War Effect : భారీగా పెరిగిన సిలిండర్ ధరలు
గృహ అవసరాలకు వాడే 14.2 కిలోల వంట గ్యాస్ సిలిండర్పై రూ. 60 పెరగగా, 19 కిలోల కమర్షియల్ సిలిండర్పై ఏకంగా రూ. 115 భారం పడింది. ఈ ధరలు నేటి నుంచే అమలులోకి రావడంతో వినియోగదారుల్లో ఆందోళన వ్యక్తమవుతోంది
- Author : Sudheer
Date : 07-03-2026 - 8:02 IST
Published By : Hashtagu Telugu Desk
War Effect Gas Cylinder Price Hike : ఇరాన్ యుద్ధ మేఘాల నేపథ్యంలో చమురు ధరల సెగ సామాన్యుడి వంటింటికి తాకింది. కేంద్ర ప్రభుత్వం గ్యాస్ సిలిండర్ ధరలను భారీగా పెంచింది. ప్రస్తుతం ఇరాన్ ప్రాంతంలో నెలకొన్న యుద్ధ వాతావరణం ప్రపంచ ఆర్థిక వ్యవస్థపై తీవ్ర ప్రభావాన్ని చూపుతోంది. ముఖ్యంగా ముడి చమురు సరఫరాలో అంతరాయం ఏర్పడుతుందనే ఆందోళనలతో అంతర్జాతీయ మార్కెట్లో క్రూడ్ ఆయిల్ ధరలు ఆకాశాన్ని తాకుతున్నాయి. దీని ప్రభావంతో భారత్లో చమురు సంస్థలు గ్యాస్ ధరలను సవరించక తప్పలేదు. ఇరాన్ యుద్ధం కారణంగా దిగుమతి వ్యయం పెరగడం వల్ల కేంద్ర ప్రభుత్వం ఈ భారతాన్ని వినియోగదారులపై వేయాల్సి వచ్చింది. ఫలితంగా అటు సామాన్యుడి బడ్జెట్, ఇటు వ్యాపార వర్గాల లెక్కలు తలకిందులయ్యాయి.
కొత్త ధరల వివరాలు మరియు అమలు
తాజా పెంపు ప్రకారం, గృహ అవసరాలకు వాడే 14.2 కిలోల వంట గ్యాస్ సిలిండర్పై రూ. 60 పెరగగా, 19 కిలోల కమర్షియల్ సిలిండర్పై ఏకంగా రూ. 115 భారం పడింది. ఈ ధరలు నేటి నుంచే అమలులోకి రావడంతో వినియోగదారుల్లో ఆందోళన వ్యక్తమవుతోంది. హైదరాబాద్ వంటి ప్రధాన నగరాల్లో డొమెస్టిక్ సిలిండర్ ధర రూ. 905 నుంచి రూ. 965కు చేరుకుంది. అలాగే వాణిజ్య సిలిండర్ ధర రూ. 1,961 నుంచి రూ. 2,076కు పెరగడం గమనార్హం. కేవలం ఒక్క రోజు వ్యవధిలోనే ఈ స్థాయిలో ధరలు పెరగడం గత కొంతకాలంగా ఇదే మొదటిసారి.
సామాన్యుడిపై పడే ప్రభావం
ఈ ధరల పెంపు కేవలం గ్యాస్ సిలిండర్కే పరిమితం కాకుండా, నిత్యావసర వస్తువుల ధరలపై కూడా ప్రభావం చూపే అవకాశం ఉంది. కమర్షియల్ సిలిండర్ ధర పెరగడంతో హోటళ్లు, రెస్టారెంట్లు మరియు చిరు వ్యాపారుల ఖర్చులు పెరుగుతాయి, ఇది ఆహార పదార్థాల ధరల పెరుగుదలకు దారితీస్తుంది. ఇప్పటికే ద్రవ్యోల్బణంతో సతమతమవుతున్న సామాన్యుడికి ఈ వంట గ్యాస్ పెంపు “గోరుచుట్టుపై రోకలి పోటు”లా మారింది. యుద్ధం మరికొన్ని రోజులు కొనసాగితే, మున్ముందు ఈ ధరలు మరింత పెరిగే ప్రమాదం ఉందని ఆర్థిక నిపుణులు హెచ్చరిస్తున్నారు.
Follow us
