10 Children Died: పండ‌గ‌పూట విషాదం.. 10 మంది చిన్నారులు సజీవదహనం!
NICU వార్డు కిటికీ పగలగొట్టి 37 మంది పిల్లలను సురక్షితంగా బయటకు తీయగా, 10 మంది పిల్లలు మరణించారు.
- By Gopichand Published Date - 01:20 AM, Sat - 16 November 24
10 Children Died: ఉత్తర ప్రదేశ్‌లో తీవ్ర విషాదం చోటుచేసుకుంది. ఝాన్సీలోని మహారాణి లక్ష్మీబాయ్‌ మెడికల్ కళాశాల (Jhansi Medical College) ఆసుపత్రిలోని నియోనాటల్ వార్డులో భారీ అగ్నిప్రమాదం సంభ‌వించి పది మంది చిన్నారులు స‌జీవ ద‌హ‌నం (10 Children Died) అయ్యారు. ఝాన్సీలోని మహారాణి లక్ష్మీబాయి మెడికల్ కాలేజీలో శుక్రవారం అర్థరాత్రి ఘోర ప్రమాదం జరిగింది. ఆసుపత్రిలోని శిశు వార్డు (ఎన్‌ఐసియు-నియోనాటల్ ఇంటెన్సివ్ కేర్ యూనిట్)లో షార్ట్ సర్క్యూట్ కారణంగా మంటలు చెలరేగాయి.
NICU వార్డు కిటికీ పగలగొట్టి 37 మంది పిల్లలను సురక్షితంగా బయటకు తీయగా, 10 మంది పిల్లలు మరణించారు. అగ్నిప్రమాదం తర్వాత మెడికల్ కాలేజీలో తొక్కిసలాటలాంటి పరిస్థితి నెలకొంది. జిల్లా మేజిస్ట్రేట్, సీనియర్ సూపరింటెండెంట్ ఆఫ్ పోలీస్, డిఐజి, అగ్నిమాపక దళ బృందాలతో సహా పోలీసు, పరిపాలన అధికారులు సంఘటనా స్థలంలో ఉన్నారు.
ఝాన్సీ మెడికల్ కాలేజీలో జరిగిన అగ్నిప్రమాద ఘటనపై ముఖ్యమంత్రి యోగి ఆదిత్యనాథ్ స్పందించి, మృతుల కుటుంబాలకు సంతాపం తెలిపారు. సహాయక చర్యలను వేగవంతం చేయాలని, క్షతగాత్రులకు సరైన చికిత్స అందించాలని, వారు త్వరగా కోలుకోవాలని సీఎం అధికారులను, అగ్నిమాపక సిబ్బందిని ఆదేశించారు. యూపీ డిప్యూటీ సీఎం, ఆరోగ్య మంత్రి ఝాన్సీకి బయల్దేరారు. ఆయన వెంట ఆరోగ్య శాఖ కార్యదర్శి కూడా ఉన్నారు.
ప్రమాదం గురించి సమాచారం అందిన వెంటనే అగ్నిమాపక సిబ్బంది ఘటనా స్థలానికి చేరుకున్నారు. సైన్యాన్ని కూడా పిలిచారు. ఆర్మీ, అగ్నిమాపక దళ వాహనాలు మంటలను ఆర్పే పనిలో నిమగ్నమై ఉన్నాయి. పది మంది నవజాత శిశువులు మృతి చెందడంతో ఆస్పత్రి ఆవరణలో గందరగోళం నెలకొంది. నవజాత శిశువుల తల్లిదండ్రులు కూడా తమ నవజాత శిశువులను రక్షించాలని వేడుకుంటున్నారు.
ఘటనపై విచారణ నివేదికను 12 గంటల్లోగా సమర్పించాలని సీఎం యోగి కోరారు. ప్రమాదంపై కమిషనర్‌, డీఐజీ విచారణ చేపట్టారు. విచారణకు కమిటీని ఏర్పాటు చేశారు. మంటల కారణంగా 10 మంది పిల్లలు చనిపోగా, కొంత‌మంది పిల్లలకు చికిత్స కొనసాగుతోంది. ప్రత్యక్ష సాక్షుల ప్రకారం.. రాత్రి పదకొండు గంటల ప్రాంతంలో SNCU వార్డు నుండి పొగలు రావడం కనిపించిన‌ట్లు చెబుతున్నారు. దీంతో అక్కడున్న ప్రజలు భ‌యాందోళ‌న‌కు గుర‌య్యారు. ఎవరికీ ఏమీ అర్థం కాకముందే మంటలు ఎగసిపడ్డాయి. కొద్దిసేపటికే వార్డులో మంటలు వ్యాపించాయి. దీంతో అక్కడ తొక్కిసలాట జరిగింది.
Jhansi, Uttar Pradesh.
A fire broke out at a medical college, leading to the tragic death of around 10 newborns. Parents were seen running with their infants in their arms, desperate to save them.#JhansiMedicalCollege pic.twitter.com/BzPJe0JiZG
— هارون خان (@iamharunkhan) November 15, 2024
