India Hockey: ఫైనల్లో భారత పురుషుల హాకీ జట్టు

కామన్ వెల్త్ గేమ్స్ లో భారత్ హాకీ టీమ్ పతకానికి అడుగు దూరంలో నిలిచింది. తన సూపర్ ఫామ్ కొనసాగిస్తూ ఫైనల్ కు దూసుకెళ్లింది. దక్షిణాఫ్రికాతో జరిగిన ఉత్కంఠభరిత సెమీఫైనల్లో 3-2 తేడాతో గెలిచింది. తొలి క్వార్టర్‌లో ఇరుజట్లు గోల్‌ చేయలేకపోయాయి. అయితే రెండో క్వార్టర్‌ ఆరంభంలోనే అభిషేక్‌ గోల్‌ కొట్టడంతో భారత్‌ ఖాతా తెరిచింది. ఆ తర్వాత మణిదీప్‌ సింగ్‌ మరో గోల్‌ మెరవడంతో భారత్ 2-0తో ఆధిక్యంలో వెళ్లింది. అయితే మూడో క్వార్టర్ నుంచీ సౌతాఫ్రికా పుంజుకుంది.

రెయాన్‌ జూలిస్‌ గోల్‌ కొట్టడంతో భారత్‌ ఆధిక్యం 2-1కి తగ్గింది. నాలుగో క్వార్టర్‌ మొదలైన రెండో నిమిషంలోనే డ్రాగ్‌ ఫ్లికర్‌ జుగ్‌రాజ్‌ గోల్‌ కొట్టడంతో భారత్‌ 3-1తో ఆధిక్యంలోకి వెళ్లింది. అయితే సౌతాఫ్రికా రెండో గోల్‌ కొట్టడంతో చివర్లో కాస్త ఉ‍త్కంఠ నెలకొంది. ఈ దశలో భారత్‌ డిఫెన్స్ శ్రేణి ప్రత్యర్థిని గోల్స్‌ చేయకుండా అడ్డుకోవడంలో సక్సెస్ అయింది.
ఫైనల్‌లో భారత్‌, ఆస్ట్రేలియాతో తలపడనుంది. ఉత్కంఠగా సాగిన మరో సెమీస్ లో ఆస్ట్రేలియా 3-2 గోల్స్ తేడాతో ఇంగ్లాండ్ పై విజయం సాధించింది. ఆస్ట్రేలియా హాకీ టీమ్ ఏడోసారి ఫైనల్ కీ చేరింది. ప్రస్తుతం వరల్డ్ ర్యాంకింగ్స్ లో అగ్రస్థానంలో ఉన్న కంగరూలను ఓడించడం అంతా ఈజీ కాదు.