Tomatoes For Free : టమాటా ధర రివర్స్..మొన్న కేజీ రూ.100 , నేడు ఫ్రీ గా ఇచ్చే పరిస్థితి !!

Free Tamata

Farmer Distributed Tomatoes For Free : మార్కెట్ లో టమాటా పరిస్థితి ఎప్పుడు ఎలా ఉంటుందో తెలియదు..ఒక్కోసారి కేజీ రూ.100 వరకు వెళ్తుంది..మరోసారి కేజీ రూ.1 రూపాయి ధర కూడా లేని పరిస్థితి ఏర్పడుతుంది. ప్రస్తుతం మార్కెట్ లో ఇదే కొనసాగుతుంది. తాజాగా మహబూబాబాద్ జిల్లాలో చోటుచేసుకున్న ఘటన టమాటా సాగుదారుల దయనీయ స్థితికి అద్దం పడుతోంది.

సాధారణంగా టమాటా ధరలు ‘సెంచరీ’ కొట్టినప్పుడు సామాన్యులు గగ్గోలు పెడతారు, కానీ అదే ధరలు నేలచూపులు చూసినప్పుడు రైతు పడే వేదన వర్ణనాతీతం. ప్రస్తుతం మార్కెట్‌లో టమాటా ధరలు దారుణంగా పడిపోయాయి. కిలో రెండు రూపాయలు కూడా పలకని స్థితిలో, కనీసం మార్కెట్‌కు తరలించిన రవాణా ఖర్చులు కూడా వచ్చేలా లేవు. అప్పులు చేసి, కష్టపడి పండించిన పంట కళ్లముందే కుళ్లిపోతుంటే చూడలేక, మహబూబాబాద్ జిల్లా కొత్తగూడ వారాంతపు సంతలో రైతులు తమ ఆవేదనను వినూత్నంగా చాటుకున్నారు. అమ్మితే వచ్చే చిల్లర కంటే, ప్రజలకు ఉచితంగా ఇవ్వడమే మేలని భావించి ఒక ట్రాలీ లోడ్ టమాటాలను పంపిణీ చేశారు.

1200 కిలోల టమాటాలు ఉచితం!

గూడూరు మండలం భూపతిపేట గ్రామానికి చెందిన సారయ్య, మోహన్, సురేందర్ అనే రైతులు తాము పండించిన టమాటా పంటను అమ్ముకోవడానికి సంతకు తీసుకువచ్చారు. అయితే, అక్కడ కొనే నాథుడు కరువవ్వడం, అడిగిన వారు కూడా అత్యల్ప ధర పలకడంతో వారు తీవ్ర నిరాశకు లోనయ్యారు. చేతికి అందిన పంటను తిరిగి ఇంటికి తీసుకెళ్లలేక, సుమారు 1200 కిలోల (ఒక ట్రాలీ లోడ్) టమాటాలను ప్రజలకు ఉచితంగా పంచిపెట్టారు.

ప్రభుత్వ ఆదుకోవాలన్న రైతుల విన్నపం

అతివృష్టి, అనావృష్టి వంటి ప్రకృతి వైపరీత్యాలను తట్టుకుని పంట పండిస్తే, తీరా మార్కెట్‌కు వచ్చాక గిట్టుబాటు ధర లేకపోవడం రైతులను కుంగదీస్తోంది. మందులు, ఎరువులు మరియు కూలీల ఖర్చులు కూడా రాకపోవడంతో వ్యవసాయం దండగ అనే పరిస్థితి వస్తోందని రైతులు ఆవేదన వ్యక్తం చేస్తున్నారు. ప్రభుత్వం వెంటనే స్పందించి, టమాటా వంటి నిత్యావసర పంటలకు కనీస మద్దతు ధర (MSP) కల్పించాలని, అలాగే కోల్డ్ స్టోరేజ్ సౌకర్యాలను పెంచాలని వారు డిమాండ్ చేస్తున్నారు. లేనిపక్షంలో అన్నదాతలు వ్యవసాయానికి దూరమయ్యే ప్రమాదం ఉందని వ్యవసాయ రంగ నిపుణులు హెచ్చరిస్తున్నారు.

Follow us