Muchintal: రాష్ట్రపతి రాకకు వేళాయే!

శంషాబాద్‌లోని ముచ్చింతల్‌లో జరుగుతున్న ‘శ్రీరామానుజ సహస్రాబ్ది సమారోహం’ ఉత్సవాలకు నేడు భారత రాష్ట్రపతి రామ్‌నాథ్ కోవింద్ రానున్నారు. ఈ సందర్భంగా  పోలీసులు హైదరాబాద్‌లో శని, ఆదివారాల్లో ట్రాఫిక్‌ హెచ్చరికలు జారీ చేశారు. హైదరాబాద్ నగరం నుంచి పాలమాకుల గ్రామం నుంచి ఆశ్రమ రహదారి వైపు వాహనాలు తమ వాహనాలను స్వర్ణ భారత్ ట్రస్ట్ వెనుక పడమర వైపు పార్కింగ్ వద్ద పార్క్ చేసి సమానత్వం, యాగశాల వద్దకు వెళ్లాలి.

విజయవాడ, నల్గొండ తదితర ప్రాంతాల నుంచి వచ్చే వాహనాలు పెద్ద గోల్కొండ ఎగ్జిట్ 15 వద్ద దిగి సంగిగూడ గ్రామం వద్ద ఆశ్రమ రహదారిలోకి ప్రవేశించి గొల్లూరు గ్రామ సమీపంలోని తూర్పు వైపు పార్కింగ్ వద్ద వాహనాలను నిలిపి యాగశాల, విగ్రహం వద్దకు వెళ్లాలి. NH 44, ORR మధ్య P1 రహదారి (ఆశ్రమ రహదారి) మీదుగా వెళ్లే అన్ని భారీ వాహనాలు శంషాబాద్ వైపు మళ్లించబడతాయి. భారత రాష్ట్రపతి, ఉపరాష్ట్రపతి సందర్శనల సమయంలో భద్రత దృష్ట్యా విగ్రహ ప్రాంగణంలోకి సాధారణ ప్రజల ప్రవేశం సాయంత్రం వేళల్లో పరిమితం చేయబడింది.

మధ్యాహ్నం 3.30 గంటలకు రామ్ నాథ్ కోవింద్ ముచ్చింతల్ కు చేరుకుంటారు. అక్కడ ఏర్పాటు చేసిన 120 కిలోల రామానుజాచార్యుల బంగారు విగ్రహాన్ని ఆవిష్కరించనున్నారు. సాయంత్రం 4 గంటలకు విగ్రహావిష్కరణ కార్యక్రమం ఉంటుంది. అనంతరం చినజీయర్ స్వామితో కలిసి సాయంత్రం 5 గంటల వరకు అక్కడ నిర్వహించే ఉత్సవాల్లో పాల్గొంటారు. అనంతరం రాజ్ భవన్ కు చేరుకుంటారు. ఈ రాత్రికి ఆయన రాజ్ భవన్ లోనే బస చేస్తారు. రేపు ఉదయం 10 గంటలకు ఆయన తిరిగి ఢిల్లీకి బయల్దేరుతారు.