Tiktok : భారత్లోకి మళ్లీ టిక్క్.. కేంద్రం క్లారిటీ

Tiktok

సోషల్ మీడియాలో తాజాగా ఒక వార్త తీవ్ర చర్చనీయాంశంగా మారింది. అదే టిక్‌టాక్ తిరిగి భారతదేశంలో అందుబాటులోకి వచ్చిందనే ప్రచారం. యువతలో ఎంతో ఆదరణ పొందిన టిక్‌టాక్‌(Tiktok )పై ప్రభుత్వం నిషేధం విధించిన విషయం తెలిసిందే. అయితే, ఈ మధ్య కాలంలో భారత్-చైనా దేశాల మధ్య సంబంధాలు కొంత మెరుగుపడిన నేపథ్యంలో టిక్‌టాక్‌పై నిషేధం ఎత్తివేయవచ్చని ఊహాగానాలు మొదలయ్యాయి. ఇదే సమయంలో, టిక్‌టాక్ వెబ్‌సైట్ అన్‌లాక్ అయిందని, మళ్లీ పనిచేయడం మొదలుపెట్టిందని కొన్ని మీడియా సంస్థలు, సోషల్ మీడియాలో ప్రచారం జరిగింది.

అయితే ఈ ప్రచారంలో ఎలాంటి నిజం లేదని భారత ప్రభుత్వం స్పష్టం చేసింది. టిక్‌టాక్‌పై నిషేధం ఇప్పటికీ కొనసాగుతోందని, దానిని అన్‌లాక్ చేసినట్లు వస్తున్న వార్తలు పూర్తిగా అవాస్తవమని కేంద్ర ప్రభుత్వం తేల్చి చెప్పింది. “టిక్‌టాక్‌పై నిషేధం ఎత్తివేస్తున్నట్లు వస్తున్న తప్పుడు ప్రచారాన్ని నమ్మొద్దు” అని ప్రభుత్వం స్పష్టమైన ప్రకటన విడుదల చేసింది. భద్రతా కారణాల వల్ల టిక్‌టాక్‌తో సహా పలు చైనా యాప్‌లపై ప్రభుత్వం 2020లో నిషేధం విధించింది.

Criminal Case : అత్యధికంగా క్రిమినల్ కేసులు ఉన్న సీఎం గా రేవంత్ రెడ్డి – ADR

చైనా యాప్‌లపై నిషేధం అనేది దేశ భద్రతకు సంబంధించిన ఒక ముఖ్యమైన నిర్ణయం. సరిహద్దుల్లో ఉద్రిక్తతలు పెరిగిన తర్వాత ఈ చర్య తీసుకున్నారు. వ్యక్తిగత డేటా భద్రతకు ముప్పు ఉందని, వినియోగదారుల సమాచారం చైనా ప్రభుత్వానికి వెళ్లే అవకాశం ఉందని ప్రభుత్వం ఆందోళన వ్యక్తం చేసింది. ఈ కారణంగా టిక్‌టాక్‌పై నిషేధం విధించింది. ఈ భద్రతాపరమైన ఆందోళనలు ఇంకా కొనసాగుతున్నందున, టిక్‌టాక్‌పై నిషేధం ఎత్తివేసే ఆలోచన ప్రస్తుతం లేదని ప్రభుత్వ వర్గాలు సూచనప్రాయంగా తెలిపాయి.

ఈ ప్రచారాలు ప్రజలలో గందరగోళాన్ని సృష్టిస్తున్నాయి. కాబట్టి ప్రజలు ఇలాంటి వార్తలను నమ్మే ముందు అధికారిక ప్రకటనల కోసం ఎదురు చూడాలి. భద్రతా కారణాల వల్ల నిషేధించబడిన యాప్‌లను మళ్లీ వినియోగించడం వల్ల డేటాకు ముప్పు పొంచి ఉంటుంది. కాబట్టి, ప్రభుత్వ ప్రకటనలను అనుసరించి తప్పుడు సమాచారాన్ని వ్యాప్తి చేయకుండా జాగ్రత్త వహించడం అవసరం. భవిష్యత్తులో ఈ విషయంలో ఏమైనా మార్పులు ఉంటే ప్రభుత్వం అధికారికంగా ప్రకటిస్తుంది. అప్పటివరకు ఈ యాప్స్‌కు దూరంగా ఉండటమే మంచిది.

Follow us