Singer Mangli : మంగ్లీని ఇండస్ట్రీ నుండి బహిష్కరించాలంటూ ఫిర్యాదు!

Singer Mangli Controversy

సింగర్ మంగ్లీ చుట్టూ ముసురుకున్న మైక్రో ఫైనాన్స్ కుంభకోణం వివాదం రోజు రోజుకు ఎక్కువుతుంది. గోకుల నందన ఇన్‌ఫ్రా, శుభ క్షేత్ర ప్రాజెక్ట్స్ వంటి సంస్థల ద్వారా సినిమా ఫైనాన్సింగ్ పేరుతో సుమారు రూ. 150 కోట్ల నుండి రూ. 200 కోట్ల మేర వసూళ్లకు పాల్పడ్డారనేది ప్రధాన ఆరోపణ. నెలకు 3 నుండి 5 శాతం భారీ వడ్డీ ఇస్తామని నమ్మించి మధ్యతరగతి, నిరుపేద ప్రజల నుండి పెట్టుబడులు సేకరించినట్లు తెలుస్తోంది. ఈ కేసులో ప్రధాన నిందితుడు రమావత్ మధు అరెస్ట్ కావడంతో, మంగ్లీ తనకున్న స్టార్‌డమ్‌ను ఉపయోగించి ప్రజలను ఈ స్కీమ్‌లలోకి ఆహ్వానించారనే విమర్శలు వెల్లువెత్తుతున్నాయి. ముఖ్యంగా తన క్లయింట్ల నుండి రూ 10 కోట్లు వసూలు చేయడంలో మంగ్లీ మరియు ఆమె తమ్ముడు శివ ప్రమేయం ఉందని అడ్వకేట్ సుబ్బారావు పంజాగుట్ట పోలీసులకు ఫిర్యాదు చేయడం వివాదాన్ని మరింత ముదిరేలా చేసింది.

పరిశ్రమ నుండి బహిష్కరణ డిమాండ్

ఈ వివాదం కేవలం పోలీస్ కేసులకే పరిమితం కాకుండా, మంగ్లీ వృత్తిపరమైన జీవితంపై కూడా తీవ్ర ప్రభావం చూపుతోంది. సెలబ్రిటీ హోదాలో ఉండి నిరుపేద ప్రజలను మోసగించే సంస్థలకు మద్దతుగా నిలవడం ఆక్షేపణీయమని తెలంగాణ మూవీ ఆర్టిస్ట్ అసోసియేషన్ (T-MAA) ప్రతినిధులు మండిపడుతున్నారు. బాధితులకు న్యాయం జరిగే వరకు మంగ్లీని చిత్ర పరిశ్రమ నుండి బహిష్కరించాలని, ఆమెకు ఎటువంటి సినిమా అవకాశాలు ఇవ్వకూడదని టీ-మా జనరల్ సెక్రటరీ సంపత్ నాయక్ డిమాండ్ చేశారు. ఈ మేరకు ప్రొడ్యూసర్ కౌన్సిల్‌కు కూడా ఫిర్యాదు చేయడంతో, మంగ్లీని సినిమాల నుండి పక్కన పెట్టే అవకాశాలు కనిపిస్తున్నాయి. ఒక ప్రజా గాయనిగా వెలుగొందుతున్న ఆమెపై ఇలాంటి తీవ్రమైన ఆరోపణలు రావడం మరియు బహిష్కరణ డిమాండ్లు తెరపైకి రావడం ఆమె భవితవ్యాన్ని ప్రశ్నార్థకంగా మార్చింది.

కన్నీటి పర్యంతమైన మంగ్లీ.. కుట్ర కోణంపై కౌంటర్ ఫిర్యాదు

తనపై వస్తున్న ఆరోపణలపై మంగ్లీ సోషల్ మీడియా వేదికగా స్పందిస్తూ కన్నీటి పర్యంతమయ్యారు. అసలు తనకు మైక్రో ఫైనాన్స్ లావాదేవీల గురించి ఎటువంటి అవగాహన లేదని, నిందితుడు మధుతో కేవలం సామాజిక కార్యక్రమాల ద్వారా మాత్రమే పరిచయం ఉందని ఆమె వివరణ ఇచ్చారు. తాను జీవితాంతం కష్టపడి సంపాదించుకున్న గౌరవాన్ని పోగొట్టేందుకు కుట్ర జరుగుతోందని ఆవేదన వ్యక్తం చేశారు. ఇదే సమయంలో అడ్వకేట్ సుబ్బారావు తనను బ్లాక్‌మెయిల్ చేస్తున్నారని ఆమె పోలీసులకు కౌంటర్ ఫిర్యాదు కూడా చేశారు. ప్రస్తుతం సైబరాబాద్ పోలీసులు ఈ స్కామ్‌లో ఉన్న లోతైన లింకులను వెలికితీసే పనిలో ఉన్నారు. చట్టపరమైన విచారణలో నిజానిజాలు తేలేవరకు ఈ వివాదం టాలీవుడ్‌లో హాట్ టాపిక్‌గానే కొనసాగేలా కనిపిస్తోంది.

Follow us