Cluster Bombs Explained : క్లస్టర్ బాంబులపై దుమారం.. ఎందుకు ? ఏమిటవి ?

క్లస్టర్ బాంబు అనేది ఒక రకమైన ఆయుధం.  ఇది అనేక చిన్న బాంబుల యొక్క పెద్ద రూపం. దీన్ని రాకెట్లు, క్షిపణులు, ఫిరంగుల ద్వారా ప్రయోగిస్తారు. ఒక క్లస్టర్ బాంబును గాల్లోకి వదలగానే.. పేలే ముందు దాని దిగువ భాగం ఓపెన్ అయిపోయి .. అందులో నుంచి చిన్న బాంబులు కింద పడతాయి. ఫలితంగా ఒక క్లస్టర్ బాంబు అనేది ఏకకాలంలో చాలా ప్రాంతాల్లో పేలుళ్లు సృష్టించగలదు. భారీ సంఖ్యలో ఒక్కసారిగా క్లస్టర్ బాంబులను వదిలితే తీవ్ర నష్టం వాటిల్లుతుంది.

ఉక్రెయిన్ దళాల దగ్గర మందుగుండు సామాగ్రి చాలా తక్కువగా ఉంది. ఈనేపథ్యంలో రష్యా ఆర్మీని కట్టడి చేసేందుకు క్లస్టర్ ఆయుధాలను అమెరికా నుంచి ఉక్రెయిన్ తీసుకుంటోంది. చాలామంది డెమొక్రాట్లు, మానవ హక్కుల కార్యకర్తలు ఈ ప్రతిపాదనను వ్యతిరేకించారు. వీటన్నింటి నడుమ కనీసం ఆరు నెలల  చర్చ తర్వాత క్లస్టర్ బాంబులను ఉక్రెయిన్ కు ఇవ్వడంపై అమెరికా నిర్ణయం తీసుకుంది.

మానవ, పర్యావరణ, నైతిక దుష్ప్రభావాల కారణంగా ప్రపంచవ్యాప్తంగా క్లస్టర్ బాంబ్‌ను నిషేధించే ప్రయత్నం జరిగింది. క్లస్టర్ బాంబులో అనేక చిన్న బాంబులు ఉంటాయి. ఇవి రాకెట్ లేదా వార్‌హెడ్ నుంచి విడుదల చేయబడతాయి. ఈ బాంబులు ఎత్తు నుంచి పడినప్పుడు, చిన్న బాంబులు వాటి నుంచి బయటకు వచ్చి పెద్ద ప్రాంతాన్ని ప్రభావితం చేస్తాయి.ఈ బాంబు వల్ల పిల్లలు ప్రత్యేకంగా గాయపడే ప్రమాదం ఉంది. ఎందుకంటే ఈ బాంబు చిన్న బొమ్మను పోలి ఉంటుంది.  పిల్లలు ఉత్సుకతతో.. దాన్ని బొమ్మ అనుకొని పట్టుకునే ముప్పు ఉంటుంది. UK, ఫ్రాన్స్, జర్మనీతో సహా 100 కంటే ఎక్కువ దేశాలు క్లస్టర్ బాంబుల వినియోగం లేదా నిల్వలను నిషేధించే అంతర్జాతీయ ఒప్పందంపై సంతకం చేశాయి.