BSNL బంపర్ ఆఫర్.. 1 రూపాయికే అన్‌లిమిటెడ్ కాల్స్

BSNL Freedom Plan  ప్రభుత్వ రంగ టెలికాం సంస్థ భారత్ సంచార్ నిగమ్ లిమిటెడ్ (బీఎస్ఎన్ఎల్) కొత్త కస్టమర్లను ఆకర్షించేందుకు ఓ సంచలన ఆఫర్‌ను మళ్లీ తెరపైకి తెచ్చింది. తన ప్రముఖ ‘ఫ్రీడమ్ ప్లాన్’ కింద కేవలం ఒక్క రూపాయి చెల్లింపుతో 30 రోజుల పాటు అపరిమిత సేవలను అందిస్తోంది. ఈ ఆఫర్ ఏప్రిల్ 30 వరకు అందుబాటులో ఉంటుంది.

ఈ ప్లాన్ కింద వినియోగదారులకు 30 రోజుల వాలిడిటీతో పాటు పలు ప్రయోజనాలు లభిస్తాయి. ఏ నెట్‌వర్క్‌కైనా అపరిమిత వాయిస్ కాల్స్ చేసుకోవచ్చు. రోజుకు 2GB చొప్పున మొత్తం 60GB హై-స్పీడ్ 4G డేటా, రోజుకు 100 ఎస్ఎంఎస్‌లు ఉచితంగా అందిస్తారు. సిమ్ కార్డును కూడా ఉచితంగానే అందజేయనున్నారు. ఈ ఆఫర్ వివరాలను బీఎస్ఎన్ఎల్ తన అధికారిక ఎక్స్ ఖాతాలో ప్రకటించింది.

అయితే, ఈ ఆఫర్ కేవలం కొత్తగా బీఎస్ఎన్ఎల్ కనెక్షన్ తీసుకునే వారికి లేదా ఇతర నెట్‌వర్క్‌ల నుంచి మొబైల్ నంబర్ పోర్టబిలిటీ (MNP) ద్వారా మారే వారికి మాత్రమే వర్తిస్తుందని సంస్థ స్పష్టం చేసింది. ప్రస్తుత వినియోగదారులకు ఇది అందుబాటులో లేదు. ఇతర టెలికాం సంస్థలు రీఛార్జ్ ధరలను పెంచుతున్న తరుణంలో, తన 4G నెట్‌వర్క్‌ను బలోపేతం చేసుకుంటూ మార్కెట్‌లో వాటాను పెంచుకోవాలని బీఎస్ఎన్ఎల్ లక్ష్యంగా పెట్టుకుంది.

ఈ ‘ఫ్రీడమ్ ప్లాన్’ పొందాలనుకునే ఆసక్తిగల వారు తమ సమీపంలోని బీఎస్ఎన్ఎల్ కస్టమర్ సర్వీస్ సెంటర్ (CSC) లేదా అధీకృత రిటైలర్లను సంప్రదించవచ్చు. కొత్త సిమ్ తీసుకోవాలనుకునే వారికి ఇది ఒక మంచి అవకాశమని, గడువులోగా ఈ ఆఫర్‌ను వినియోగించుకోవడం మంచిదని నిపుణులు సూచిస్తున్నారు.

Follow us