Anil Ambani : అనిల్‌ అంబానీకి మరో షాక్‌.. సీబీఐ కేసు నమోదు

Anil Ambani : ప్రముఖ పారిశ్రామిక వేత్త, రిలయన్స్ గ్రూప్ ఛైర్మన్ అనిల్ అంబానీకి కేంద్ర దర్యాప్తు సంస్థ సీబీఐ నుండి మరో పెద్ద దెబ్బ తగిలింది. బ్యాంకుల నుంచి తీసుకున్న రుణాలను దుర్వినియోగం చేశారనే ఆరోపణలతో ఆయనపై సీబీఐ కేసు నమోదు చేసింది. స్టేట్ బ్యాంక్ ఆఫ్ ఇండియా (SBI) చేసిన ఫిర్యాదు ఆధారంగా ఈ కేసు నమోదు అయింది.

రికార్డు స్థాయిలో రూ.2,929 కోట్ల రుణ మోసం

ఎస్‌బీఐ అందించిన సమాచారం మేరకు, అనిల్ అంబానీ నేతృత్వంలోని రిలయన్స్ కమ్యూనికేషన్స్ లిమిటెడ్ (ఆర్‌కామ్) సంస్థ, దాని అనుబంధ కంపెనీలు బ్యాంకుల నుంచి భారీగా రుణాలు తీసుకున్నాయి. ప్రత్యేకంగా, రూ.2,929.05 కోట్ల రుణం మోసపూరితంగా పొందినట్లు గుర్తించిన సీబీఐ, ముంబైలో ఆర్‌కామ్‌, అనిల్ అంబానీ సహా ఇతరులపై ఎఫ్‌ఐఆర్ నమోదు చేసింది. ఇటీవలి కాలంలో సీబీఐ ఆర్‌కామ్ సంస్థల కార్యాలయాల్లో సోదాలు కూడా నిర్వహించిన విషయం తెలిసిందే. ఇది మనీ లాండరింగ్, బ్యాంకుల మోసం కేసుల్లో భాగంగా జరిపిన విచారణలో భాగమే.

రూ.31,580 కోట్ల రుణం, వినియోగంలో పెద్ద ఎత్తున లోపాలు

ఆర్‌కామ్ మరియు దాని అనుబంధ సంస్థలు దేశవ్యాప్తంగా ఉన్న పలు బ్యాంకుల నుంచి కలిపి రూ.31,580 కోట్ల వరకు రుణాలు తీసుకున్నట్లు తాజా ఫైలింగ్స్‌ ద్వారా వెలుగు చూసింది. ఈ నిధులను అసలైన ప్రయోజనాలకు కాకుండా ఇతర అవసరాలకు వాడినట్లు బ్యాంకులు గుర్తించాయి. ఎస్‌బీఐ తన అఫిషియల్ లేఖలో పేర్కొన్న దానినుబట్టి, ఆర్‌కామ్ సంస్థ రూ.13,667.73 కోట్లు రుణ చెల్లింపులకు, రూ.12,692.31 కోట్లు కనెక్టెడ్ పార్టీలకు చెల్లింపుల కోసం వినియోగించాలని ఒప్పందంలో స్పష్టంగా పేర్కొనబడింది. కానీ వాస్తవానికి 2016 నాటికి ఈ రెండు విభాగాలకు వినియోగించిన మొత్తం రూ.6,265.85 కోట్లు, రూ.5,501.56 కోట్లు మాత్రమేనని బ్యాంక్ తెలిపింది. అంటే, మిగతా నిధుల వినియోగంలో అనేక అనుమానాలు తలెత్తుతున్నాయి.

ఇతర రుణాల్లోనూ అవకతవకలు

దేనా బ్యాంక్ నుండి తీసుకున్న రూ.250 కోట్ల రుణం, అలాగే ఐఐఎఫ్‌సీఎల్‌ (IIFCL) నుండి పొందిన రూ.248 కోట్ల రుణం విషయంలోనూ సీబీఐకి అవకతవకలపై ఆధారాలు లభించాయి. ఈ మొత్తం వ్యవహారాలన్నీ ఒక పెద్ద మోసపు కుట్ర భాగంగా ఉన్నాయనే అనుమానం వ్యక్తమవుతోంది.

RBI మార్గదర్శకాలను పాటించని ఆర్‌కామ్?

ఆర్బీఐ విధించిన నిబంధనల ప్రకారం, ఏ ఖాతా మోసపూరితంగా మారిందని గుర్తించిన వెంటనే అంటే 21 రోజుల్లోగా ఆ వివరాలను ఆర్బీఐకి నివేదించాలి. అదేవిధంగా, సంబంధిత అధికార సంస్థలకు సీబీఐ వంటి దర్యాప్తు సంస్థలకు ఫిర్యాదు చేయాల్సి ఉంటుంది. ఈ నేపథ్యంలోనే ఎస్‌బీఐ తన ఫ్రాడ్ ఐడెంటిఫికేషన్ కమిటీ నివేదిక ఆధారంగా చర్యలు చేపట్టింది.

మోసపూరిత రుణాలపై దర్యాప్తు ముమ్మరం

ఈ కేసు దేశవ్యాప్తంగా పెద్ద చర్చనీయాంశంగా మారింది. వేల కోట్ల రూపాయల రుణం దుర్వినియోగమయ్యిందన్న ఆరోపణలు, వ్యాపార దిగ్గజాలపై దర్యాప్తు ముమ్మరవుతున్న వాతావరణంలో కొత్త చర్చలకు దారితీస్తున్నాయి. అనిల్ అంబానీపై సీబీఐ నమోదు చేసిన తాజా కేసు అతని వ్యాపార సామ్రాజ్యంలో మరో బలమైన దెబ్బగా పరిగణించవచ్చు. కేసు ఎలా పురోగమిస్తుందో వేచి చూడాల్సిందే.

Read Also: Nara Lokesh : టీచర్ల గౌరవాన్ని దెబ్బతీసే వైసీపీ చర్యలు దుర్మార్గమైనవి : మంత్రి లోకేశ్‌