TVK : ఫ్యాన్స్ షాక్.. దళపతి విజయ్పై కేసు నమోదు..

Hero Vijay

TVK : తమిళ సినీ హీరో, తమిళిగ వెట్రి కళగం (TVK) పార్టీ అధినేత దళపతి విజయ్ ఇబ్బందుల్లో చిక్కుకున్నారు. మదురైలో జరిగిన పార్టీ మహాసభలో జరిగిన ఒక ఘటనపై ఆయనతో పాటు బౌన్సర్లపై పోలీసులు కేసు నమోదు చేశారు. పోలీసుల సమాచారం ప్రకారం.. పెరంబలూరు జిల్లా, పెరియమ్మాపాళయం గ్రామానికి చెందిన శరత్‌కుమార్ అనే అభిమాని ఈ ఫిర్యాదు చేశారు. ఆయన ఆరోపణల ప్రకారం, మహాసభ సందర్భంగా విజయ్‌ను కలిసేందుకు ప్రయత్నించగా, బౌన్సర్లు అడ్డుకున్నారు. ఈ సమయంలో తనపై దాడి జరిగిందని, బలవంతంగా కిందికి తోసివేశారని ఆయన తెలిపారు. మధురైలో జరిగిన TVK పార్టీ రెండో వార్షిక మహాసభ కోసం ప్రత్యేక ఏర్పాట్లు చేశారు. అభిమానులు పెద్ద ఎత్తున తరలి రావడంతో వేదిక వద్ద భారీ ర్యాంప్ నిర్మించారు. దళపతి విజయ్ ర్యాంప్‌పైకి ఎక్కి అభిమానులకు అభివాదం చేస్తూ చేతులు ఊపారు. అదే సమయంలో కొంతమంది అభిమానులు ఆయనను దగ్గరగా చూసేందుకు ర్యాంప్‌పైకి ఎక్కారు. దీంతో అక్కడ కొద్దిసేపు గందరగోళం నెలకొంది.

Jammu Kashmir : వైష్ణో దేవి ఆలయ మార్గంలో విరిగిపడిన కొండచరియలు..30కి చేరిన మృతులు

భద్రతా సిబ్బంది, బౌన్సర్లు వెంటనే వారిని అడ్డుకున్నారు. ఈ క్రమంలో శరత్‌కుమార్‌ను పట్టుకొని బలంగా కిందికి తోసివేశారు. ఆయన ప్రకారం, తాను ఎలాంటి తప్పు చేయలేదని, కేవలం తన అభిమాన హీరోను దగ్గరగా చూసుకోవడానికే ప్రయత్నించానని పేర్కొన్నారు. ఈ ఘటనకు సంబంధించిన వీడియోలు సోషల్ మీడియాలో విస్తృతంగా ప్రచారంలోకి వచ్చాయి. వీడియోల్లో బౌన్సర్లు అభిమానులను బలవంతంగా ర్యాంప్ నుంచి కిందికి తోసివేస్తున్న దృశ్యాలు స్పష్టంగా కనిపించాయి. దీనిపై నెటిజన్లు తీవ్రంగా స్పందించారు. “అభిమానులను ఇంతలా అవమానించటం తగదా?”, “విజయ్ బౌన్సర్ల ప్రవర్తన చాలా దారుణం” అంటూ విమర్శలు వెల్లువెత్తాయి.

శరత్‌కుమార్‌తో పాటు ఆయన తల్లి సంతోషం కూడా ఈ ఘటనపై ఫిర్యాదు చేశారు. ఫిర్యాదును స్వీకరించిన మదురై జిల్లా అదనపు ఎస్పీ బాలమురుగన్ దర్యాప్తు చేపట్టారు. అనంతరం విజయ్‌తో పాటు ఆయన భద్రతా సిబ్బందిలో పది మందిపై పలు సెక్షన్ల కింద కేసు నమోదు చేసినట్లు పోలీసులు ధృవీకరించారు. సినీ నటుడు నుంచి రాజకీయ నేతగా మారిన దళపతి విజయ్ ప్రతి కార్యక్రమంలో అభిమానులు అధిక సంఖ్యలో తరలివస్తున్నారు. అయితే ఈ తరహా ఘటనలు TVK పార్టీకి ప్రతిష్టంభన కలిగించే అవకాశం ఉందని విశ్లేషకులు భావిస్తున్నారు. అభిమానుల పట్ల సానుభూతి చూపాల్సిన సమయంలో బౌన్సర్లు దురుసుగా ప్రవర్తించడంపై పార్టీకి వ్యతిరేకంగా ప్రతికూల వాతావరణం ఏర్పడే అవకాశం ఉందని రాజకీయ వర్గాలు అంటున్నాయి.

Trump Extra Tariff: ఏఏ భార‌త్‌ వస్తువులపై అమెరికా అద‌న‌పు సుంకం మినహాయింపు ఉంది?

Follow us