉంది. బంగారం అనేది ఎప్పుడూ సురక్షిత పెట్టుబడి సాధనంగా ఉంటుంది. ఆపద సమయంలో.. ఆర్థిక అనిశ్చితి సమయంలో.. దేశ ఆర్థిక వ్యవస్థకు ఇది అత్యంత కీలకం. ఆర్థిక వ్యవస్థను స్థిరంగా ఉంచడంలో.. ద్రవ్యోల్బణం నుంచి రక్షించేందుకు.. ఇంకా అమెరికా డాలరుపై ఆధారపడటాన్ని తగ్గించేందుకు కూడా రక్షణగా బంగారం నిల్వలు ఉపయోగపడతాయి. ఈ కారణంతోనే ప్రపంచ దేశాలు ఎప్పటికప్పుడు తమ విదేశీ మారకపు పోర్ట్‌ఫోలియోలో భాగంగా భారీగా బంగారాన్ని చేర్చుకుంటున్నాయి. ఈ క్రమంలోనే పసిడి ధరలు కూడా భారీ స్థాయిలో పెరుగుతున్నాయి.

ఇప్పుడు జనవరి నాటికి ప్రపంచ దేశాల్లో.. ఏ దేశంలో బంగారం నిల్వలు ఏ స్థాయిలో ఉన్నాయో తెలుసుకుందాం. ఇది ప్రజల దగ్గర ఉన్న బంగారాన్ని సూచించదు. కేవలం ఆయా దేశాల కేంద్ర బ్యాంకుల దగ్గర ఉన్న నిల్వల్ని సూచిస్తుందని తెలుసుకోవాలి. ఇక చైనా సెంట్రల్ బ్యాంకు వరుసగా 15వ నెల కూడా పసిడిని కొనుగోలు చేసి నిల్వల్ని పెంచుకుంది. పీపుల్స్ బ్యాంక్ ఆఫ్ చైనా (PBOC) రిపోర్ట్ ప్రకారం.. జనవరిలో కూడా చైనా గోల్డ్ రిజర్వ్స్ పెరిగాయి. అక్కడ 71.15 మిలియన్ ఫైన్ ట్రాయ్ ఔన్సుల నుంచి 74.19 మిలియన్ ఫైన్ ట్రాయ్ ఔన్సులకు పెంచుకుంది. ఇక్కడ చూస్తే దాదాపు దీని విలువ 369.58 బిలియన్ డాలర్ల వరకు ఉంటుందని PBOC పేర్కొంది. ఇది భారత కరెన్సీలో చూస్తే సుమారు రూ. 33 లక్షల కోట్లుగా ఉంటుంది.

చైనా బంగారం నిల్వలు టన్నుల్లో చూస్తే గనుక 2306 టన్నులుగా ఉంది. నెలలో సుమారు 2 టన్నులకుపైగా కొనుగోలు చేసింది. అంటే 2 వేల కిలోల బంగారం కొన్నదన్నమాట. టన్ను అంటే 1000 కిలోలు అన్న సంగతి తెలిసిందే. అంటే మొత్తంగా చైనా దగ్గర 23 లక్షల కిలోలకుపైగా బంగారం నిల్వలు ఉన్నాయి. భారత్ కూడా కొంత కాలంగా బంగారం నిల్వల్ని భారీగా పెంచుకున్న సంగతి తెలిసిందే. ప్రస్తుతం రిజర్వ్ బ్యాంక్ ఆఫ్ ఇండియా (RBI) దగ్గర 880.18 టన్నుల బంగారం నిల్వలు ఉన్నాయి. అంటే 8,80,180 కిలోల పసిడి ఉంది. ప్రస్తుతం బంగారం ధర గ్రాముకు రూ. 15,960 గా ఉండగా.. కిలోకు రూ. 1,59,60,000 గా ఉంటుంది. ఈ లెక్కన ఈ పసిడి నిల్వల విలువ రూ. 14 లక్షల కోట్లకుపైనే ఉంటుంది.

ప్రపంచవ్యాప్తంగా చూస్తే అమెరికాలో బంగారం నిల్వలు అన్నింటికంటే ఎక్కువగా ఉన్నాయి. ఇక్కడ 8133 టన్నుల బంగారం ఉంది. టాప్-10 లిస్ట్ ఇప్పుడు చూద్దాం.

1. అమెరికా – 8133 టన్నులు
2. జర్మనీ – 3350 టన్నులు
3. ఇటలీ – 2452 టన్నులు
4. ఫ్రాన్స్ – 2437 టన్నులు
5. రష్యా – 2,327 టన్నులు
6. చైనా – 2,306 టన్నులు
7. స్విట్జర్లాండ్ – 1040 టన్నులు
8. ఇండియా – 880 టన్నులు
9. జపాన్ – 846 టన్నులు
10. టర్కీ – 614 టన్నులు