నా అన్వేష్ పై మరోసారి పంజాగుట్ట PSలో కరాటే కళ్యాణి ఫిర్యాదు

Karate Kalyani On Naa Anveshana

Karate Kalyani Complaint  హిందూ దేవతలపై వివాదాస్పద వ్యాఖ్యలు చేసిన యూట్యూబర్ అన్వేష్‌పై నమోదైన కేసును సైబర్ క్రైమ్ విభాగానికి బదిలీ చేసినట్లు పంజాగుట్ట పోలీసులు తెలిపారు. ఈ విషయంలో సినీ నటి, బీజేపీ నాయకురాలు కరాటే కళ్యాణి మరోసారి పంజాగుట్ట పోలీస్ స్టేషన్‌లో ఫిర్యాదు చేశారు. ఇప్పటికే ఐటీ యాక్ట్ 67 సెక్షన్ కింద కేసు నమోదు కాగా, తాజాగా బీఎన్‌ఎస్ 69ఏ సెక్షన్‌ను కూడా ఎఫ్‌ఐఆర్‌లో చేర్చాలని ఆమె కోరారు. అన్వేష్ నిర్వహిస్తున్న ‘నా అన్వేషణ’ యూట్యూబ్ ఛానల్‌ను బ్లాక్ చేయడంతో పాటు, అతని బ్యాంక్ అకౌంట్లను ఫ్రీజ్ చేయాలని ఫిర్యాదులో డిమాండ్ చేశారు.

హిందూ దేవతలపై వివాదాస్పద వ్యాఖ్యలు చేసి తీవ్ర విమర్శలకు గురైన యూట్యూబర్ అన్వేష్‌పై మరోసారి ఫిర్యాదు నమోదైంది. సినీ నటి, బీజేపీ నాయకురాలు కరాటే కళ్యాణి తాజాగా పంజాగుట్ట పోలీస్ స్టేషన్‌ను ఆశ్రయించి అన్వేష్‌పై కఠిన చర్యలు తీసుకోవాలని డిమాండ్ చేశారు. గత నెల 31న హిందూ దేవతలను దూషించిన వ్యాఖ్యలపై ఇప్పటికే ఫిర్యాదు చేయగా పోలీసులు కేసు నమోదు చేశారు. తాజాగా ఆ కేసును సైబర్ క్రైమ్ విభాగానికి బదిలీ చేసినట్లు పంజాగుట్ట పోలీసులు తెలిపారు. ఇదే వ్యవహారంలో ఆదివారం మరోసారి పోలీస్ స్టేషన్‌కు వచ్చిన కరాటే కళ్యాణి, అన్వేష్‌పై అదనపు సెక్షన్లు చేర్చాలని కోరుతూ ఫిర్యాదు అందజేశారు.

కరాటే కళ్యాణి తన ఫిర్యాదులో ప్రస్తుతం ఎఫ్‌ఐఆర్‌లో ఉన్న ఐటీ యాక్ట్ 67 సెక్షన్‌తో పాటు బీఎన్‌ఎస్ 69ఏ సెక్షన్‌ను కూడా చేర్చాలని స్పష్టంగా కోరారు. ఈ సెక్షన్ అమలులోకి వస్తే అన్వేష్ నిర్వహిస్తున్న ‘నా అన్వేషణ’ పేరుతో ఉన్న యూట్యూబ్ ఛానల్‌ను బ్లాక్ చేయవచ్చని ఆమె పేర్కొన్నారు. అంతేకాదు, యూట్యూబ్ ద్వారా వచ్చే ఆదాయం ఏ ఏ బ్యాంక్ ఖాతాల్లోకి వెళ్తుందో గుర్తించి, ఆ అకౌంట్లను ఫ్రీజ్ చేయాలని బీఎన్‌ఎస్ 106 సెక్షన్‌ను కూడా చేర్చాలని విజ్ఞప్తి చేశారు. దీనికి సంబంధించిన పలు డాక్యుమెంట్లను తన న్యాయవాదితో కలిసి పోలీసులకు సమర్పించారు.

ఫిర్యాదు అనంతరం కరాటే కళ్యాణి మీడియాతో మాట్లాడుతూ తీవ్రంగా స్పందించారు. “హిందువులు దేవతగా కొలిచే సీతా దేవి, ద్రౌపదిపై అన్వేష్ జుగుప్సాకరంగా మాట్లాడాడు. దేవుళ్లపై, మతాలపై, కులాలపై చిచ్చు పెడుతున్న అతడు తెలుగు రాష్ట్రాల్లో పుట్టడం దౌర్భాగ్యం. అతన్ని ఎక్కడ ఉన్నా వదలొద్దు… పట్టుకొని కఠినంగా శిక్షించాలి” అంటూ ఫైర్ అయ్యారు. ఇలాంటి వ్యాఖ్యలు చేసే వారిపై ప్రభుత్వం సీరియస్‌గా స్పందించకపోతే సమాజంలో మరింత విషపూరిత వాతావరణం ఏర్పడుతుందని ఆమె హెచ్చరించారు.

స్త్రీల వస్త్రధారణపై టాలీవుడ్‌లో ఇటీవల జరిగిన చర్చల నేపథ్యంలో, అన్వేష్ చేసిన వ్యాఖ్యలపై హిందూ సంఘాలు తీవ్ర ఆగ్రహం వ్యక్తం చేశాయి. ఈ వ్యాఖ్యలపై తెలంగాణ వ్యాప్తంగా పలు ప్రాంతాల్లో హిందూ సంఘాలు నిరసనలు చేపట్టాయి. అన్వేష్ దిష్టిబొమ్మలను దగ్ధం చేస్తూ అతన్ని భారత్‌కు రప్పించి శిక్షించాలని డిమాండ్ చేశారు. నోటికొచ్చినట్టు మాట్లాడే వ్యక్తులను ఉపేక్షించకూడదని సంఘాల నాయకులు హెచ్చరిస్తున్నారు. ఇదిలా ఉండగా, అన్వేష్‌పై ఇప్పటికే పంజాగుట్ట పోలీస్ స్టేషన్‌లో నమోదైన కేసు దర్యాప్తును పోలీసులు ముమ్మరం చేశారు. ఏపీ, తెలంగాణలోని పలు ప్రాంతాల్లోనూ అతడిపై కేసులు నమోదయ్యాయి. కేసును సైబర్ క్రైమ్‌కు బదిలీ చేయడంతో, ఆన్‌లైన్ కంటెంట్, ఆదాయ మార్గాలు, విదేశాల్లో ఎక్కడున్నాడు అనే అంశాలపై కూడా విచారణ జరిపే అవకాశం ఉంది. ఈ కేసుకు సంబంధించిన అన్ని అంశాలను పరిగణలోకి తీసుకొని చట్టపరంగా అవసరమైన చర్యలు తీసుకుంటామని పోలీసులు స్పష్టం చేస్తున్నారు.

Follow us