Amla Tree: వాస్తు ప్రకారం ఇంట్లో ఉసిరి చెట్టును ఏ దిశలో నాటాలో తెలుసా?

హిందువులు ఎన్నో రకాల మొక్కలను దేవతలుగా భావించి పూజలు చేస్తూ ఉంటారు. అటువంటి వాటిలో జిల్లేడు,రావి,వేప మొక్కలతో పాటు ఇంకా చాలా మొక్కలు కూడా ఉన్నాయి. వాటిలో ఉసిరి చెట్టు కూడా ఒకటి. ముఖ్యంగా కార్తీక మాసంలో ఉసిరి చెట్టుకు ప్రత్యేకంగా పూజలు చేస్తూ ఉంటారు. అలాగే ఉసిరికాయల్లో ప్రత్యేకంగా దీపాలను కూడా వెలిగిస్తూ ఉంటారు. ఉసిరి చెట్టు కూడా మతపరమైన ప్రాముఖ్యతను కలిగి ఉంది. అలాంటి మంచి ప్రయోజనాలు కలిగిన ఉసిరి చెట్టును ఇంట్లో ఒక దిశలో నాటితే అంతా మంచే జరుగుతుందని పండితులు చెబుతున్నారు. మరి ఏ దిశలో నాటాలో ఇప్పుడు మనం తెలుసుకుందాం..

ఉసిరి చెట్టును విష్ణుమూర్తి స్వరూపంగా భావిస్తారు. అందుకే ఈ చెట్టును, దీని కాయను విష్ణువుకు ఇష్టమైనదిగా భావిస్తారు. కార్తీక మాసంలో శుక్ల పక్షం తొమ్మిదవ రోజును ఉసిరి నవమి అని కూడా అంటారు. ఈ రోజు విష్ణు మూర్తిని, లక్ష్మీ దేవిని, ఉసిరి చెట్టును ఖచ్చితంగా పూజిస్తారు. అంతేకాదు ఈ రోజు మీరు ఉసిరి చెట్టు నీడలో కూర్చుని అన్నం తింటే మీకున్న ఎన్నో రోగాల నుంచి ఉపశమనం లభిస్తుందని నమ్ముతారు. అలాగే వ్యక్తులు చేసిన పాపాలన్నీ కూడా నశిస్తాయని నమ్ముతారు. ఇకపోతే వాస్తు ప్రకారం ఉసిరి మొక్కను ఏ దిశలో నాటాలి అన్న విషయానికి వస్తే.. ఇంటికి ఉత్తరం లేదా తూర్పు దిశలో ఉసిరి చెట్టును నాటాలట. ఈ దిశలో ఉన్న ఉసిరి చెట్టును చాలా పవిత్రంగా భావిస్తారు.

అలాగే ఇది ఇంటికి మంచిది అని చెబుతున్నారు. అలాగే ఉసిరి చెట్టును క్రమం తప్పకుండా పూజించడం వల్ల ఇంట్లో దేవతలు, దేవుళ్లు ఉంటారట. ఉసిరి చెట్టును ఇంట్లో నాటడం వల్ల క్రమం తప్పకుండా ఆ చెట్టుకు నీరు పోసి పూజలు చేయడం వల్ల కుటుంబంలో సంతోషం శ్రేయస్సు ఉంటాయని చెబుతున్నారు. అలాగే ఇంట్లో నెగటివ్ ఎనర్జీ తొలగిపోయి ఇంట్లోకి సంపద మార్గం వస్తుందని చెబుతున్నారు.