మద్యం ధరలపై పవన్ ఆగ్రహం !!

Pawan Is Angry Over Liquor

Pawan is Angry over Liquor Prices : ఆంధ్రప్రదేశ్‌లో నూతన మద్యం విధానం అమలులోకి వచ్చిన తర్వాత క్షేత్రస్థాయిలో చోటుచేసుకుంటున్న పరిణామాలపై ఉపముఖ్యమంత్రి పవన్ కల్యాణ్ తీవ్రంగా స్పందించారు. రాష్ట్రంలోని పలు మద్యం దుకాణాల్లో ప్రభుత్వం నిర్ణయించిన ధరల కంటే (MRP) అధిక ధరలకు మద్యం విక్రయిస్తున్నారన్న ఫిర్యాదులపై డిప్యూటీ సీఎం పవన్ కల్యాణ్ ఆగ్రహం వ్యక్తం చేశారు. ఎంఆర్‌పీ కంటే ఒక్క రూపాయి ఎక్కువ వసూలు చేసినా అది నిబంధనల ఉల్లంఘన కిందకే వస్తుందని ఆయన స్పష్టం చేశారు. ఇటువంటి అక్రమ విక్రయాల వల్ల ప్రభుత్వ ఆశయాలకు విఘాతం కలగడమే కాకుండా, ప్రభుత్వానికి చెడ్డపేరు వస్తుందని ఆయన ఆవేదన వ్యక్తం చేశారు. నిబంధనలు అతిక్రమించి సామాన్యులను దోచుకోవాలని చూస్తే ఊరుకునేది లేదని దుకాణదారులను హెచ్చరించారు.

మద్యం విక్రయాల ప్రక్రియ పారదర్శకంగా జరగాలని, ఎక్కడా అవినీతికి తావుండకూడదని పవన్ కల్యాణ్ ఎక్సైజ్ శాఖ అధికారులకు కీలక ఆదేశాలు జారీ చేశారు. ప్రతి దుకాణం వద్ద ధరల పట్టికను స్పష్టంగా ప్రదర్శించాలని, కొనుగోలుదారులకు రసీదులు ఇచ్చేలా చూడాలని సూచించారు. అధిక ధరల విక్రయాలపై నిరంతర నిఘా ఉంచాలని, ఆకస్మిక తనిఖీలు నిర్వహించి బాధ్యులైన వారి లైసెన్సులను రద్దు చేయడంతో పాటు కఠిన చర్యలు తీసుకోవాలని అధికారులను ఆదేశించారు. ప్రభుత్వ నిబంధనలను పాటించని వారి పట్ల కఠినంగా వ్యవహరించాలని ఆయన స్పష్టం చేశారు.

గత ప్రభుత్వం అనుసరించిన విధానాల వల్ల మద్యం రంగంలో అనేక అవకతవకలు జరిగాయని, ప్రస్తుత ప్రభుత్వం నాణ్యమైన మద్యాన్ని సరసమైన ధరలకే అందించాలని లక్ష్యంగా పెట్టుకుందని ఈ సందర్భంగా గుర్తు చేశారు. కొత్త మద్యం పాలసీ ద్వారా ఆదాయం పెంచుకోవడంతో పాటు ప్రజలపై అనవసర భారం పడకుండా చూడాలన్నదే ప్రభుత్వ ఉద్దేశమని పవన్ పేర్కొన్నారు. క్షేత్రస్థాయిలో సిబ్బంది కుమ్మక్కై అక్రమాలకు పాల్పడితే వారిపై కూడా వేటు తప్పదని పరోక్షంగా హెచ్చరించారు. ఈ కఠిన నిర్ణయంతో రాష్ట్రవ్యాప్తంగా మద్యం సిండికేట్లపై నిఘా మరింత పెరిగే అవకాశం ఉంది.

Follow us