holi festival: హోలీ సెలబ్రేట్ చేసుకుందాం ఇలా..!
హోలీ అంటేనే రంగుల సంబురం.. పిల్లల నుంచి పెద్దల వరకు ఆసక్తిగా ఎదురుచూసే పండుగల్లో ఇదొకటి. అయితే కరోనా కారణంగా గత రెండేళ్లుగా ఈ పండగను గ్రాండ్ గా సెలబ్రేట్ చేసుకోలేని పరిస్థితి.
- Author : Balu J
Date : 17-03-2022 - 3:33 IST
Published By : Hashtagu Telugu Desk
హోలీ అంటేనే రంగుల సంబురం.. పిల్లల నుంచి పెద్దల వరకు ఆసక్తిగా ఎదురుచూసే పండుగల్లో ఇదొకటి. అయితే కరోనా కారణంగా గత రెండేళ్లుగా ఈ పండగను గ్రాండ్ గా సెలబ్రేట్ చేసుకోలేని పరిస్థితి. అందుకే ఈ సారి పండుగను జరుపుకునేందుకు ప్రతిఒక్కరూ ఉత్సాహం చూపుతున్నారు. అయితే ఏ పండుగకైనా ఇంటి పెద్దలు లేకుంటే అసంపూర్ణంగా అనిపిస్తుంది. అయినా కరోనా మహమ్మారి పూర్తిగా పోలేదనే విషయం గుర్తుంచుకోవాలి. ఇలాంటి పరిస్థితుల్లో పిల్లల, పెద్దల పట్ల జాగ్రత్తగా వ్యవహరించాలి. అలాంటివాళ్ల కోసం కొన్ని టిప్స్ ఫాలో కావాల్సిందే!
కొవిడ్ కారణంగా స్నేహితుల బృందంతో కలిసి ఆరుబయట హోలీని జరుపుకునే బదులు కుటుంబ సభ్యులతో కలిసి ఇంట్లో హోలీని జరుపుకోవడం మంచిది. హోలీ అంటేనే ఒకరిపై ఒకరు రంగులు చల్లుకోవడం, రుద్దడం లాంటివి ఉంటాయి. కాబట్టి కచ్చితంగా సోషల్ డిస్టెన్స్ పాటించేలా జాగ్రత్తలు తీసుకోవడం మంచిది. ఈ స్పీడ్ యుగంలో పిల్లలు ఒకచోట, పెద్దలు మరోచోట ఉండాల్సిన పరిస్థితులున్నాయి. అలాంటి వర్చువల్ హోలీని జరుపుకోవచ్చు. స్నేహితులు, పెద్ద కుటుంబ సభ్యులతో వీడియో కాల్ చేసి హోలీని జరుపుకోవడానికి ప్రయత్నించవచ్చు. ఇంట్లో పెద్దలవాళ్లు ఉంటే కచ్చితంగా జాగ్రత్తలు తీసుకోవాలి. రంగులు చల్లుకునే క్రమంలో పెద్దవాళ్లు ఇబ్బందులకు గురయ్యే అవకాశం ఉంటుంది. అందువల్ల, హోలీ రోజున, ఇంట్లో ఆహ్లాదకరమైన వాతావరణాన్ని సృష్టించడానికి ప్రయత్నించండి. తద్వారా పెద్దలు పండును పూర్తిగా ఆస్వాదించవచ్చు.
గోళ్లు పెద్దగా ఉంటే వాటిని కత్తిరించుకుని నెయిల్ పాలిష్ చేసుకోవాలి. చేతులు, కాళ్లకు చక్కగా మాయిశ్చరైజర్ రాయండి. దీంతో చర్మం తేమగా ఉండటంతోపాటు రంగులను వదిలించుకోవడానికి ఎక్కువ శ్రమపడాల్సిన పనీ ఉండదు. రసాయనాలతో కూడిన రంగులు మార్కెట్లలో లభ్యమౌతున్నాయి. ఈ రంగులతో జాగ్రత్తగా ఉండాలని వైద్యులు సూచిస్తున్నారు. కెమికల్స్ కలర్స్ వాడటం వల్ల చర్మ సంబంధ వ్యాధులు తలెత్తే అవకాశాలున్నాయి. కళ్లలో పడితే కంటి చూపు పోయే ప్రమాదం ఉందని, సహజ రంగులతో పండుగను నిర్వహించుకోవాలని సూచిస్తున్నారు.
