Samosa Caucus-Modi : సమోసా కాకస్ అని మోడీ చెప్పగానే.. అమెరికా ఎంపీల చప్పట్లు ఎందుకు ?

అమెరికా రాజకీయాల్లో ‘సమోసా కాకస్’ అనే పదం చాలా చర్చనీయాంశమైంది. 2016లో తొలిసారిగా ఐదుగురు భారత సంతతికి చెందిన ఎంపీలు అమెరికా పార్లమెంట్‌ కు ఎన్నికైన సమయంలో భారతీయ-అమెరికన్ లీడర్, అమెరికా  ప్రతినిధుల సభ సభ్యుడు రాజా కృష్ణమూర్తి ఈ పదాన్ని తన ప్రసంగంలో ప్రయోగించారు. ‘సమోసా కాకస్’ అనే పదాన్ని సృష్టించింది ఆయనే. ఆ తర్వాతి నుంచి అమెరికా పార్లమెంటు లోపల భారత సంతతికి చెందిన ఎంపీల వర్గాన్ని ‘సమోసా కాకస్’ అని పిలుస్తున్నారు. ప్రస్తుతం ఈ గ్రూపులో దాదాపు 5 నుంచి 6 మంది సభ్యులు ఉన్నారు. భారతీయ వంటకం సమోసా ప్రపంచవ్యాప్తంగా ఎంతో  ప్రసిద్ధి చెందింది. అందుకే ఈ పదం అమెరికాలో  భారతీయ మూలాలున్న వ్యక్తులకు పర్యాయపదంగా మారింది.

ఇప్పుడు సమోసా కాకస్‌లో ఎవరున్నారు ?

అమెరికా జనాభా దాదాపు 33 కోట్లు. ఇందులో ఒక శాతానికిపైగా భారత సంతతికి చెందిన వ్యక్తులు ఉన్నారు. మొత్తం 435 మంది సభ్యులున్న అమెరికా కాంగ్రెస్‌లో భారత సంతతికి చెందిన ఎంపీల సంఖ్య 5 మాత్రమే. ఇటీవల తానేదార్ అనే భారత సంతతి వ్యక్తి ఐదో ఎంపీగా ఎంట్రీ ఇచ్చారు. అమెరికా కాంగ్రెస్ లో భారత సంతతికి చెందిన అమెరికన్ సభ్యుల సంఖ్య ఇంతటి స్థాయికి పెరగడం అమెరికా చరిత్రలో ఇదే తొలిసారి. మిచిగాన్ 13వ జిల్లాకు శ్రీ షామల్ తానేదార్ (68), కాలిఫోర్నియాలోని 6వ జిల్లాకు డాక్టర్ అమీ బెరా (58), కాలిఫోర్నియాలోని 17వ జిల్లాకు రో ఖన్నా (46), వాషింగ్టన్ లోని  7వ జిల్లాకు ప్రమీలా జయపాల్(57), ఇల్లినాయిస్ లోని 8వ జిల్లాకు రాజా కృష్ణమూర్తి (49) ప్రాతినిధ్యం వహిస్తున్నారు. ఇక అమెరికా కాంగ్రెస్ లో ఉన్న ఆరో సభ్యురాలు వైస్ ప్రెసిడెంట్ కమలా  హారిస్.