HCU భూముల విషయంలో పార్టీల ప్రచారాన్ని విద్యార్థులు నమ్మొద్దు – భట్టి

Bhatti Hcu

హైదరాబాద్ సెంట్రల్ యూనివర్సిటీ భూముల వివాదంపై రాష్ట్ర ఉప ముఖ్యమంత్రి భట్టి విక్రమార్క స్పష్టమైన వివరణ ఇచ్చారు. కంచ గచ్చిబౌలిలోని సర్వే నెంబర్ 25లో ఉన్న 400 ఎకరాల భూమి, హైదరాబాద్ సెంట్రల్ యూనివర్సిటీకి చెందినది కాదని, అది ప్రైవేట్ వ్యక్తి చేతుల్లోకి వెళ్లి అన్యాయంగా ఆక్రమణకు గురైందని తెలిపారు. గత పాలకులు దీనిపై నిర్లక్ష్యంగా వ్యవహరించారని, ప్రస్తుతం ప్రజా ప్రభుత్వం న్యాయపోరాటం ద్వారా ఈ భూమిని తిరిగి ప్రభుత్వానికి తీసుకువచ్చిందని భట్టి విక్రమార్క వివరించారు. ప్రజల హితాన్ని దృష్టిలో ఉంచుకుని ఈ భూమిని టీజీఐఐసీ (Telangana State Industrial Infrastructure Corporation)కి అప్పగించడం ద్వారా ప్రభుత్వ ఆదాయ వృద్ధికి, అభివృద్ధికి ఉపయోగపడేలా చర్యలు తీసుకుంటున్నామని ఆయన తెలిపారు.

విపక్షాల విమర్శలపై భట్టి సమాధానం

ఈ భూమి గురించి కొన్ని రాజకీయ పార్టీలు, వారి అనుబంధ మీడియా సంస్థలు తప్పుడు ప్రచారం చేస్తున్నాయని భట్టి విక్రమార్క ఆరోపించారు. ప్రైవేట్ వ్యక్తి చేతుల్లో ఉండగా నోరు విప్పని వారు, ఇప్పుడు భూమిని ప్రభుత్వ ఆధీనంలోకి తీసుకువచ్చిన తర్వాత విమర్శలు చేయడం విడ్డూరంగా ఉందన్నారు. రాష్ట్రం అభివృద్ధి చెందాలనే లక్ష్యంతో, కొత్త పరిశ్రమలు రావడానికి, యువతకు ఉద్యోగాలు కల్పించడానికి ప్రభుత్వం ఈ భూమిని పారిశ్రామిక వృద్ధికి వినియోగించాలనుకుంటోందని ఆయన తెలిపారు.

హైదరాబాద్ అభివృద్ధిలో ప్రభుత్వం కృషి

హైదరాబాద్ మహానగరం అభివృద్ధి చెందడానికి ఇదొక ముఖ్యమైన నిర్ణయమని, గతంలో కాంగ్రెస్ ప్రభుత్వం హైటెక్ సిటీ అభివృద్ధికి చేసిన కృషితోనే ఐటీ రంగం విస్తరించిందని, ఇప్పుడు అదే విధంగా కొత్త పారిశ్రామిక అభివృద్ధికి ప్రభుత్వం చర్యలు తీసుకుంటోందని భట్టి విక్రమార్క స్పష్టం చేశారు. ఈ భూమిని ఉపయోగిస్తూ పర్యావరణ సమతుల్యతను కాపాడేందుకు ప్రత్యేక చర్యలు తీసుకుంటున్నట్లు తెలిపారు. ప్రజల ఆస్తిని ప్రజలకే ఉపయోగపడేలా పరిరక్షించడమే ప్రభుత్వ లక్ష్యమని స్పష్టం చేశారు.

HCU Land Issue : ప్రకాష్ రాజ్ రియాక్షన్

Follow us