BRS @ 25 Years : కేసీఆర్ ను మళ్లీ సీఎం చేయడమే లక్ష్యం – కేటీఆర్ ధీమా

KTR clarifies on organizations formed in his name

తెలంగాణ రాజకీయ ముఖచిత్రాన్ని మార్చిన భారత్ రాష్ట్ర సమితి (నాడు టీఆర్ఎస్) నేటితో 25 వసంతాలను పూర్తి చేసుకుంది. పార్టీ ఆవిర్భావ దినోత్సవ వేడుకల సందర్భంగా కేటీఆర్ ఉద్వేగభరిత ప్రసంగం చేశారు. 25 ఏళ్ల క్రితం సరిగ్గా ఇదే రోజున కేసీఆర్ తన పదవులన్నింటినీ త్యాగం చేసి, కేవలం తెలంగాణ సాధనే ధ్యేయంగా ‘జలదృశ్యం’ వేదికపై పార్టీని స్థాపించిన తీరును ఆయన గుర్తు చేశారు. నాటి నుంచి 14 ఏళ్ల పాటు ఒక ఉద్యమ పార్టీగా ప్రజలను ఏకం చేసి, ప్రాణాలకు తెగించి పోరాడి స్వరాష్ట్రాన్ని సిద్ధించేలా చేసిన కేసీఆర్ నాయకత్వాన్ని ఈ సందర్భంగా కొనియాడారు.

కేసీఆర్‌ను మళ్లీ ముఖ్యమంత్రి పీఠంపై కూర్చోబెట్టడం

గత పదేళ్లలో తెలంగాణను దేశానికే ఆదర్శంగా నిలిపిన ఘనత కేసీఆర్‌దేనని కేటీఆర్ ధీమా వ్యక్తం చేశారు. రానున్న ఎన్నికల్లో మళ్లీ కేసీఆర్‌ను ముఖ్యమంత్రిని చేయడమే తమ ఏకైక లక్ష్యమని ఆయన స్పష్టం చేశారు. పార్టీ శ్రేణులన్నీ సమరోత్సాహంతో పని చేయాలని, కేసీఆర్ మార్గనిర్దేశనంలో తెలంగాణ ఆత్మగౌరవాన్ని మళ్లీ చాటుతామని పిలుపునిచ్చారు. ప్రస్తుతం రాష్ట్రంలో నెలకొన్న పరిస్థితుల దృష్ట్యా ప్రజలు మళ్లీ బీఆర్ఎస్ వైపు చూస్తున్నారని, త్వరలోనే గులాబీ జెండా తన పూర్వ వైభవాన్ని సంతరించుకుంటుందని ఆయన ధీమా వ్యక్తం చేశారు.

కాంగ్రెస్, బీజేపీలపై పోరాటం

తెలంగాణ ప్రయోజనాలను కాపాడటంలో కాంగ్రెస్, బీజేపీలు విఫలమయ్యాయని కేటీఆర్ విమర్శించారు. ఢిల్లీ పార్టీల నుంచి తెలంగాణను రక్షించుకోవాల్సిన బాధ్యత ప్రాంతీయ పార్టీ అయిన బీఆర్ఎస్‌పైనే ఉందన్నారు. రాష్ట్ర ప్రజల ప్రయోజనాల కోసం అటు అధికార పక్షంపై, ఇటు కేంద్రంపై రాజీలేని పోరాటం చేస్తామని స్పష్టం చేశారు. పథకాల అమలులో వైఫల్యాలను ఎండగడుతూ ప్రజల గొంతుకగా నిలుస్తామని, 25 ఏళ్ల ఈ సుదీర్ఘ ప్రస్థానంలో ఎన్నో ఎత్తుపల్లాలను చూశామని, ఇప్పుడు మళ్లీ ప్రజల అండతో అద్భుత విజయం సాధిస్తామని ధీమా వ్యక్తం చేశారు.

Follow us