Iran Attack America : ఒకే ఒక్క స్ట్రైక్‌తో అమెరికా ను కుదేల్ చేసిన ఇరాన్

Iran Attack America

పశ్చిమాసియాలో ఇరాన్-అమెరికా మధ్య ఉద్రిక్తతలు పరాకాష్టకు చేరాయి. అత్యాధునిక సాంకేతికత, భారీ యుద్ధనౌకలు కలిగిన అమెరికాను ఇరాన్ తన ‘తక్కువ ఖర్చు-ఎక్కువ నష్టం’ (Low cost, High impact) వ్యూహంతో ఉక్కిరిబిక్కిరి చేస్తోంది. తాజాగా ఖతార్‌లోని అమెరికాకు చెందిన అత్యంత కీలకమైన AN/FPS-132 ఎర్లీ వార్నింగ్ రాడార్ సిస్టమ్‌పై ఇరాన్ జరిపిన దాడి అగ్రరాజ్యానికి కోలుకోలేని దెబ్బ తీసింది. సుమారు 1.1 బిలియన్ డాలర్ల (రూ. 10 వేల కోట్లు) విలువైన ఈ రాడార్ వ్యవస్థను ఇరాన్ తన షహీద్ డ్రోన్ల ద్వారా ధ్వంసం చేసింది. ఈ ఘటన మిడిల్ ఈస్ట్‌లో అమెరికా రక్షణ కవచానికి ఒక పెద్ద రంధ్రం పడేలా చేసిందని రక్షణ నిపుణులు విశ్లేషిస్తున్నారు.

ఈ రాడార్ వ్యవస్థ అమెరికాకు ఎందుకు అంత కీలకం అంటే.. ఇది సుమారు 5,000 కిలోమీటర్ల దూరం నుంచే శత్రువు ప్రయోగించే బాలిస్టిక్ క్షిపణులను గుర్తించగలదు. ఇరాన్, ఇరాక్, సిరియాతో పాటు హిందూ మహాసముద్రం వరకు నిఘా ఉంచే ఈ వ్యవస్థ, అమెరికాకు చెందిన థాడ్ (THAAD), పాట్రియాట్ మిస్సైల్ డిఫెన్స్ సిస్టమ్స్‌కు వెన్నెముక వంటిది. ఈ రాడార్ అందించే డేటా ఆధారంగానే అమెరికా తన రక్షణ క్షిపణులను ప్రయోగిస్తుంది. తాజా దాడిలో ఇది దెబ్బతినడంతో, గల్ఫ్ ప్రాంతంలో అమెరికా దళాలకు ‘కంటి చూపు’ పోయినట్లయిందని పెంటగాన్ మాజీ సలహాదారు డౌగ్లస్ మెక్‌గ్రేగర్ అభివర్ణించారు. శత్రువు ప్రయోగించే క్షిపణులను ముందే గుర్తించే సామర్థ్యం తగ్గడంతో ఇప్పుడు అమెరికా బలగాలు తీవ్ర ముప్పులో పడ్డాయి.

ఈ పరిణామం యుద్ధ తంత్రాన్ని పూర్తిగా మార్చివేసింది. ఒకవైపు అమెరికా ఖరీదైన క్షిపణులను వాడుతుంటే, ఇరాన్ మాత్రం అత్యంత చౌకైన డ్రోన్లతో శత్రువు యొక్క అత్యంత ఖరీదైన ఆస్తులను లక్ష్యం చేసుకుంటోంది. ప్లానెట్ ల్యాబ్స్ విడుదల చేసిన శాటిలైట్ చిత్రాలు కూడా అమెరికా సైనిక స్థావరానికి జరిగిన నష్టాన్ని ధృవీకరిస్తున్నాయి. ఇరాన్ ప్రయోగించిన షహీద్ డ్రోన్లు అమెరికా రక్షణ వలయాన్ని ఛేదించుకుని వెళ్లి మరీ దాడి చేయడం, పశ్చిమాసియాలో అమెరికా నిఘా వ్యవస్థలోని డొల్లతనాన్ని బయటపెట్టింది. అగ్రరాజ్యానికి ఇది కేవలం ఆర్థిక నష్టమే కాదు, వ్యూహాత్మక ఓటమి కూడా. ఇప్పుడు ఈ భారీ రాడార్ వ్యవస్థను తిరిగి పునరుద్ధరించడం లేదా భర్తీ చేయడం అమెరికాకు అంత సులభమైన పని కాదు.

Follow us