Gaganyaan Mission : ఇవాళ ‘గగన్‌యాన్’ టెస్ట్ ఫ్లైట్.. ఏమిటి ? ఎలా ?

Gaganyaan Mission : ఇవాళ  గగన్‌యాన్ మొట్టమొదటి టెస్ట్ ఫ్లైట్ జరగబోతోంది. వాస్తవానికి ఇది 8 గంటలకే జరగాల్సి ఉంది. కానీ ‘టెస్ట్‌ వెహికిల్‌ అబార్ట్‌ మిషన్‌’ (టీవీ-డీ1)  రాకెట్‌లో సాంకేతిక లోపం తలెత్తడంతో కౌంట్ డౌన్‌ టైంను పొడిగించారు. ఈ ప్రయోగంపై స్వయంగా ఇస్రో చైర్మన్ డాక్టర్ సోమనాథ్ శ్రీహరికోటలో శాస్త్రవేత్తలతో నిరంతరం సమీక్షిస్తున్నారు. ఆంధ్రప్రదేశ్‌లోని శ్రీహరికోట మొదటి లాంచ్ ప్యాడ్ నుంచి ఈ ప్రయోగం జరగనుంది.అంతరిక్షంలోకి వ్యోమగాముల్ని పంపేందుకు భారత్‌ చేపడుతున్న గగన్‌యాన్‌లో తొలి అడుగు ఇదే. ‘టెస్ట్‌ వెహికిల్‌ అబార్ట్‌ మిషన్‌’ (టీవీ-డీ1) అనే ఈ పరీక్ష ద్వారా వ్యోమగాముల భద్రతకు సంబంధించిన వ్యవస్థ ఎంతమేరకు సమర్ధంగా ఉంది అనేది టెస్ట్ చేస్తున్నారు. గగన్‌యాన్‌లో భాగంగా వ్యోమగాములను అంతరిక్షంలోకి పంపేముందు ఇస్రో దాదాపు 20 విభిన్న పరీక్షలు నిర్వహించనుంది. వాటిలో మొదటిదే..‘‘ టెస్ట్‌ వెహికిల్‌ అబార్ట్‌ మిషన్‌(టీవీ-డీ1)’.  ఇందులో భాగంగా క్రూ మాడ్యూల్‌ను టీవీ-డీ1 రాకెట్‌తో ప్రయోగించనున్నారు.ఆ తర్వాత బంగాళాఖాతంలో పారాచూట్ల సాయంతో ల్యాండయ్యే క్రూ మాడ్యూల్‌ను తిరిగి సురక్షితంగా ఒడ్డుకు తీసుకొస్తారు. ఈ ప్రయోగం మొత్తం సుమారు పది నిమిషాల్లో పూర్తవుతుంది.

ప్రయోగం ఇలా జరుగుతుంది..

• టీవీ–డీ1 రాకెట్ ను 17 కిలోమీటర్లు ఎత్తుకు తీసుకెళ్లి .. దాని ఎగువ కొన భాగంలో అమర్చిన ‘క్రూమాడ్యూల్‌ ఎస్కేప్‌ సిస్టం’ను మళ్లీ కిందకు తీసుకొచ్చే ప్రక్రియను చేపట్టడమే ఈ ప్రయోగం ముఖ్య ఉద్దేశం.
• ఈ ప్రయోగంలో రాకెట్ సెకనుకు 400 మీటర్ల వేగంతో దూసుకెళుతుంది. అది నింగిలోకి బయల్దేరాక, అకస్మాత్తుగా వెనక్కి వచ్చే సిగ్నల్స్ ను దానికి ఇస్తారు. దీన్నే ‘అబార్ట్‌’ మెసేజ్ అంటారు.
• అబార్ట్ మెసేజ్ అందిన వెంటనే రాకెట్‌ శిఖరభాగంలో అమర్చిన ‘క్రూమాడ్యూల్‌ ఎస్కేప్‌ సిస్టం’  విడిపోతుంది.  భూమికి 17 కిలోమీటర్ల ఎత్తులో రాకెట్ ఉండగా ఇది జరుగుతుంది.
• విడిగా జర్నీ ప్రారంభించే ‘క్రూమాడ్యూల్‌ ఎస్కేప్‌ సిస్టం’ .. దానిలోని 10 ప్యారాచూట్ల సాయంతో శ్రీహరికోట రాకెట్‌ కేంద్రానికి సుమారు 10 కిలోమీటర్ల దూరంలో ఉన్న  బంగాళాఖాతంలో ల్యాండ్ అవుతుంది.
• బంగాళాఖాతంలో అప్పటికే సిద్ధంగా ఉండే కోస్టల్‌ నేవీ సిబ్బంది ఒక ప్రత్యేక బోట్‌లో వెళ్లి క్రూమాడ్యూల్‌ ను సురక్షితంగా రికవర్ చేస్తారు. 531.8 సెకన్లలో ఈ ప్రయోగాన్ని పూర్తి చేస్తారు.

We’re now on WhatsApp. Click to Join.