Mosque Surveys : మసీదుల సర్వేకు ఆదేశాలివ్వొద్దు.. కోర్టులకు సుప్రీంకోర్టు కీలక ఆదేశాలు

1947 ఆగస్టు 15 నాటికి దేశంలో ఉన్న ప్రార్థనా స్థలాల ఉనికిని ఎవరూ సవాల్ చేయకూడదని ‘ప్రార్ధనా స్థలాల చట్టం -1991’ చెబుతోంది. అయితే ఈ చట్టం వల్ల హిందువులు, జైనులు, బౌద్ధులు, సిక్కులు ప్రాచీన ప్రార్థనా స్థలాలను తిరిగి సాధించుకునే హక్కుకు భంగం కలుగుతుందని పిటిషనర్లు ఆరోపించారు. ప్రస్తుతం తాము ‘ప్రార్ధనా స్థలాల చట్టం -1991’లోని లక్ష్యాలు, ఉద్దేశాలపై నిశిత పరిశీలన చేస్తున్నట్లు సుప్రీంకోర్టు బెంచ్ వెల్లడించింది. హిందూ ఆలయాలపై నిర్మించారనే అభియోగాలతో మసీదులను సర్వే చేయాలంటూ గతంలో దాఖలైన పిటిషన్లు, ఇకపై దాఖలయ్యే పిటిషన్ల విషయంలో నిగ్రహం పాటించాలని కోర్టులను దేశ సర్వోన్నత న్యాయస్థానం సూచించింది. ఈ తరహా పిటిషన్లపై తొందరపాటు వైఖరితో ఎలాంటి ఆదేశాలనూ ఇవ్వకూడదని పేర్కొంది. ఈ పిటిషన్ల ఆధారంగా మసీదుల సర్వేలకు కానీ, ఇతరత్రా చర్యలకు కానీ ఆర్డర్స్ జారీ చేయొద్దని కోర్టులకు సుప్రీంకోర్టు తెలిపింది. ఈ అంశంపై నాలుగు వారాల్లోగా స్పందన తెలియజేయాలని కేంద్ర సర్కారుకు నిర్దేశించింది. కేంద్రం స్పందనను తెలియజేసిన నాలుగు వారాల్లోగా ముస్లిం సంస్థలు సహా ఇతర పక్షాలు స్పందనలను సమర్పించాలని సుప్రీంకోర్టు కోరింది.

Also Read :Mark Zuckerberg : ట్రంప్‌కు రూ.8వేల కోట్లు ఇచ్చుకున్న ఫేస్‌బుక్ అధినేత.. ఎందుకు ?