ఔను.. కమల్ హాసన్ స్వయంగా పాట రాశారు.. పాట పాడారు!! జూన్ 3న విడుదలకానున్న తన యాక్షన్ థ్రిల్లర్ సినిమా ‘విక్రమ్’ కోసం ‘ పథల, పథల’ అనే బాణీలతో మొదలయ్యే పాటను కమల్ పాడారు. ఈనెల 9న చెన్నైలోని సంగీత దర్శకుడు అనిరుధ్ రవిచందర్ స్టూడియోలో ఈ పాట రికార్డింగ్ జరిగింది. ఇందుకు సంబంధించిన పలు ఫోటోలను అనిరుధ్ రవిచందర్ ట్విటర్ వేదికగా షేర్ చేశారు. ‘ కమల్ హసన్ గారు స్వయంగా పాట రాయడం, పాడటం గొప్ప విషయం. ఆయన పాటను రికార్డింగ్ చేసే అవకాశం లభించడం నా అదృష్టం.’ అని అనిరుధ్ వ్యాఖ్యానించారు. ఈ ట్వీట్ కు కమల్ హసన్ వెంటనే స్పందించారు. అనిరుధ్ కుటుంబ నేపథ్యాన్ని కొనియాడారు. ‘ మీ కుటుంబంలో తాత ముత్తాతల నుంచి నీ వరకు బహుముఖ నైపుణ్యాలు కలిగిన వారు వెలుగులోకి రావడం గొప్ప విషయం. మీ కుటుంబ గొప్పతనాన్ని నువ్వు నిలుపుతున్నావు ‘ అని కమల్ కామెంట్ చేశారు. ‘విక్రమ్’ ఒక యాక్షన్ థ్రిల్లర్ సినిమా. ఇందులో కమల్ హసన్ తో పాటు ఫహాద్ ఫాజిల్, విజయ్ సేతుపతి ప్రధాన పాత్రలు పోషిస్తున్నారు. ఈ సినిమాను రాజ్ కమల్ ఫిల్మ్స్ ఇంటర్నేషనల్ నిర్మిస్తోంది.