తెలంగాణ మహిళలకు గుడ్‌న్యూస్ తెలిపిన మంత్రి సీతక్క

Telangana Womens

తెలంగాణ లో అధికారంలోకి వచ్చిన దగ్గరి నుండి కాంగ్రెస్ ప్రభుత్వం మహిళలకు పెద్దపీఠం వేస్తూ వస్తున్న సంగతి తెలిసిందే. ఉచిత బస్సు ప్రయాణం , గ్యాస్ సబ్సిడీ తదితర పథకాలు అందజేయగా , తాజాగా మంత్రి సీతక్క మరో గుడ్ న్యూస్ తెలిపారు. రాష్ట్రంలోని మహిళా స్వయం సహాయక సంఘాల (SHGs) పరిధిని విస్తరిస్తూ మంత్రి సీతక్క కీలక ప్రకటన చేశారు. ఇకపై కేవలం మధ్యవయస్కులకే పరిమితం కాకుండా, 15 ఏళ్లు దాటిన బాలికల నుంచి వృద్ధులు, దివ్యాంగుల వరకు అందరికీ ప్రత్యేక సంఘాలను ఏర్పాటు చేయాలని ప్రభుత్వం నిర్ణయించింది. ప్రతి మహిళా ఒక సంఘంలో సభ్యురాలిగా ఉండాలనే లక్ష్యంతో ఈ మార్పులు చేపట్టినట్లు ఆమె తెలిపారు. దీనివల్ల బాలికల్లో పొదుపు అలవాటు పెరగడమే కాకుండా, వృద్ధులకు మరియు దివ్యాంగులకు సామాజిక భద్రతతో పాటు ఆర్థిక భరోసా లభిస్తుంది. ‘ఇందిరా మహిళా శక్తి’ కార్యక్రమం ద్వారా రాష్ట్రంలోని ప్రతి గ్రామంలోనూ మహిళా శక్తిని బలోపేతం చేసేందుకు ప్రభుత్వం ఈ వినూత్న అడుగు వేసింది.

Sithakka Good News

మహిళల ఆర్థికాభివృద్ధికి కేవలం రుణాలకే పరిమితం కాకుండా, వారిని పారిశ్రామికవేత్తలుగా మార్చేందుకు ప్రభుత్వం భారీ ప్రణాళికను రూపొందించింది. స్వయం సహాయక సంఘాలు ముందుకు వస్తే ఆసుపత్రులు, కాలేజీలు, ఆలయాల వంటి రద్దీ ప్రాంతాల్లో ‘ఇందిరా మహిళా శక్తి క్యాంటీన్లు’, పాల బూత్‌లు, కిరాణా షాపులు ఏర్పాటు చేసుకునేందుకు పూర్తి మద్దతు ఇస్తామని మంత్రి హామీ ఇచ్చారు. ముఖ్యంగా యాదగిరిగుట్ట వంటి పుణ్యక్షేత్రాల వద్ద ఈ తరహా దుకాణాల ఏర్పాటుకు జిల్లా కలెక్టర్ల నుంచి ప్రతిపాదనలు కోరుతున్నట్లు ఆమె వివరించారు. ఇదే క్రమంలో ‘బతుకమ్మ చీరల’ పంపిణీపై స్పందిస్తూ, ఉత్పత్తిలో జరిగిన జాప్యం వల్లే పట్టణ ప్రాంతాల్లో పంపిణీకి అంతరాయం కలిగిందని, భవిష్యత్తులో ‘ఇందిరమ్మ చీరల’ను అందరికీ అందజేస్తామని స్పష్టం చేశారు.

సోమవారం నాటి అసెంబ్లీ సమావేశాల్లో మహిళా సంక్షేమంతో పాటు ఇతర కీలక పాలనాపరమైన అంశాలు కూడా చర్చకు వచ్చాయి. తెలంగాణ విశ్వవిద్యాలయాల సవరణ బిల్లు, జీఎస్టీ సవరణ బిల్లు వంటి ముఖ్యమైన బిల్లులను సభ ఆమోదించనుంది. వీటితో పాటు హైదరాబాద్ ఇండస్ట్రియల్ ల్యాండ్స్ ట్రాన్స్‌ఫర్మేషన్ (HILT) విధానంపై జరగనున్న చర్చ రాష్ట్ర పారిశ్రామిక భవిష్యత్తుకు అత్యంత కీలకం కానుంది. వేర్‌హౌసింగ్ కార్పొరేషన్ నివేదికలను సభ ముందు ఉంచడం ద్వారా ప్రభుత్వ పారదర్శకతను చాటుకుంటోంది. మొత్తానికి, నేటి అసెంబ్లీ సమావేశాలు ఒకవైపు గ్రామీణ మహిళల సాధికారతను, మరోవైపు రాష్ట్ర పారిశ్రామిక మరియు విద్యా విధానాల అభివృద్ధిని ప్రతిబింబించేలా సాగాయి.

Follow us