Vijayawada : 2024 నాటికి ఎన్టీఆర్ జిల్లాలో జల్జీవన్ మిషన్ ప్రాజెక్ట్ పూర్తి చేస్తాం – ఎంపీ కేశినేని నాని
2024 చివరి నాటికి జల్ జీవన్ మిషన్ ప్రాజెక్టును పూర్తి చేసి ఎన్టీఆర్ జిల్లాలో ఇంటింటికీ తాగునీరు అందిస్తామని విజయవాడ
- By Prasad Published Date - 07:35 AM, Sun - 27 August 23
2024 చివరి నాటికి జల్ జీవన్ మిషన్ ప్రాజెక్టును పూర్తి చేసి ఎన్టీఆర్ జిల్లాలో ఇంటింటికీ తాగునీరు అందిస్తామని విజయవాడ ఎంపీ, ఎన్టీఆర్ జిల్లా అభివృద్ధి సమన్వయ, పర్యవేక్షణ కమిటీ చైర్మన్ కేసినేని శ్రీనివాస్ (నాని) తెలిపారు. జిల్లాలో ఇప్పటి వరకు 2.67 లక్షల ఇళ్లకు తాగునీటి కుళాయి కనెక్షన్లు ఇచ్చామని, 2024 నాటికి జల్ జీవన్ మిషన్ ప్రాజెక్టును పూర్తి చేస్తామని, వచ్చే ఏడాది 1.04 లక్షల కుళాయి కనెక్షన్లు మంజూరు చేస్తామన్నారు. ఎన్టీఆర్ జిల్లా కలెక్టరేట్ స్పందన సమావేశ మందిరంలో కేశినేని నాని అధ్యక్షతన ఎన్టీఆర్ జిల్లా అభివృద్ధి సమన్వయ, పర్యవేక్షణ కమిటీ సమావేశం జరిగింది. జల్ జీవన్ మిషన్ పథకానికి రాష్ట్ర, కేంద్ర ప్రభుత్వాలు 50 శాతం చొప్పున నిధులు మంజూరు చేస్తున్నాయన్నారు. కిడ్నీ సంబంధిత వ్యాధితో బాధపడుతున్న వారి కేసుల నేపథ్యంలో కృష్ణా నీటి సరఫరా కోసం ఎ.కొండూరు మండలానికి కేంద్ర ప్రభుత్వం రూ.49.92 కోట్లు మంజూరు చేసిందన్నారు.
జిల్లాలో కేంద్ర ప్రభుత్వ పథకాల అమలులో ఎదురవుతున్న సమస్యలు, అవరోధాలను అధిగమించడమే ఈ సమావేశం లక్ష్యమని కేశినేని నాని తెలిపారు. పథకాల అమలు, అభివృద్ధి పనులు చేపట్టడంలో ఎన్టీఆర్ జిల్లా కలెక్టర్ ఎస్ డిల్లీరావు చేస్తున్న సేవలను కొనియాడారు. 300 గ్రామ పంచాయతీలకు నీటి కొరత ఏర్పడినప్పుడు కలెక్టర్ నీటి ట్యాంకర్లను ఏర్పాటు చేసి తాగునీటిని సరఫరా చేశారని గుర్తు చేశారు. కొండపల్లి బొమ్మల గురించి ప్రస్తావిస్తూ.. 63 మంది కళాకారులకు రూ.10 వేల విలువైన టూల్ కిట్లను అందజేశామని, బొమ్మలకు గుర్తింపు తెచ్చేందుకు కేంద్ర ప్రభుత్వం కృషి చేస్తుందన్నారు. ఎన్టీఆర్ జిల్లాలో వైఎస్ఆర్ హెల్త్ క్లినిక్లు, రైతు భరోసా కేంద్రాలు, డిజిటల్ లైబ్రరీ భవనాలు, గ్రామ/వార్డు సచివాలయ కార్యాలయాలు ప్రాధాన్యతా ప్రాతిపదికన నిర్మిస్తున్నట్లు ఎంపీ కేశినేని నాని తెలిపారు. కిడ్నీ సమస్యలతో గ్రామస్తులు ఇబ్బందులు పడుతున్న ఎ కొండూరు మండలం గిరిజన తాండాలకు తాగునీటి సరఫరా వేగవంతం చేయాలని అధికారులను ఆదేశించారు. ప్రధానమంత్రి ఆవాజ్ యోజన పథకం కింద పట్టణ, గ్రామీణ ప్రాంతాల్లో 83,485 ఇళ్ల నిర్మాణ పనులు జరుగుతున్నాయని నాని తెలిపారు.
ఆగస్టు 30 నాటికి 15,127 ఇళ్లు సిద్ధంగా ఉన్నాయని కేశినేని నాని తెలిపారు. జాతీయ రహదారులు, ఎంఎన్ఆర్ఇజిఎస్, ఆర్ అండ్ బి, నీటిపారుదల, వైద్య, ఆరోగ్యం తదితర శాఖల పనుల పురోగతిని ఎంపీ సమీక్షించారు. ఎన్టిఆర్ జిల్లా కలెక్టర్ ఎస్ డిల్లీరావు మాట్లాడుతూ కేంద్ర ప్రభుత్వం ప్రాయోజితం చేస్తున్న పనులను త్వరితగతిన పూర్తి చేసేందుకు చర్చలు జరుపుతామన్నారు. సమావేశంలో విజయవాడ సెంట్రల్ ఎమ్మెల్యే మల్లాది విష్ణు, విజయవాడ పశ్చిమ ఎమ్మెల్యే వెలంపల్లి శ్రీనివాస్, మేయర్ ఆర్.భాగ్యలక్ష్మి, కో-ఆర్డినేషన్ కమిటీ సభ్యులు, జిల్లా అధికారులు తదితరులు పాల్గొన్నారు.
Related News
Vijayawada : సమ్మర్లో సింపుల్ ట్రిప్ దగ్గర్లో ప్లాన్ చేస్తున్నారా? అయితే విజయవాడ చుట్టు పక్కల అన్నీ చూశారా?
విజయవాడని ఇప్పటివరకు చూడలేదంటే విజయవాడ ట్రిప్ ప్లాన్ చేసుకోండి.