Mars : వామ్మో.. మార్స్‌పై భారీ రిజ‌ర్వాయర్‌!

అంగార‌కుడి గుట్టు వీడుతోంది. మార్స్ ర‌హ‌స్యాలు ఒకొక్క‌టిగా బ‌య‌ట‌ప‌డుతున్నాయి. తాజాగా అంగారక గ్రహంపై నీటి అన్వేషణలో శాస్త్రవేత్తలు మరో ముందడుగు వేశారు. మార్స్‌పై మంచు/నీళ్ల కోసం ఇన్నాళ్లూ ధృవాల్లో వెతికిన పరిశోధకులు, దాని గర్భంలో నీరు ఉండవచ్చని భావించి పరిశోధనలు నిర్వహించారు. వాలేస్‌ మెరైనరీస్‌ అనే ప్రాంతంలో ఓ భారీ రిజర్వాయర్‌ను గుర్తించారు. లోయలతో కూడిన ఈ రిజర్వాయర్‌ లాంటి నిర్మాణం అంగారకుడి ఉపరితలానికి మీటరు లోతులో ఉంది. 45 వేల చదరపు కిలోమీటర్ల మేర విస్తరించి దాదాపు హర్యానా రాష్ట్రమంత పెద్దగా ఉంది. గతంలో ఈ ప్రాంతంలో నీళ్లు ఉండేవని శాస్త్రవేత్తలు భావిస్తున్నారు.

మట్టిలో భారీగా హైడ్రోజన్‌
మార్స్‌పై నీటి అన్వేషణకు రష్యా, యూరోపియన్‌ స్పేస్‌ ఏజెన్సీ శాస్త్రవేత్తలు సంయుక్తంగా ట్రేస్‌ గ్యాస్‌ ఆర్బిటర్‌(టీజీవో)ను పంపించారు. దీనిలోని ‘ఫ్రెండ్‌’ టెలిస్కోప్‌ ఈ రిజర్వాయర్‌ను గుర్తించింది. ఇక్కడి మట్టిలోని రసాయనిక మూలకాలను శాస్త్రవేత్తలు అధ్యయనం చేశారు. భారీగా హైడ్రోజన్‌ ఉన్నట్టు గుర్తించారు. గతంలో నీటి నిల్వల వల్లే ఈ లక్షణం ఉండొచ్చని తెలిపారు. ‘టీజీవోతో మార్స్‌ ఉపరితలాన్ని అధ్యయనం చేస్తున్నాం. ఇప్పటివరకు ఈ ఒయాసిస్‌ లాంటి ప్రాంతాన్ని ఎక్కడా గుర్తించలేదు’ అని రష్యన్‌ అకాడమీ ఆఫ్‌ సైన్సెస్‌ స్పేస్‌ రిసెర్చ్‌ ఇన్‌స్టిట్యూట్‌ శాస్త్రవేత్త ఐగర్‌ మిత్రోఫనోవ్‌ ఒక ప్రకటనలో తెలిపారు