బాలయ్య – కొరటాల కాంబోలో క్రేజీ ప్రాజెక్ట్

Balayya's NBK 112th film launched...

Balayya–Koratala నటసింహం నందమూరి బాలకృష్ణ బాక్సాఫీస్ వద్ద తన జోరును కొనసాగిస్తున్నారు. అరవై ఏళ్ల వయసులోనూ కుర్ర హీరోలకు ధీటుగా వరుస ప్రాజెక్టులను లైన్‌లో పెడుతూ అందరినీ ఆశ్చర్యపరుస్తున్నారు. ప్రస్తుతం గోపీచంద్ మలినేని దర్శకత్వంలో సినిమా చేస్తున్న బాలయ్య, తన తదుపరి చిత్రం కోసం స్టార్ డైరెక్టర్ కొరటాల శివతో చేతులు కలుపుతున్నట్లు సమాచారం. ఇప్పటికే ఈ ప్రాజెక్ట్‌పై చర్చలు పూర్తయ్యాయని, సుధాకర్ చెరుకూరి ఈ భారీ చిత్రాన్ని నిర్మించనున్నారని తెలుస్తోంది. త్వరలోనే దీనిపై అధికారిక ప్రకటన వెలువడనుంది.

నందమూరి బాలకృష్ణ…. ఈ పేరు వింటేనే థియేటర్లలో పూనకాలు మొదలవుతాయి. వయసు పెరుగుతున్న కొద్దీ ఆయనలోని వేగం, వాడి ఏమాత్రం తగ్గకపోగా కుర్ర హీరోలకు సైతం సవాల్ విసిరేలా రెట్టింపు అవుతోంది. ‘అఖండ’తో మొదలైన ఆయన జైత్రయాత్ర ‘వీరసింహారెడ్డి’, ‘భగవంత్ కేసరి’, ‘డాకు మహరాజ్’ వంటి వరుస విజయాలతో బాక్సాఫీస్ వద్ద సునామీ సృష్టిస్తోంది. అరవై ఏళ్ల వయసులో కూడా కుర్ర దర్శకుల ఆలోచనలకు తగ్గట్లుగా తనను తాను మలచుకుంటూ, బ్యాక్-టు-బ్యాక్ సినిమాలను లైన్‌లో పెట్టడం కేవలం నటసింహానికే సాధ్యం. ప్రస్తుతం గోపీచంద్ మలినేని దర్శకత్వంలో ఓ భారీ యాక్షన్ ఎంటర్టైనర్‌ను పట్టాలెక్కించిన బాలయ్య తన తదుపరి ప్రాజెక్టు విషయంలో అందరినీ ఆశ్చర్యపరిచే నిర్ణయం తీసుకున్నారు.

సినీ వర్గాల సమాచారం ప్రకారం, బాలకృష్ణ తన తదుపరి చిత్రం కోసం సక్సెస్‌ఫుల్ డైరెక్టర్ కొరటాల శివతో చేతులు కలుపుతున్నారు. నిజానికి ఈ ప్రాజెక్ట్ రేసులో వివేక్ ఆత్రేయ, విజయ్ కనకమేడల వంటి యువ దర్శకుల పేర్లు వినిపించినప్పటికీ, చివరికి కొరటాల శివ చెప్పిన కథకే బాలయ్య పచ్చజెండా ఊపినట్లు తెలుస్తోంది. సుధాకర్ చెరుకూరి నిర్మించనున్న ఈ చిత్రంపై త్వరలోనే అధికారిక ప్రకటన వెలువడనుంది. మాస్ పల్స్ తెలిసిన బాలయ్య ఇమేజ్‌కి, సందేశాత్మక చిత్రాలను కమర్షియల్ హంగులతో తెరకెక్కించే కొరటాల మార్క్ తోడైతే బాక్సాఫీస్ రికార్డులు తిరగరాయడం ఖాయమని అభిమానులు ఆశిస్తున్నారు.

కొరటాల శివ తెలుగు చిత్ర పరిశ్రమలో ఒక ప్రత్యేకమైన ముద్ర వేశారు. రచయితగా ‘భద్ర’, ‘బృందావనం’, ‘ఊసరవెల్లి’ వంటి చిత్రాలకు పదునైన సంభాషణలు అందించిన ఆయన ప్రభాస్ హీరోగా నటించిన ‘మిర్చి’తో దర్శకుడిగా గ్రాండ్ ఎంట్రీ ఇచ్చి ఆ తర్వాత వెనక్కి తిరిగి చూసుకోలేదు. మహేష్ బాబుతో చేసిన ‘శ్రీమంతుడు’ (గ్రామ దత్తత), ఎన్టీఆర్‌తో ‘జనతా గ్యారేజ్’ (పర్యావరణం), మళ్ళీ మహేష్ బాబుతో ‘భరత్ అనే నేను’ (రాజకీయాలు) చిత్రాలతో బాక్సాఫీస్ వద్ద వరుసగా రూ. 100 కోట్లకు పైగా వసూళ్లు సాధించిన ఘనత ఆయనది. ‘ఆచార్య’తో చిన్న ఎదురుదెబ్బ తగిలినా ఎన్టీఆర్ హీరోగా తెరకెక్కించిన ‘దేవర: పార్ట్ 1’తో ప్రపంచవ్యాప్తంగా భారీ విజయాన్ని సొంతం చేసుకున్నారు. ఈ సినిమా కోసం ఆయన రూ. 30 కోట్ల పారితోషికం తీసుకున్నట్లు సమాచారం. హీరో పాత్రను అత్యంత పవర్‌ఫుల్‌గా ఎలివేట్ చేస్తూనే, సమాజానికి ఒక గొప్ప సందేశాన్ని ఇవ్వడం కొరటాల శైలి. ఇప్పుడు బాలకృష్ణ వంటి పవర్‌ఫుల్ పర్సనాలిటీని ఆయన ఎలా చూపిస్తారో అన్నది టాలీవుడ్‌లో హాట్ టాపిక్ గా మారింది. ఈ కాంబినేషన్ సెట్స్ పైకి వెళ్తే సినిమా పక్కా బ్లాక్ బస్టర్ అని ట్రేడ్ వర్గాలు అంచనా వేస్తున్నాయి.

Follow us