ఆ వయసు లోనే నాపై లైంగిక దాడి ! బయటపెట్టిన సమీరా..

Sameera Sherief

Sameera Sherief  తెలుగు సీరియల్ నటి సమీరా షెరీఫ్ గురించి ప్రేక్షకులకి పరిచయం అక్కర్లేదు. ఎన్నో హిట్ సీరియల్స్‌లో నటించి తనకంటూ మంచి గుర్తింపు తెచ్చుకుంది సమీరా. నటి సన కుమారుడు అన్వర్‌ని వివాహం చేసుకున్న తర్వాత యాక్టింగ్‌కి సమీరా దూరమైంది. అయితే సోషల్ మీడియా, యూట్యూబ్ ద్వారా మాత్రం ఆడియన్స్‌కి దగ్గరగానే ఉంది. తాజాగా తన యూట్యూబ్ ఛానల్‌లో మాట్లాడుతూ చిన్నప్పుడు తనపై జరిగిన లైంగిక దాడి గురించి సమీరా ప్రస్తావించింది.

• సీరియల్ నటి సమీరా షెరీఫ్ ఇంటర్వ్యూ
• చిన్నప్పుడు జరిగిన లైంగిక దాడి గురించి ప్రస్తావన
• పేరెంట్స్ అవగాహన కల్పించాలంటూ కామెంట్స్

కామంతో కళ్లు మూసుకుపోయినవాడికి చిన్నా పెద్దా, తప్పు ఒప్పు ఇలా తేడాలేం తెలియవు. ముఖ్యంగా పసిపిల్లలపై కూడా లైంగిక దాడి చేస్తూ తమ కోరికలు తీర్చుకుంటున్న దుర్మార్గులు, అలాంటి సంఘటనలు మనం రోజూ చూస్తూనే ఉన్నాం. అయితే ఇలాంటి సంఘటనలు జరిగినప్పుడు నోరుమూసుకొని కూర్చోవడం కాదు గళమెత్తి ప్రశ్నించాలి.. చేసినవాడికి శిక్షపడేలా చూడాలి. ఇప్పుడు పోక్సో సహా ఎన్నో కఠినమైన చట్టాలు అమలు అవుతున్నాయి. అయినా కానీ పిల్లల మీద లైంగిక దాడులు మాత్రం ఆగడం లేదు.

తాజాగా ఈ విషయం గురించి సీరియల్ నటి సమీరా షెరీఫ్ రియాక్ట్ అయింది. తన జీవితంలో జరిగిన అలాంటి ఒక సంఘటన గురించి పంచుకుంటూ వీటిపై పిల్లలకి అవగాహన కల్పించాలంటూ కోరింది. తన అత్తయ్య నటి సనతో యూట్యూబ్‌ ఛానల్‌లో చేసిన ఈ టాక్‌లో సమీరా తన చిన్నప్పుడు జరిగిన ఓ విషయం గురించి ఇలా చెప్పుకొచ్చింది.

నా మీద కోరికలు తీర్చుకున్నాడు
“నా చిన్నప్పుడు మా ఎదురింట్లో ఉన్న ఆంటీ వాళ్ల ఇంటికి రిలేటివ్స్ వచ్చేవారు.. అందులో ఒక అంకుల్ లాంటి అన్న కూడా వచ్చేవారు.. అంటే ఆయన ఏజ్ కొంచెం పెద్దది.. ఆయన వచ్చి నార్మల్‌గా మనం చిన్నపిల్లల్ని ముద్దు చేస్తాం కదా అలా నా బుగ్గలు పట్టుకునేవారు.. ముద్దు చేసేవారు.. అయితే ఆ వయసులో నాకు అదేం అర్థం కాలేదు.. మేము రైల్వే కోటస్‌లో ఉండేవాళ్లం.. ఇప్పుడైతే అపార్ట్‌మెంట్స్‌లో లిప్ట్‌లు అవి ఉంటాయి కాబట్టి స్టెప్స్ ఎక్కువ వాడరు.. కానీ మేమున్న కోటస్‌లో స్టెప్స్ బాగా యూజ్ చేసేవాళ్లు.. అయితే పైన టెర్రస్‌కి వెళ్లే స్టెప్స్ దగ్గరికి మాత్రం ఎక్కువగా ఎవరూ రారు..

సో హైడ్ అండ్ సీక్ (దొంగాట) ఆడదాం.. మనం ఇక్కడ దాక్కుందామని ఆయన అనేవాళ్లు.. ఆ సమయంలో అది చాలా ఫన్‌గా ఉండేది.. పిల్లలందరం ఆడేవాళ్లం.. అందులో ఈ అన్న కూడా జాయిన్ అయ్యేవాళ్లు.. అలా ఆ టెర్రస్ మెట్లు దగ్గరికి నన్ను తీసుకెళ్లి నన్ను ముద్దు చేసేవారు.. కానీ ఒకానొక సందర్భంలో నాకు అది అన్‌కంఫర్టబుల్‌గా అనిపించింది.. కొంచెం ఏజ్ వచ్చిన తర్వాత నాకు అర్థమైంది.. ఆయన నన్ను ముద్దు చేసేవారు కాదు.. ఆయన కోరికలు నా మీద తీర్చుకునేవారు.. ఒక రకంగా చెప్పాలంటే అది పిల్లల మీద జరిగిన లైంగిక దాడి లాంటిదే.. ఆ టైమ్‌లో దీని మీద మనకి అంత అవగాహన లేదు.. తల్లిదండ్రులకి ఉండి ఉండొచ్చు కానీ పిల్లలకి నేర్పించాలి.. గుడ్ టచ్, బ్యాడ్ టచ్ అంటే చెప్పాలని మా పేరెంట్స్ అనుకోలేదు..

ఒకవేళ నేను ఆ సమయంలో వెళ్లి చెప్పినా ముందు నన్నే ప్రశ్నిస్తారు.. అసలు నువ్వెందుకు అక్కడికి వెళ్లావ్ ఆడుకోవడానికి అని తిట్టేవారు.. అయితే మన పిల్లలికి ఇలాంటివి ఎదురైతే నువ్వు కంగారు పడకు నీకు మేమున్నామనే ధైర్యాన్ని పేరెంట్స్ ఇవ్వాలి.. కానీ ముందు మనం పిల్లల్ని తిట్టేస్తే వాళ్లకి చెప్పాలని కూడా అనిపించదు.. అలాంటి భయంతోనే నేను అప్పుడు అది చెప్పలేదు.. కానీ కొంత వయసొచ్చాక నాకు తెలిసింది ఇలా పిల్లల మీద కొంతమంది చూపించేది ప్రేమ కాదు.. పిల్లల మీద వాళ్ల కోరికలు తీర్చుకుంటున్నారని..” అంటూ సమీరా మాట్లాడింది.

తెలుగులో ఆడపిల్ల, జీవితం, అభిషేకం, భార్యామణి, డా. చక్రవర్తి, మనసు మమత సహా ఎన్నో సీరియల్స్‌లో నటించింది సమీరా. నటి సన కుమారుడు అన్వర్‌ని వివాహం చేసుకున్న తర్వాత తన కుటుంబం, పిల్లల్ని చూసుకుంటూ ఇలా అప్పుడప్పుడూ యూట్యూబ్ ఛానల్ ద్వారా ఆడియన్స్‌ని పలకరిస్తుంది.

Follow us