Hyderabad: గంజాయి ముఠా గుట్టురట్టు.. రూ.1.80 కోట్ల విలువైన సరుకు స్వాధీనం

గంజాయి నివారణకు ప్రభుత్వం కఠిన చర్యలు తీసుకుంటున్నా.. పోలీసులు దాడులు చేస్తున్నా.. అక్రమ రవాణా సరఫరా మాత్రం ఆగడం లేదు. తాజాగా శంషాబాద్ పోలీస్ స్పెషల్ ఆపరేషన్స్ టీమ్, మియాపూర్ పోలీసులతో కలిసి ఒడిశా-మహారాష్ట్ర మధ్య నిర్వహిస్తున్న మాదకద్రవ్యాల రాకెట్‌ను శుక్రవారం పట్టుకున్నారు. ఆరుగురిని అరెస్టు చేసి రూ.1.80 కోట్ల విలువైన 800 కిలోల గంజాయి, కారు, ట్రక్కును పోలీసులు స్వాధీనం చేసుకున్నారు. మహారాష్ట్ర, ఒడిశాకు చెందిన అశోక్‌ కులే, అమోల్‌ అథవాలే, రాహుల్‌ కుమార్‌ సింగ్‌, విలాష్‌ జగన్నాథ్‌ ఫచోర్‌, ఫిరోజ్‌ మోమిన్‌, సుదమ్‌ ఘోటేకర్‌ అరెస్టయ్యారు. ఇద్దరు నిందితులు వికాస్ జాదవ్, సుభాష్ కుమార్ పరారీలో ఉన్నారు. పోలీసులు తెలిపిన వివరాల ప్రకారం.. ఈజీ మనీ కోసం ఈ ముఠా ఆంధ్రప్రదేశ్‌లోని ఏజెన్సీ ప్రాంతంలోని కోరాపుట్ నుంచి హైదరాబాద్ మీదుగా మహారాష్ట్రకు డ్రగ్స్ ను రవాణా చేస్తోంది. రాహుల్, విలాష్ డ్రైవర్లు అశోక్, అమోల్ సహకారంతో వివిధ ప్రాంతాలకు డ్రగ్స్ రవాణా చేస్తున్నారు.

సుభాష్ ఏజెన్సీ ప్రాంతంలో కూడా గంజాయి సాగు చేయడం ప్రారంభించాడు. వికాస్ సప్లయ్ చేసేవాళ్లతో మాట్లాడి అక్రమ వ్యాపారాన్ని పర్యవేక్షించి, మహారాష్ట్రలోని వినియోగదారులకు కూడా లోడ్ పంపాడు. అశోక్, అమోల్, రాహుల్‌లు విశాఖపట్నం, ఒడిశా ఏజెన్సీ ప్రాంతాల నుంచి మహారాష్ట్రకు మెటీరియల్‌ను రవాణా చేయడంతో పాటు వికాస్ జాదవ్‌కు డ్రగ్‌ను విక్రయించడంలో సహకరించారు. వారం రోజుల క్రితం సుభాష్ వికాస్‌ను సంప్రదించి 800 కిలోల గంజాయిని అమ్ముతానని, కిలో రూ.3 వేలకు కొనుగోలు చేసి ఒక్కో కేజీ రూ.20 వేల నుంచి రూ.30 వేల వరకు విక్రయించాలని భావిస్తున్నట్లు పోలీసులు తెలిపారు. డ్రగ్స్‌ వ్యాపారంపై తెలంగాణ, ఆంధ్రప్రదేశ్‌లో గట్టి నిఘా ఉన్నందున, కోరాపుట్ ఏజెన్సీ ప్రాంతం నుంచి మహారాష్ట్రకు డ్రగ్‌ను రవాణా చేసేందుకు ప్లాన్‌ చేశామని ఓ అధికారికి తెలిపారు.

ఈ ముఠా ఎస్కార్ట్ వాహనంతో హైదరాబాద్ మీదుగా మహారాష్ట్రలోని నాసిక్‌కు బయలుదేరింది. రాష్ట్రంలో వాహనాల తనిఖీ కారణంగా, టోల్ ప్లాజా మార్గాలను అవైడ్ చేయాలని నిర్ణయించుకున్నారు. నగర శివార్లలో పోలీసుల తనిఖీలను నివారించడం ద్వారా హైదరాబాద్ గుండా వెళ్లాలని నిర్ణయించుకున్నట్టు పోలీసుల విచారణలో తేలింది. పక్కా సమాచారం మేరకు మియాపూర్‌ క్రాస్‌రోడ్‌ టోల్‌గేట్‌ వద్ద గంజాయి లోడ్‌తో కూడిన ట్రక్కును అడ్డగించిన పోలీసులు ఒకరి తర్వాత ఒకరు నిందితులను పట్టుకున్నారు. పరారీలో ఉన్న నిందితులను పట్టుకునేందుకు ప్రయత్నాలు కొనసాగుతున్నాయి.