Sarpamitra : సర్పమిత్ర పేరుతో గ్రామాల్లో వాలంటీర్లను ఏర్పాటు చేయబోతున్న ఏపీ సర్కార్
Sarpamitra : ఆంధ్రప్రదేశ్ ప్రభుత్వం మరో వినూత్న నిర్ణయాన్ని తీసుకుంది. రాష్ట్రంలో పాముకాటు వల్ల జరుగుతున్న మరణాలను తగ్గించేందుకు ప్రత్యేక చర్యలు చేపట్టింది. అటవీ శాఖ ఆధ్వర్యంలో “సర్పమిత్ర వాలంటీర్ వ్యవస్థ” ఏర్పాటు చేయాలని నిర్ణయించింది
- Author : Sudheer
Date : 12-11-2025 - 4:01 IST
Published By : Hashtagu Telugu Desk
ఆంధ్రప్రదేశ్ ప్రభుత్వం మరో వినూత్న నిర్ణయాన్ని తీసుకుంది. రాష్ట్రంలో పాముకాటు వల్ల జరుగుతున్న మరణాలను తగ్గించేందుకు ప్రత్యేక చర్యలు చేపట్టింది. అటవీ శాఖ ఆధ్వర్యంలో “సర్పమిత్ర వాలంటీర్ వ్యవస్థ” ఏర్పాటు చేయాలని నిర్ణయించింది. ఈ కార్యక్రమం హనుమాన్ ప్రాజెక్టు (Healing And Nurturing Units for Monitoring, Aid And Nursing of Wildlife – HANUMAN) లో భాగంగా అమలుకానుంది. ప్రతి గ్రామంలో ఒక సర్పమిత్ర వాలంటీర్ను నియమించి, పాములను సురక్షితంగా పట్టుకోవడం, పాముకాటుకు గురైన వారికి ప్రథమ చికిత్స అందించడం వంటి అంశాలపై ప్రత్యేక శిక్షణ ఇవ్వనున్నారు. వచ్చే ఐదేళ్లలో మొత్తం 30,000 మంది వాలంటీర్లను రాష్ట్రవ్యాప్తంగా నియమించాలనే ప్రణాళికను రూపొందించారు. ఈ వాలంటీర్లకు అవసరమైన భద్రతా పరికరాలు, ప్రోత్సాహకాలు అందించాలని డిప్యూటీ సీఎం పవన్ కళ్యాణ్ ఇప్పటికే ఆదేశించారు.
Delhi Blast : భారీ ‘ఉగ్ర కుట్ర’.. సంచలన విషయాలు బయటకు
ప్రతి ఏడాది రాష్ట్రంలో సగటున 3,500 మంది పాముకాటుకు గురవుతుంటే, వారిలో సుమారు 350 మంది ప్రాణాలు కోల్పోతున్నారు. ఈ భయానక పరిస్థితిని అధిగమించేందుకు సర్పమిత్ర వ్యవస్థను ప్రభుత్వం కీలక అడుగుగా చూస్తోంది. ఈ వ్యవస్థ కేవలం పాముల వల్ల ప్రమాదాలను తగ్గించడం మాత్రమే కాదు, పాములను సంరక్షించడం కూడా ప్రధాన లక్ష్యం. అంటే పాములు జనావాసాల్లోకి వచ్చినప్పుడు ప్రజలు వాటిపై దాడి చేయకుండా, సర్పమిత్ర వాలంటీర్లు వాటిని సురక్షిత ప్రాంతాల్లో విడిచిపెడతారు. అదేవిధంగా పాముకాటుకు గురైన వారికి సమయానుకూలంగా ప్రథమ చికిత్స అందించడం, ఆసుపత్రికి తరలించే వరకు సహాయం చేయడం వీరి బాధ్యతగా ఉంటుంది.
వానాకాలంలో పాములు ఎక్కువగా ఇళ్లలోకి, పొలాల్లోకి ప్రవేశించే అవకాశం ఎక్కువగా ఉంటుంది. ప్రజలకు పాములను ఎలా హ్యాండిల్ చేయాలో తెలియక భయంతో చంపేస్తుంటారు. కానీ ఈ కొత్త వ్యవస్థతో ఆ పరిస్థితి మారనుంది. సర్పమిత్ర వాలంటీర్లు శాస్త్రీయంగా శిక్షణ పొందిన వారిగా, పాముల జీవన చక్రం, ప్రవర్తన, ప్రమాద నిరోధక పద్ధతులు వంటి అంశాల్లో అవగాహన కలిగి ఉంటారు. దీంతో ప్రజల ప్రాణాలు కాపాడడమే కాకుండా వన్యప్రాణుల సంరక్షణ కూడా సాధ్యమవుతుంది. ఈ ప్రాజెక్టు ద్వారా ప్రభుత్వం గ్రామస్థాయిలోనే మానవ–వన్యప్రాణి సంఘర్షణలను తగ్గించి, జీవ వైవిధ్య పరిరక్షణకు కొత్త దిశ చూపిస్తోంది. సత్వరమే తొలి బ్యాచ్ సర్పమిత్ర వాలంటీర్ల శిక్షణ కార్యక్రమం ప్రారంభం కానుందని అటవీశాఖ అధికారులు తెలిపారు.
Follow us
