Air India: ఎయిర్ ఇండియా కోసం రూ. 15 వేల కోట్ల రుణం..!

మసకబారిన ఎయిర్‌ ఇండియాకు పూర్వవైభవం తెచ్చేందుకు టాటా గ్రూప్ ప్రణాళికలు సిద్ధం చేస్తోంది. ఆ విమానయాన సంస్థ పునరుద్ధరణ కోసం రూ 15,000 కోట్ల వర్కింగ్‌ క్యాపిటల్‌ రుణాల కోసం బ్యాంకులతో టాటా గ్రూప్‌ సంప్రదింపులు చేపట్టింది. దానిని ప్రతిష్ఠాత్మక సంస్ధగా తీర్చిదిద్దుతామని టాటా సన్స్‌ చీఫ్‌ ఎన్‌ చంద్రశేఖరన్‌ చేసిన ప్రకటనను సాకారం చేసే దిశగా కార్యాచరణకు కంపెనీ కసరత్తు సాగిస్తోంది.

టాటా గ్రూప్ గత సంవత్సరం ప్రభుత్వం నుండి కొనుగోలు చేసిన ఎయిర్‌లైన్స్ ఎయిర్ ఇండియా కోసం సుమారు రూ. 15,000 కోట్ల వర్కింగ్ క్యాపిటల్ లోన్‌లను పొందేందుకు బ్యాంకులతో చర్చలు జరుపుతోంది. ఎయిర్‌ ఇండియా పునరుద్ధరించడానికి సాహసోపేతమైన ప్రయత్నం చేస్తోంది. ఈ విషయంపై అవగాహన ఉన్న ఓ వ్యక్తి తెలిపిన వివరాల ప్రకారం.. ఈ నిధులు రోజువారీ విమాన కార్యకలాపాలు, నష్టాలను పూడ్చడానికి, విమానాల పునరుద్ధరణకు, విమానాల అద్దెలకు చెల్లించడానికి, IT వ్యవస్థలను సరిచేయడానికి ఉపయోగించబడతాయని తెలిపారు.

గత సంవత్సరం.. స్టేట్ బ్యాంక్ ఆఫ్ ఇండియా (SBI), హెచ్‌డిఎఫ్‌సి బ్యాంక్, బ్యాంక్ ఆఫ్ బరోడా బ్యాంకులు టాటా సన్స్ కంపెనీ టాలేస్‌కు 4.25 శాతం చొప్పున రూ. 23,000 కోట్ల రేటెడ్ అన్‌సెక్యూర్డ్ రుణాన్ని అందించాయి. జనవరి చివరి నాటికి ఈ రుణం పునరుద్ధరణకు గడువు ఉంది. ఓ బ్యాంకు అధికారి తెలిపిన వివరాల ప్రకారం.. వడ్డీ రేట్లు పెరగడం, సిస్టమ్‌లో లిక్విడిటీ లేకపోవడం వల్ల రుణ ఖర్చులు పెరుగుతాయని, రిజర్వ్ బ్యాంక్ ఆఫ్ ఇండియా వెబ్‌సైట్ 364 రోజుల ట్రెజరీ బిల్లులకు 6.91 శాతం కటాఫ్‌గా పేర్కొందని తెలిపారు. ప్రస్తుతం వడ్డీ రేట్లు భారీగా పెరగడంతో 7.5 శాతం నుంచి 8 శాతం మధ్యలో వడ్డీ రేటుకి రుణాలను తీసుకోవాలని టాటా గ్రూప్ చూస్తోంది. టాటా సన్స్ టాలేస్ ద్వారా గత ఏడాది అక్టోబర్‌లో ఎయిర్ ఇండియాను రూ.18,000 కోట్లకు కొనుగోలు చేసే బిడ్‌ను గెలుచుకుంది. ఆగస్ట్ 1953లో ప్రభుత్వం విమానయాన సంస్థను జాతీయం చేసిన సుమారు 69 సంవత్సరాల తర్వాత ఎయిర్ ఇండియా ప్రైవేటీకరణ జరిగింది.