Vidadala Rajani: ఉద్యోగాల పేరుతో కోట్లలో మోసం..చిక్కుల్లో విడదల రజని

పల్నాడు జిల్లాలో మాజీ మంత్రి, వైఎస్ఆర్ కాంగ్రెస్ పార్టీ నేత విడదల రజనీ పీఏలు, అనుచరులు భారీ ఉద్యోగాల మోసానికి పాల్పడ్డారని ఆరోపణలు రావడంతో కలకలం రేగింది. దోర్నాలకు చెందిన బీ.ఫార్మసీ విద్యార్థి కృష్ణతో పాటు మరికొంతమంది బాధితులు పోలీస్ సూపరింటెండెంట్‌కి ఫిర్యాదు చేశారు. వీరు చెప్పిన ప్రకారం, మాజీ మంత్రిణి విడదల రజనీ పీఏలు శ్రీకాంత్ రెడ్డి, దొడ్డా రామకృష్ణ, ఆమె సన్నిహిత అనుచరులు శ్రీగణేశ్, కుమారస్వామి అనే వారు ఉద్యోగాల పేరుతో సుమారు రూ.5 కోట్లు వసూలు చేశారని ఆరోపించారు. ప్రభుత్వంలో వివిధ శాఖల్లో ఉద్యోగాలు ఇప్పిస్తామని చెప్పి ఈ డబ్బులు తీసుకున్నట్లు బాధితులు తెలిపారు. అయితే, డబ్బు తిరిగి ఇవ్వమని అడగగానే వారిని బెదిరింపులకు గురి చేస్తున్నారని కూడా ఫిర్యాదులో పేర్కొన్నారు.

Accidents : ఈరోజు కూడా తెలుగు రాష్ట్రాల్లో బస్సు ప్రమాదాలు..ఎక్కడెక్కడంటే !!

ఈ ఘటన వెనుక ఉన్న వ్యవహారం 2023-24 మధ్య కాలంలో జరిగినట్లు తెలుస్తోంది. అప్పట్లో విడదల రజనీ మంత్రిగా ఉన్న సమయానికే ఆమె పేరును ఉపయోగించి అనుచరులు ఈ రకమైన మోసాలు జరిపారని బాధితులు చెబుతున్నారు. ఉద్యోగాల సిఫార్సు ఫీజు పేరుతో సేకరించిన ఈ మొత్తాన్ని ఎవరికీ ఇవ్వలేదు, అలాగే తిరిగి ఇవ్వమన్నా తిప్పికొడుతున్నారని వారు ఆరోపిస్తున్నారు. శ్రీకాంత్ రెడ్డి, దొడ్డా రామకృష్ణ వంటి పీఏలు విడదల రజనీ పేరు చెబుతూ అధికారులకు సిఫార్సులు చేయగలమని చెప్పి ప్రజల విశ్వాసాన్ని దోపిడీ చేశారని వారు పేర్కొన్నారు. ఈ వ్యవహారంలో శ్రీగణేశ్, కుమారస్వామి కీలక పాత్ర పోషించారని, వీరంతా సమన్వయంతో పనిచేసి ప్రజల డబ్బు మోసం చేశారని సమాచారం.

విడదల రజనీపై ఇది మొదటి ఆరోపణ కాదు. గతంలో కూడా ఆమెపై పలు ఆరోపణలు వచ్చినప్పటికీ, పెద్దగా చర్యలు తీసుకోలేదు. 2019లో చిలకలూరిపేట నుంచి గెలిచి మంత్రిగా పనిచేసిన రజనీ, 2024లో గుంటూరు నుంచి పోటీ చేసి ఓడిపోయిన తర్వాత మళ్లీ తన పాత నియోజకవర్గానికి చేరారు. ఇప్పుడు ఆమె అనుచరుల పేర్లతో మళ్లీ మోసాలు వెలుగులోకి రావడంతో రాజకీయంగా కొత్త వివాదం చెలరేగింది. బాధితులు తమ డబ్బులు తిరిగి ఇవ్వాలని, నిజానిజాలు బయటపెట్టాలని పోలీసులను కోరుతున్నారు. ఈ కేసులో ఆధారాలను సేకరించి విచారణ జరిపే అవకాశం ఉందని పల్నాడు పోలీసులు సూచిస్తున్నారు. విడదల రజనీ ఈ ఆరోపణలపై ఇంకా స్పందించకపోవడం ఆసక్తికరంగా మారింది.