Gameskraft: గేమ్స్‌క్రాఫ్ట్‌లో 120 మంది ఉద్యోగుల తొలగింపు!
బెంగళూరుకు చెందిన ఈ కంపెనీలో మొత్తం 448 మంది ఉద్యోగులు ఉండగా అందులో 120 మందిని తొలగించారు. ప్రభుత్వం తీసుకొచ్చిన కొత్త చట్టం వల్ల తమ ప్రధాన వ్యాపారం నిలిచిపోయిందని, అందుకే నిర్వహణలో మార్పులు చేసుకోవడంలో భాగంగా ఈ తొలగింపులు జరిగాయని కంపెనీ తెలిపింది.
- By Gopichand Published Date - 09:03 PM, Thu - 18 September 25
Gameskraft: రమ్మీ కల్చర్ (Rummy Culture) ను నిర్వహిస్తున్న గేమ్స్‌క్రాఫ్ట్ (Gameskraft) సంస్థ తమ 120 మంది ఉద్యోగులను తొలగించింది. భారతదేశంలో రమ్మీ, పోకర్, లూడో, ఫాంటసీ స్పోర్ట్స్ వంటి రియల్ మనీ గేమ్స్‌పై ప్రభుత్వం నిషేధం విధించడంతో ఈ నిర్ణయం తీసుకుంది. ట్రాక్స్‌ఎన్ (Tracxn) డేటా ప్రకారం.. బెంగళూరుకు చెందిన ఈ కంపెనీలో మొత్తం 448 మంది ఉద్యోగులు ఉండగా అందులో 120 మందిని తొలగించారు. ప్రభుత్వం తీసుకొచ్చిన కొత్త చట్టం వల్ల తమ ప్రధాన వ్యాపారం నిలిచిపోయిందని, అందుకే నిర్వహణలో మార్పులు చేసుకోవడంలో భాగంగా ఈ తొలగింపులు జరిగాయని కంపెనీ తెలిపింది. వ్యాపార నిర్ణయాలలో మార్పుల కారణంగా భవిష్యత్తులో మరిన్ని ఉద్యోగాల కోత ఉండవచ్చని కూడా కంపెనీ సూచించింది.
ఉద్యోగుల తొలగింపుపై కంపెనీ విచారం
ఈ నిర్ణయంపై కంపెనీ ఒక ప్రకటన విడుదల చేసింది. “చాలా ఆలోచనల తర్వాత మేము వివిధ బృందాలు, విభాగాల నుంచి దాదాపు 120 మంది ఉద్యోగులను తొలగిస్తున్నాం. ఈ నిర్ణయం చాలా బాధతో తీసుకుంటున్నాం. బయట ఉన్న పరిస్థితులకు అనుగుణంగా కంపెనీ వ్యాపారం మారుతోంది. భవిష్యత్తులో మరిన్ని నిర్మాణాత్మక మార్పులు అవసరం కావచ్చు” అని పేర్కొంది. తొలగించిన ఉద్యోగులందరికీ మార్చి 2026 వరకు హెల్త్ ఇన్సూరెన్స్ సదుపాయం కొనసాగుతుందని కంపెనీ హామీ ఇచ్చింది. తమపై ఆధారపడిన తల్లిదండ్రులకు కూడా ఆరోగ్య కవరేజీని ఎంచుకున్న ఉద్యోగులకు ఇదే సౌలభ్యం ఉంటుందని తెలిపింది.
Also Read: AP Assembly : అప్పులు చేసి సంక్షేమం ఇవ్వడం కరెక్ట్ కాదు – సీఎం చంద్రబాబు
గేమింగ్ రంగంలో నిరంతర తొలగింపులు
గేమ్స్‌క్రాఫ్ట్ వ్యవస్థాపకుడు, సీఈవో పృథ్వీ సింగ్ మాట్లాడుతూ.. “ఈ నిర్ణయం పూర్తిగా బయటి పరిస్థితులు, కొత్త వాస్తవాలకు అనుగుణంగా తీసుకోవాల్సి వచ్చింది. ఇది వారి ప్రతిభకు, అంకితభావానికి సంబంధించింది కాదు. మా ఉద్యోగుల పట్ల మా గౌరవం అలాగే ఉంటుంది. వారి తర్వాతి దశలో వారికి మద్దతు ఇవ్వడానికి మేము అన్ని విధాలా ప్రయత్నిస్తాం” అని అన్నారు. రియల్ మనీ గేమింగ్‌పై నిషేధం తర్వాత ఉద్యోగులను తొలగించిన ఇతర కంపెనీల జాబితాలో గేమ్స్‌క్రాఫ్ట్ కూడా చేరింది.
