Morgan Stanley: 2030 నాటికి భారత్‌లో క్విక్ కామర్స్ మార్కెట్ $57 బిలియన్లకు చేరనుంది

Morgan Stanley: భారత్‌లో చిన్న పట్టణాలు, గ్రామీణ ప్రాంతాల్లో వేగంగా పెరుగుతున్న ఆన్‌లైన్ ఆర్డర్లపై ఆధారపడి, క్విక్ కామర్స్ (QC) విభాగం అద్భుతమైన విస్తరణ దిశగా అడుగులు వేస్తోంది. ప్రముఖ గ్లోబల్ బ్రోకరేజ్ సంస్థ మోర్గాన్ స్టాన్లీ తాజా నివేదిక ప్రకారం, 2030 నాటికి భారత్‌లో క్విక్ కామర్స్ మార్కెట్ మొత్తం $57 బిలియన్లకు చేరే అవకాశం ఉంది. ఇది గతంలో అంచనా వేసిన $42 బిలియన్‌ను మించి ఉంది.

FY26–28 కాలానికి గానూ మోర్గాన్ స్టాన్లీ, క్విక్ కామర్స్ విభాగానికి సంబంధించి గ్రాస్ ఆర్డర్ వ్యాల్యూలను 9–11 శాతం మేర పెంచుతూ అంచనాలను సవరిస్తోంది. ఈ రంగంలో GOV (Gross Order Value) నిరంతర వృద్ధి, ఫుడ్ డెలివరీ మార్జిన్లలో మెరుగుదల, అలాగే స్టేబుల్ పోటీ వాతావరణం తదితర అంశాలు ముందున్న త్రిగేర్లుగా పేర్కొన్నాయి.

బ్లింకిట్, ఇన్‌స్టామార్ట్, జెప్టో, ఫ్లిప్‌కార్ట్ మినిట్స్ లాంటి సంస్థలు క్విక్ కామర్స్ విభాగంలో మరింతగా తమ పరిధిని విస్తరిస్తున్నాయి. ఇప్పటికే ఫుడ్ డెలివరీ రంగంలో ఉన్న తమ నైపుణ్యంతో “ఎటర్నల్” (మాజీ జొమాటో) కూడా క్విక్ కామర్స్ విభాగాన్ని శక్తివంతంగా విస్తరిస్తోంది. ఈ రంగంలో సైతం లాభదాయకతను సాధించేందుకు సంస్థ సిద్ధమవుతోందని నివేదిక చెబుతోంది. ఫుడ్ డెలివరీ, క్విక్ కామర్స్ రెండింటిలోనూ మద్దతుగా నిలిచే స్థితిలో ఉండటం వల్ల, ఎటర్నల్ ఈ మారుతున్న లాభదాయక విభాగంలో ఆధిపత్యం చాటే అవకాశం ఉందని మోర్గాన్ స్టాన్లీ విశ్లేషిస్తోంది.

కేవలం ఆపరేటర్లే కాకుండా పెట్టుబడిదారుల దృష్టిలోనూ క్విక్ కామర్స్ “హాట్” సెక్టారుగా నిలుస్తోంది. KPMG వెంచర్ పల్స్ నివేదిక ప్రకారం, 2023లో గ్లోబల్‌గా నమోదైన $349.4 బిలియన్ల పెట్టుబడులు (43,320 డీల్స్‌లో) 2024లో $368.3 బిలియన్లకు పెరిగాయి (35,684 డీల్స్‌లో). ఇందులో భారతదేశంలోని క్విక్ కామర్స్ భాగస్వామ్యం గణనీయంగా ఉంది.

ఇ-కామర్స్, క్విక్ కామర్స్ వృద్ధి రేటు, సంప్రదాయ రిటైల్, మోడర్న్ ట్రేడ్ చానళ్ల కంటే 2–3 రెట్లు ఎక్కువగా ఉండటం గమనార్హం. దీంతో పెద్దగా ట్రేడింగ్ నెట్‌వర్క్ అవసరం లేకుండానే బ్రాండ్‌లు మార్కెట్‌లోకి ప్రవేశించే అవకాశం పొందుతున్నాయి. బెయిన్ అండ్ కంపెనీ ఏప్రిల్ నివేదిక ప్రకారం, భారత్‌లో ఇంటర్నెట్ వినియోగదారులలో 45 శాతం మంది డిజిటల్ పేమెంట్స్‌కి మొగ్గుచూపుతున్నారు. ఇది క్విక్ కామర్స్‌కి మరింత ఊతమిస్తోంది.

రిజర్వ్ బ్యాంక్ ఆఫ్ ఇండియా ప్రకారం, ప్రైవేట్ ఫైనల్ కన్సంప్షన్ ఆర్థిక వ్యవస్థలో వెలుగుతున్న అంశంగా నిలుస్తోంది. దీనికి ప్రధాన కారణం క్విక్ కామర్స్, ఈ-కామర్స్. ఈ రంగాల్లో పోటీని ప్రోత్సహించడం అవసరమని, దానిపై నియంత్రణ విధించకుండా ఉండటం ముఖ్యం అని RBI తెలిపింది.

స్మార్ట్‌ఫోన్లు, డిజిటల్ పేమెంట్స్, వేగవంతమైన డెలివరీలు వంటి అంశాలతో క్విక్ కామర్స్ కొత్త వ్యాపార పరిధులకు నాంది పలికింది. గ్రామీణ భారత్‌లో కూడా ఇది విస్తరించడంతో ఈ రంగం దేశ ఆర్థిక వ్యూహాల్లో కీలకంగా మారబోతోందని నిపుణుల అభిప్రాయం.

Virat Kohli: జెర్సీ నంబర్ నుంచి ట్రోఫీ వరకు విరాట్ కోహ్లీకి నెంబర్ 18కి మధ్య మ్యాజిక్..!