TVK విజయ్ ఆ ట్రాప్లో మునిగిపోయాడా? ఇది ఆయన రాజకీయ భవిష్యత్ కు ప్రమాదమా ?
తమిళ ఓటర్లు సినిమాను, రాజకీయాన్ని వేర్వేరుగా చూడటంలో చాలా స్పష్టతతో ఉంటారు. కుల సమీకరణాలు, ద్రావిడ సిద్ధాంతాలు, సంక్షేమ పథకాలు బలంగా పనిచేసే తమిళనాట కేవలం సినిమా డైలాగులు మార్పు తీసుకురాలేవు
- Author : Sudheer
Date : 02-02-2026 - 12:10 IST
Published By : Hashtagu Telugu Desk
Tamil Nadu Voters : సినిమా గ్లామర్ చూసి రాజకీయాల్లోకి వచ్చే నటులకు ఎప్పుడూ ఒక రకమైన ‘జన సమ్మోహన ట్రాప్’ పొంచి ఉంటుంది. ప్రస్తుతం విజయ్ కూడా అదే పరిస్థితిని ఎదుర్కొంటున్నట్లు విశ్లేషకులు భావిస్తున్నారు. తన సభలకు పోటెత్తుతున్న లక్షలాది మంది యువతను, అభిమానులను చూసి వారంతా తన ఓటు బ్యాంక్ అని భావించడం ఒక రాజకీయ భ్రమ కావచ్చు. తమిళనాడు చరిత్రను పరిశీలిస్తే శివాజీ గణేశన్ నుంచి కమల్ హాసన్ వరకు ఎందరో దిగ్గజ నటులకు జనం బ్రహ్మరథం పట్టారు కానీ, పోలింగ్ బూత్ దగ్గరకు వచ్చేసరికి ఆ ఆదరణ ఓట్లుగా మారలేదు. క్షేత్రస్థాయిలో బలమైన పార్టీ నిర్మాణం, బూత్ లెవల్ ఏజెంట్లు లేకపోతే, కేవలం సినిమా క్రేజ్తో ఎన్నికల్లో గెలవడం అసాధ్యమనే వాస్తవాన్ని విజయ్ గుర్తించాల్సి ఉంది.
విజయ్ తన ప్రసంగాల్లో ఎంజీఆర్ (MGR), జయలలితలను ఆదర్శంగా తీసుకుంటానని చెబుతున్నప్పటికీ, వారి విజయాల వెనుక ఉన్న రాజకీయ నేపథ్యం వేరు. ఎంజీఆర్ సొంత పార్టీ పెట్టకముందే దశాబ్దాల పాటు డీఎంకేలో ఉండి క్షేత్రస్థాయి రాజకీయాలపై పట్టు సాధించారు. జయలలితకు అప్పటికే సిద్ధంగా ఉన్న పార్టీ కేడర్ అండగా ఉంది. కానీ విజయ్ ఇప్పుడు శూన్యం నుండి పార్టీని నిర్మిస్తున్నారు. ఇప్పటికే ఎంజీఆర్, జయలలిత వారసత్వాన్ని మోస్తున్న అన్నాడీఎంకే (AIADMK) వంటి బలమైన పార్టీ క్షేత్రస్థాయిలో పాతుకుపోయి ఉంది. ఇటువంటి స్థితిలో కేవలం గ్లామర్ మీద ఆధారపడి ఆ ఓటు బ్యాంకును తనవైపు తిప్పుకోవడం విజయ్కు హిమాలయ పర్వతాన్ని ఎక్కడం వంటి సవాలే.
Tvk Vijay Rally In Karur Tr
తమిళ ఓటర్లు సినిమాను, రాజకీయాన్ని వేర్వేరుగా చూడటంలో చాలా స్పష్టతతో ఉంటారు. కుల సమీకరణాలు, ద్రావిడ సిద్ధాంతాలు, సంక్షేమ పథకాలు బలంగా పనిచేసే తమిళనాట కేవలం సినిమా డైలాగులు మార్పు తీసుకురాలేవు. విజయ్ తన సభలకు వచ్చే ‘ఫ్యాన్స్ గ్యాలరీ’ని చూసి మురిసిపోకుండా, తటస్థ ఓటర్లను (Neutral Voters) ఎలా ఆకర్షించాలనే దానిపై దృష్టి పెట్టాలి. కేవలం 15 శాతం ఓట్లకే పరిమితమైతే ఆయన ‘కింగ్ మేకర్’ కూడా కాలేని పరిస్థితి ఏర్పడుతుంది. రాజకీయాల్లో వ్యూహాలు ఫలించకపోతే కనుమరుగైపోయే ప్రమాదం ఉంటుంది కాబట్టి, విజయ్ వాస్తవిక పరిస్థితులను బేరీజు వేసుకుని అడుగులు వేయాల్సిన సమయం ఇది.
Follow us
