AP-Odisha issue: ఏపీ,ఒడిశాల మ‌ద్య వివాద‌స్ప‌ద స‌మ‌స్య‌ల‌కు చెక్‌…ఇరు రాష్ట్రాల సీఎంల అంగీకారంఔ

ఏపీ, ఒడిశా ముఖ్యమంత్రులు వైఎస్ జగన్ మోహన్ రెడ్డి, న‌వీన్ ప‌ట్నాయ‌క్ న‌వంబ‌ర్‌ 9న భువనేశ్వర్‌లో రెండు గంటలపాటు స‌మావేశ‌మ‌య్యారు. ఈ స‌మావేశంలో ఇరు రాష్ట్రాల మ‌ధ్య ఉన్న వివాద‌స్ప‌ద అంశాల‌పై చ‌ర్చ‌కు వ‌చ్చాయి. మావోయిస్టు స‌మ‌స్య‌, గంజాయి సాగు సమస్యను పరిష్కరించడం సహా వివిధ అంతర్ రాష్ట్ర సమస్యల పరిష్కారంపై సన్నిహితంగా పనిచేయాలని ఒడిశా మరియు ఆంధ్రప్రదేశ్ ముఖ్య మంత్రులు నిర్ణ‌యించుకున్నారు. మంగళవారం సాయంత్రం భువనేశ్వర్‌లో రెండు గంటలపాటు సాగిన భేటీ ముగింపు సందర్భంగా ఇరు రాష్ట్రాల ముఖ్యమంత్రులు నవీన్‌ పట్నాయక్‌, వైఎస్‌ జగన్‌మోహన్‌రెడ్డి సంయుక్త ప్రకటన విడుదల చేశారు.ముఖ్యమంత్రులు పరస్పర ప్రయోజనాలకు సంబంధించిన అనేక అంశాలపై చర్చించారు. ముఖ్యంగా నీటి వనరులు, ఉమ్మడి సరిహద్దు, ఇంధనం, మావోయిస్టు స‌మ‌స్య, వివాదాస్పద కోటియా సరిహద్దు గ్రామాల సమస్య పరిష్కారం, వంశధార నదిపై నేరడి బ్యారేజీ నిర్మాణం, జంఝావతి రిజర్వాయర్, బహుదా నది నుండి నీటి విడుదల, పోలవరం వంటి వాటిపై సన్నిహితంగా పనిచేయాలని నిర్ణయించినట్లు చెప్పారు. బహుళార్ధసాధక ప్రాజెక్ట్‌,బ‌లిమెల‌, ఎగువ సీలేరు విద్యుత్ ప్రాజెక్టులకు పరస్పర నో-అబ్జెక్షన్ సర్టిఫికేట్ జారీ చేయాల‌ని ఇరు రాష్ట్రాల ముఖ్య‌మంత్రులు నిర్ణ‌యించారు.

అపరిష్కృతంగా ఉన్న సమస్యలపై చర్చించి, ఇరు రాష్ట్రాల ప్రజలకు మేలు చేసే పరిష్కారాన్ని కనుగొనేందుకు ప్రధాన కార్యదర్శులు సంస్థాగత యంత్రాంగాన్ని ఏర్పాటు చేయాలని ముఖ్యమంత్రులు నిర్ణయించినట్లు సంయుక్త ప్రకటనలో తెలిపారు.
పరస్పర ప్రయోజనాలకు సంబంధించిన అనేక అంశాలపై, ముఖ్యంగా నీటి వనరులు, ఉమ్మడి సరిహద్దులు, ఇంధనం మరియు వామపక్ష తీవ్రవాదంపై చాలా స్నేహపూర్వక మరియు ఫలవంతమైన చర్చ జరిగింది” అని న‌వీన్ పట్నాయక్ ట్వీట్ చేశారు.

ఒడిషా ముఖ్యమంత్రి శ్రీ @Naveen_Odisha గారికి ధన్యవాదాలు. సాదరంగా ఆహ్వానించి, సుహృద్భావ వాతావరణంలో చర్చలు జరిపినందుకు సంతోషంగా ఉంది. త్వరలో ఈ చర్చలు సత్ఫలితాలను ఇస్తాయని విశ్వసిస్తున్నాను. pic.twitter.com/xb8ICX1LfT

— YS Jagan Mohan Reddy (@ysjagan) November 9, 2021

ఈ చర్చలు త్వరలో మంచి ఫలితాలను ఇస్తాయని నేను ఆశిస్తున్నానని ఏపీ సీఎం జ‌గ‌న్ ట్వీట్ చేశారు. రాష్ట్రాలు సరిహద్దులను పంచుకోవడమే కాకుండా సుదీర్ఘమైన, ఉజ్వలమైన చరిత్ర, వారసత్వాన్ని కూడా పంచుకుంటున్నాయని ముఖ్యమంత్రులు అన్నారు.ఆంధ్రప్రదేశ్‌లోని శ్రీకాకుళంలోని బీఆర్ అంబేద్కర్ యూనివర్శిటీలో ఒడియా, ఒడిశాలోని బెర్హంపూర్ యూనివర్శిటీలో తెలుగు భాషలను ఏర్పాటు చేసేందుకు రెండు రాష్ట్రాలు కృషి చేస్తాయని ప్ర‌క‌టించారు. సరిహద్దు జిల్లాల్లోని పాఠశాలల్లో భాషా ఉపాధ్యాయుల నియామకం, పుస్తకాల సరఫరా, భాషా పరీక్షల నిర్వహణ కూడా సోదరభావాన్ని పెంపొందించేందుకు చర్యలు తీసుకుంటామని ఉమ్మడి ప్రకటనలో తెలిపారు.అవసరమైన సమయాల్లో రెండు పొరుగు రాష్ట్రాలు పూర్తి సహకారం మరియు సహాయాన్ని అందించాయని.. ఇది గతంలో ప్రకృతి వైపరీత్యాల సమయంలో బయటపడ్డ వాస్తవమని పేర్కొంది.

ఒడిశా, ఆంధ్రప్రదేశ్‌లు రెండూ క్లెయిమ్ చేస్తున్న కోటియా పంచాయతీ పరిధిలోని 28 గ్రామాల్లో 21 గ్రామాల యాజమాన్యంపై ఇటీవలి నెలల్లో అనేక ఆందోళ‌న‌లు జ‌రిగాయి. వంశధార నదిపై నేరడి బ్యారేజీ నిర్మాణం మరో ప్రధాన అంశంగా ఉంది. ఒడిశాలోని రాయగడ, గజపతి జిల్లాల్లో 106 ఎకరాలకు పైగా భూములు ముంపునకు గురవుతున్న నేరడి బ్యారేజీ నిర్మాణానికి వంశధార జల వివాదాల ట్రిబ్యునల్ ఇటీవలే ఆంధ్రప్రదేశ్‌కు అనుమతినిచ్చింది.వీట‌న్నిటిని స్నేహ‌పూర్వ‌కంగా ప‌రిష్క‌రించుకోవాల‌ని ఇరు రాష్ట్రాల సీఎంలు నిర్ణ‌యించుకున్నారు.