Mahanadu : కడపలో ఈమహానాడు చరిత్ర సృష్టించనుంది: సీఎం చంద్రబాబు

Mahanadu :   దేవునికడపలో తెలుగుదేశం పార్టీ మహానాడు మహోత్సవం అట్టహాసంగా ప్రారంభమైంది. ఈ సందర్భంలో ముఖ్యమంత్రి, టీడీపీ అధినేత నారా చంద్రబాబు నాయుడు ప్రసంగిస్తూ, ఈ మహానాడు తెలుగుదేశం చరిత్రలో ఓ మైలురాయిగా నిలిచే అవకాశం ఉందని స్పష్టం చేశారు. ఇది ప్రత్యేకమైన మహానాడు. తొలిసారిగా కడప గడ్డపై మహానాడు నిర్వహిస్తున్నాం. ఇది కేవలం సమారోహం మాత్రమే కాదు, భవిష్యత్తు దిశను నిర్ణయించే వేదిక అని ఆయన హితవు పలికారు. ఉమ్మడి కడప జిల్లాలో టీడీపీ ఇప్పటికే పదింటికి ఏడు స్థానాలు గెలవగలిగిందని, వచ్చే ఎన్నికల్లో పదింటికి పది సాధించాలనే లక్ష్యంతో ముందుకు వెళ్లాలని కార్యకర్తలకు పిలుపునిచ్చారు.

2024 ఎన్నికల్లో సాధించిన విజయం అసాధారణం. 93 శాతం స్ట్రైక్‌రేట్‌తో దేశాన్ని ఉలిక్కిపడేలా చేశాం. ఈ విజయం మా కార్యకర్తల త్యాగాల ఫలితం. ఎవ్వరూ ఆశించకుండా పార్టీ జెండా మోస్తున్న పసుపు సైనికులే మన విజయానికి మూల కారకం. జనసేన, బీజేపీతో మైత్రీలో భాగంగా నిలబడి పనిచేసిన కార్యకర్తలందరికీ హృదయపూర్వక కృతజ్ఞతలు అని అన్నారు. పార్టీ ముగిసిపోయిందని వ్యాఖ్యానించినవారిపై ఘాటు వ్యాఖ్యలు చేస్తూ వాళ్లే ఇక రాజకీయంగా ముగిసిపోయారు అని చంద్రబాబు పేర్కొన్నారు. గత నాలుగు దశాబ్దాల్లో ఎన్నో సవాళ్లను ఎదుర్కొన్న తెలుగుదేశం పార్టీ, ఈ దేశ రాజకీయాల్లో ఒక ప్రత్యేక స్థానం సంపాదించిందని ఆయన గుర్తుచేశారు. గత ప్రభుత్వ పాలనను విమర్శిస్తూ వైసీపీ పాలన రాష్ట్రాన్ని అస్తవ్యస్తం చేసింది. కార్యకర్తలపై అక్రమ కేసులు పెట్టారు, ప్రాణాలను బలిగొన్నారు. అయినా కూడా తలవంచకుండా పోరాడిన మీ అందరినీ అభినందిస్తున్నాను అని పేర్కొన్నారు.

తెలుగుదేశం కార్యకర్త చంద్రయ్య ధైర్యాన్ని గుర్తుచేస్తూ అతడిని పీక కోస్తున్నా చివరి శ్వాస వరకు జై తెలుగుదేశం అన్నాడు. ఆయన మనకు స్ఫూర్తి అని చంద్రబాబు భావోద్వేగంతో చెప్పారు. పార్టీని విశ్వసించిన ప్రజలకు మంచి పాలన అందించడమే ధ్యేయంగా నిలిచామని తెలిపారు. ప్రతిపక్షంలో అవినీతిపై పోరాడాం. అధికారంలో ఉన్నప్పుడు అవినీతి రహిత పాలనను అందించాం. ప్రజల ఆస్తులు, హక్కులు కాపాడాం. తెలుగు రాజకీయాల్లో విలువలు, ఆచారాలు కల్పించిన ఏకైక పార్టీ తెలుగుదేశమే. రాష్ట్రంలోని ఇతర పార్టీల్లోనూ మన పార్టీ విద్యార్థులే ప్రధాన పాత్రలో ఉన్నారు. తెలుగుదేశం పార్టీ చరిత్రను చెరిపేయాలనుకునే ప్రయత్నాలు ఫలించవు. ఇది కాగితంపై రాసినది కాదు, ప్రజల గుండెల్లో చెక్కిన చరిత్ర అని అన్నారు. ఈ మహానాడు ద్వారా పార్టీ ముందున్న లక్ష్యాలను స్పష్టంగా ప్రకటించి, భవిష్యత్తుకు బలమైన మార్గసూచిని ఏర్పాటు చేస్తామని చంద్రబాబు నాయుడు తన ప్రసంగం ముగించారు.

Read Also: Amazon : అమెజాన్‌లో అబ్బురపరిచిన దృశ్యం.. నదిలో భారీ సర్పాలు? వీడియో చూసి షాక్‌