ఏపీలో సినిమా టికెట్‌ రేట్ల పెంపుపై కొత్త పాలసీ సినిమాటోగ్రఫీ మంత్రి కందుల దుర్గేష్‌

Movie Ticket Rates Hike In

Minister Kandula Durgesh : ఆంధ్రప్రదేశ్ రాష్ట్రంలో సినిమా టికెట్ రేట్ల పెంపుపై ఏపీ సినిమాటోగ్రఫీ శాఖ మంత్రి కందుల దుర్గేష్ కీలక వ్యాఖ్యలు చేశారు. ఏపీలో సినిమా టికెట్ రేట్ల పెంపుపై త్వరలోనే కొత్త విధానం తీసుకువస్తామని ప్రకటించారు. సినిమా బడ్జెట్ ప్రకారం ప్రస్తుతం టికెట్ రేట్లు పెంచుతున్నామన్న మంత్రి కందుల దుర్గేష్.. ఇక మీదట అన్నింటికీ కేటగిరీ ప్రకారం సమానంగా సినిమా టికెట్ రేట్లు పెంచే విధానాన్ని పరిశీలిస్తున్నట్లు వెల్లడించారు. ఇండస్ట్రీకి మేలు జరగటంతో పాటుగా సామాన్యులకు భారం కాకుండా టికెట్ రేట్ల పెంపుపై నిర్ణయం ఉంటుందని మంత్రి కందుల దుర్గేష్ వెల్లడించారు.

సినిమా టికెట్ రేట్ల పెంపుపై ఏపీ ప్రభుత్వం కొత్త ఆలోచన చేస్తోంది. ఈ విషయాన్ని ఏపీ సినిమాటోగ్రఫీ శాఖ మంత్రి కందుల దుర్గేష్ వెల్లడించారు. సినిమా టికెట్ రేట్ల పెంపు మీద త్వరలోనే నూతన విధానం తెస్తామని కందుల దుర్గేష్ ప్రకటించారు. సినిమా టికెట్ల హేతుబద్ధీకరణపై బుధవారం సచివాలయం వేదికగా కమిటీ సమావేశమైంది. ఈ సమావేశాల్లో పలు విషయాలపై చర్చించారు. అనంతరం విలేకర్లతో మాట్లాడిన మంత్రి కందుల దుర్గేష్.. టికెట్ రేట్ల పెంపుపై కీలక వ్యాఖ్యలు చేశారు. ప్రస్తుతం సినిమా బడ్జెట్ ప్రకారం మూవీ టికెట్ రేట్లు పెంచుతున్నామని.. రాబోయే రోజుల్లో అలా ఉండదని మంత్రి కందుల దుర్గేష్ వెల్లడించారు. ఓ కొత్త విధానం రూపొందిస్తామని.. అన్ని సినిమాలకు కేటగిరీ ప్రకారం సమానంగా రేట్లు పెంచేలా నూతన విధానం పరిశీలిస్తున్నామన్నారు.

హైబడ్జెట్ సినిమాలకు సంబంధించిన టికెట్ రేట్లపై కమిటీ చర్చిస్తోందని.. ఈ విషయంలో సినీ నిర్మాతలు, డిస్ట్రిబ్యూటర్లు, ఎగ్జిబ్యూటర్ల నుంచి కూడా అభిప్రాయాలను తీసుకుంటామన్నారు. ఏ నిర్ణయం తీసుకున్నా కూడా.. ఇటు సినీ ఇండస్ట్రీకి, అటు సామాన్య జనాలకు ఇబ్బంది కలగకుండా నిర్ణయాలు తీసుకుంటామని మంత్రి కందుల దుర్గేష్ వెల్లడించారు. మరోవైపు సంక్రాంతి సీజన్‌కు పలు సినిమాలు సందడి చేయనున్నారు. ప్రభాస్, చిరంజీవి, రవితేజ వంటి స్టార్ల సినిమాలు విడుదలకు సిద్ధంగా ఉన్నాయి. అయితే ఏపీ మంత్రి కందుల దుర్గేష్ చెప్పిన టికెట్ రేట్ల పెంపుపై నూతన విధానం.. అప్పటికి అమల్లోకి తెస్తారా.. లేదా పాత విధానాన్నే ఫాలో అవుతారా అనేది ఆసక్తికరంగా మారింది.

మరోవైపు తెలంగాణలో రాబోయే రోజుల్లో సినిమా టికెట్ రేట్ల పెంపు ఉండదని ఇప్పటికే అక్కడి ప్రభుత్వం స్పష్టం చేసింది. తెలంగాణ సినిమాటోగ్రఫీ శాఖ మంత్రి కోమటిరెడ్డి వెంకటరెడ్డి ఈ విషయాన్ని ఇటీవల వెల్లడించారు. భవిష్యత్తులో సినిమా టికెట్ల రేట్లు పెంచే ప్రసక్తే లేదని కోమటిరెడ్డి వెంకటరెడ్డి ఇటీవల స్పష్టం చేశారు.

అలాగే సినిమా టికెట్‌ ధరలకు పెంచాలంటూ.. నిర్మాతలు, దర్శకులు ఎవరూ కూడా తమ వద్దకు రావొద్దని కోమటిరెడ్డి వెంకటరెడ్డి కోరారు. సినిమా టికెట్ ధరలు తక్కువగా ఉంటే.. కుటుంబం మొత్తం థియేటర్‌కు వచ్చి సినిమా చూస్తుందన్న మంత్రి.. ఈ నేపథ్యంలో ఇకపై తెలంగాణలో సినిమా టికెట్ రేట్లను పెంచమని స్పష్టం చేశారు.

Follow us