Vomiting Tips: ప్రయాణ సమయంలో వాంతులు అవుతున్నాయా? మీ కోసం చిట్కాలు

Motion Sickness

ప్రయాణంలో వికారం, వాంతులు లేదా తల తిరుగుతున్నట్లు అనిపించడాన్ని మోషన్ సిక్‌నెస్ అంటారు. ఇది తీవ్రమైన అనారోగ్యం కాదు, కానీ ఇది ప్రయాణ ఆనందాన్ని పూర్తిగా నాశనం చేస్తుంది. పర్వత ప్రాంతాలలో ప్రయాణించేటప్పుడు, ఘాట్ రోడ్లలో ప్రయాణించేటప్పుడు ఈ సమస్య చాలా సాధారణం. చాలా కాలం తర్వాత ప్రయాణించే వారి నుండి సాధారణ ప్రయాణికుల వరకు ఎవరినైనా ఈ సమస్య ప్రభావితం చేస్తుంది. అసలు ఈ సమస్య ఏంటి, ఎలా తగ్గించుకోవాలో ఇప్పుడు తెలుసుకుందాం.

కారు, బస్సు లేదా ఏదైనా వాహనంలో ప్రయాణించేటప్పుడు వికారం కారణంగా చాలా మందికి వాంతులు అవుతుంటాయి. ఇలా ఎందుకు అవుతాయో వాళ్లకి స్పష్టత ఉండదు. వైద్యపరంగా దీనిని మోషన్ సిక్‌నెస్ అంటారు. పిల్లల నుంచి పెద్దల వరకు ఎవరైనా సరే ఈ సమస్యను అనుభవించవచ్చు. ఘాట్ రోడ్లు, దూర ప్రయాణాలు, మూసివున్న వాహనంలో ప్రయాణం చేసేటప్పుడు ఈ సమస్య చాలా తీవ్రంగా ఉంటుంది.

చాలా మంది ఇది బలహీనత లేదా కడుపు నొప్పి కారణంగా వస్తుందని నమ్ముతారు. దీంతో చాలా మంది ప్రయాణం చేయడానికి ఆసక్తి చూపించరు. అయితే, ఇది వాస్తవానికి మెదడు, కళ్ళు, శరీర సమతుల్య వ్యవస్థకు నేరుగా సంబంధించింది. అసలు ట్రావెల్ సిక్‌నెస్ అంటే ఏంటి, దానికి కారణాలు, ఎలా నివారించాలో డాక్టర్ రిద్ది పటేల్ (షల్బీ హాస్పిటల్, అహ్మదాబాద్) చెప్పారు. ఆ పూర్తి వివరాలు ఇప్పుడు తెలుసుకుందాం.

ప్రయాణ సమయంలో ఇలా ఎందుకు జరుగుతుంది?

నిపుణుల ప్రకారం మెదడుకు సంకేతాలు తప్పుగా వెళ్ళినప్పుడు ట్రావెల్ సిక్‌నెస్ వస్తుంది. మన కళ్ళు, లోపలి చెవి, శరీర కండరాలు కలిసి శరీర సమతుల్యతను నియంత్రించడానికి పనిచేస్తాయి. మనం ఏ దిశలో, ఎంత వేగంగా కదులుతున్నామో కళ్ళు మెదడుకు తెలియజేస్తాయి. లోపలి చెవిలోని వెస్టిబ్యులర్ వ్యవస్థ శరీరం కదులుతోందా లేదా స్థిరంగా ఉందా అని గ్రహిస్తుంది.

మీరు కారులో కూర్చున్నప్పుడు శరీరం, చెవులు కదలికను గ్రహిస్తాయి, కానీ మీరు మీ ఫోన్‌ను చూస్తున్నప్పుడు లేదా కళ్ళు మూసుకుని ఉంటే కళ్ళు మీరు స్థిరంగా ఉన్నారని మెదడుకు సంకేతాలు ఇస్తాయి. ఈ విరుద్ధమైన సమాచారం మెదడును గందరగోళానికి గురిచేస్తుంది. ఫలితంగా వికారం, తలతిరగడం, వాంతులు వస్తాయి.

మోషన్ సిక్‌నెస్ లక్షణాలు ఏమిటి?

1. నిరంతర వాంతులు లేదా వికారం
2. తల తిరగడం
3. తల బరువుగా అనిపించడం
4. బద్ధకం, అలసిపోయినట్లు అనిపించడం
5. కడుపు నొప్పి, అజీర్ణం
6. చిరాకుగా లేదా అసౌకర్యంగా అనిపించడం
7. కొంతమందికి, ఈ సమస్య స్వల్పంగా ఉంటుంది
8. మరికొందరికి ప్రయాణానికి ముందే వాంతులు అవుతాయన్న భయం నెలకొంటుంది.

ఎలా నివారించాలి?

ట్రావెల్ సిక్నెస్ను పూర్తిగా నివారించడం చాలా కష్టం. కానీ కొన్ని చర్యలు తీసుకోవడం ద్వారా దీనిని చాలా వరకు నియంత్రించవచ్చు. ప్రయాణించేటప్పుడు ముందుకు చూస్తూ సుదూర వస్తువులపై దృష్టి పెట్టడానికి ప్రయత్నించండి. ఇది కంటి, శరీర సంకేతాల మధ్య సమన్వయాన్ని నిర్వహించడానికి సహాయపడుతుంది.

మొబైల్ ఫోన్, పుస్తకం లేదా ల్యాప్‌టాప్ చూడటం మానుకోండి. ఎందుకంటే ఇది కళ్ళు స్థిర వస్తువులపై దృష్టి పెట్టేలా చేస్తుంది, మెదడుకు తప్పుడు సంకేతాల్ని పంపుతుంది. కారులో ముందు సీటు లేదా బస్సులో మధ్య సీటు వంటి తక్కువ కుదుపులు అనుభవించే సీటును ఎంచుకోండి. అంతేకాకుండా మీకు ఎక్కడ సౌకర్యంగా ఉంటుందో అక్కడే కూర్చోండి.

అల్లం, లవంగాలు ఉపయోగపడతాయి.

ఆహారం కూడా ఇందులో ముఖ్యమైన పాత్ర పోషిస్తుంది. ప్రయాణానికి ముందు భారీగా లేదా వేయించిన ఆహారాన్ని తినడం మానుకోండి. మసాలా ఫుడ్స్, బిర్యానీ, నూనె పదార్థాలు తీసుకోవడం మంచిది కాదు. అంతేకాకుండా ఖాళీ కడుపుతో ప్రయాణించడం కూడా మంచిది కాదు.

పండ్లు లేదా బిస్కెట్లు వంటి తేలికపాటి ఆహారాలు తినడం ఉత్తమం. అల్లం కూడా మోషన్ సిక్నెస్‌కు బాగా ఉపయోగపడుతుంది. అల్లం టీ, అల్లం మిఠాయి లేదా కొద్దిగా పచ్చి అల్లం నమలడం వల్ల వికారం తగ్గుతుంది. లవంగాలను బుగ్గన పెట్టుకోవడం వల్ల కూడా వికారం తగ్గుతుంది. కొందరు ప్రయాణించేటప్పుడు నిమ్మకాయను ముక్కు దగ్గర పెట్టుకుంటారు. ఇది కూడా బాగానే పనిచేస్తుంది.

ఈ టెక్నిక్నిని ట్రై చేయండి

గాఢంగా శ్వాస తీసుకోవడం, విశ్రాంతి తీసుకోవడం కూడా ఉపయోగకరంగా ఉంటుంది. ప్రయాణం సమయంలో కిటికీ తెరిచి బయట స్వచ్ఛమైన గాలి పీల్చుకోండి. ఇది వాంతి అనుభూతిని గణనీయంగా తగ్గిస్తుంది.

సమస్య మరింత తీవ్రంగా ఉంటే వైద్యుడి సలహాతో యాంటీ-మోషన్ సిక్‌నెస్ మందులను తీసుకోవచ్చు. అయితే, పదే పదే వీటి వాడకాన్ని నివారించాలి. సరైన అలవాట్లు, అవగాహన, ముందుగానే ట్రావెలింగ్‌కు ప్రిపేర్ అవ్వడం వల్ల మోషన్ సిక్‌నెస్‌ను చాలా వరకు నియంత్రించవచ్చు.

Follow us