Andhra Pradesh: ఏపీలో నూత‌న విద్యావిధానానికి శ్రీకారం

సుదీర్ఘ వేసవి సెలవుల తర్వాత ఆంధ్రప్రదేశ్‌లోని పాఠశాలలు మంగళవారం పునఃప్రారంభించారు. విద్యార్థులు తిరిగి పాఠశాలకు హాజ‌ర‌య్యారు. అయితే ఈసారి విద్యాసంవత్సరాన్ని కొత్త విద్యావిధానంలో అమలు చేయనున్నారు. విద్యావ్యవస్థను పటిష్టం చేసేందుకు పీపీ-1, పీపీ-2లతో కూడిన శాటిలైట్ ఫౌండేషన్ పాఠశాలలను ప్రారంభించారు. శాటిలైట్ ఫౌండేషన్, ఫౌండేషన్, ఫౌండేషన్ ప్లస్, ప్రీ-హైస్కూల్ మరియు హైస్కూల్ ప్లస్ స్కూల్స్ ఉంటాయి. అలాగే ఇప్పటి వరకు విలీనమైన ప్రాథమికోన్నత పాఠశాలల్లోని 3, 4, 5 తరగతులను సమీపంలోని ఉన్నత పాఠశాలలు, పూర్వ ఉన్నత పాఠశాలలకు మార్చాలని విద్యాశాఖ క్షేత్రస్థాయి అధికారులకు ఆదేశాలు జారీ చేసింది. మరోవైపు పాఠశాలలు తెరిచిన తొలిరోజే విద్యార్థులకు విద్యా కానుక కిట్లను ప్రభుత్వం అమలు చేయనుంది.

విద్యాశాఖ ఏర్పాట్లు పూర్తి చేసింది. 1 నుంచి 10వ తరగతి వరకు చదువుతున్న విద్యార్థులకు మూడు జతల యూనిఫాం క్లాత్, షూలు, సాక్స్, బెల్ట్, స్కూల్ బ్యాగ్, పాఠ్యపుస్తకాలు, వర్క్‌బుక్‌లు, ఆక్స్‌ఫర్డ్ ఇంగ్లీషు తెలుగు నిఘంటువులను ప్రభుత్వం అందజేస్తుంది. కర్నూలు జిల్లా ఆదోని మున్సిపల్ హైస్కూల్‌లో ప్రభుత్వం రూ.931.02 కోట్లు వెచ్చించిన కార్యక్రమాన్ని సీఎం జగన్ ప్రారంభించారు. పాఠశాలల ప్రారంభం కోసం విద్యాశాఖ జూన్ 28 నుంచి పాఠశాలల సన్నద్ధత కార్యక్రమాన్ని చేపట్టింది. ప్రతి పాఠశాలను శుభ్రం చేయడంతో పాటు మంచినీటి సౌకర్యం కల్పిస్తున్నారు. పొరుగు ప్రాంతాలు, గ్రామాల నుండి ప్రభుత్వ పాఠశాలల్లోకి పిల్లలను ఆకర్షించడానికి గ్రామ సందర్శన కార్యక్రమాలను కూడా నిర్వహించింది.