అంబటి రాంబాబుపై ఏకంగా 52 కేసులు నమోదు !!

Ambati Rambabu Remand

వైసీపీ సీనియర్ నేత, మాజీ మంత్రి అంబటి రాంబాబు చుట్టూ కేసుల ఉచ్చు బిగుస్తోంది. గత కొద్దిరోజులుగా రాష్ట్రవ్యాప్తంగా ఆయనపై నమోదవుతున్న కేసుల పరంపర ఆంధ్రప్రదేశ్ రాజకీయాల్లో పెను సంచలనంగా మారింది. ఏకకాలంలో రాష్ట్రవ్యాప్తంగా వివిధ పోలీస్ స్టేషన్లలో ఏకంగా 52 కేసులు నమోదు కావడం ఇప్పుడు చర్చనీయాంశమైంది. ముఖ్యంగా ముఖ్యమంత్రి చంద్రబాబు నాయుడుపై గతంలో చేసిన అనుచిత వ్యాఖ్యలే ఈ కేసులకు ప్రధాన కారణంగా కనిపిస్తున్నాయి. కేవలం ఎనిమిది రోజుల వ్యవధిలోనే 36 కేసులు నమోదు చేయడం గమనార్హం. ఇప్పటికే సీఎంపై వ్యాఖ్యల కేసులో అరెస్టయిన అంబటి ప్రస్తుతం రాజమండ్రి జైలులో ఉండగా, అధికారులు ఆయనపై మూడు పీటీ (Prisoner Transit) వారెంట్లను సిద్ధం చేశారు. అంటే, ఒక కేసులో బెయిల్ వచ్చినా మరో కేసులో అరెస్ట్ చూపేలా వ్యూహాత్మక అడుగులు పడుతున్నాయి.

తాజాగా మెడికల్ కాలేజీల పీపీపీ (PPP) విధానానికి వ్యతిరేకంగా నిర్వహించిన ఆందోళన కార్యక్రమం అంబటిని మరో చిక్కులో పడేసింది. ఆ సమయంలో పోలీసుల విధులకు ఆటంకం కలిగించారనే ఆరోపణలపై నమోదైన కేసులో స్పెషల్ జుడీషియల్ కోర్టు ఆయనకు ఈ నెల 22వ తేదీ వరకు రిమాండ్ విధించింది. దీంతో ఆయన జైలు జీవితం మరికొంత కాలం పొడిగించబడింది. రాజమండ్రి సెంట్రల్ జైలులో ఖైదీగా ఉన్న అంబటిని, కొత్తగా నమోదైన కేసుల నిమిత్తం రాష్ట్రవ్యాప్తంగా ఉన్న వివిధ కోర్టులకు తరలించేందుకు పోలీసులు సన్నద్ధమవుతున్నారు.

ఈ వరుస కేసులపై వైఎస్సార్ కాంగ్రెస్ పార్టీ తీవ్ర ఆగ్రహం వ్యక్తం చేస్తోంది. ఇది ముమ్మాటికీ ప్రభుత్వ ‘కక్ష సాధింపు’ చర్యేనని ఆ పార్టీ నేతలు విమర్శిస్తున్నారు. ఒకే వ్యక్తిపై వారం రోజుల్లో ఇన్ని కేసులు పెట్టడం వెనుక రాజకీయ కుట్ర ఉందని, పీటీ వారెంట్ల ద్వారా అంబటిని రాష్ట్రమంతా తిప్పుతూ వేధించాలని ప్రభుత్వం భావిస్తోందని వైసీపీ మండిపడుతోంది. అయితే, చట్టం తన పని తాను చేసుకుపోతుందని, తప్పు చేసిన వారు ఎవరైనా శిక్ష అనుభవించాల్సిందేనని కూటమి ప్రభుత్వ వర్గాలు స్పష్టం చేస్తున్నాయి. ఈ పరిణామాలు ఏపీలో అధికార, ప్రతిపక్షాల మధ్య రాజకీయ సెగను మరింత రాజేస్తున్నాయి.

Follow us