Canada PM Divorce: 18 ఏళ్ల వైవాహిక బంధానికి స్వస్తి పలికిన ప్రధాని.. అది మాత్రం ఉంటుందంటూ?

ఈ రోజుల్లో ప్రేమ పెళ్లి విడాకులు అన్నవి కామన్ అయిపోయాయి. చిన్న చిన్న విషయాలకే మనస్పర్ధలు వచ్చి విడాకులు తీసుకొని విడిపోతున్నారు. ఇలా విడాకులు తీసుకుంటున్న వారిలో అందరూ పెద్దపెద్ద వారే ఉన్నారు. ముఖ్యంగా సెలబ్రిటీలు వ్యాపారవేత్తలు రాజకీయ నాయకులే ఉన్నారు. తాజాగా కూడా ఒక ప్రధాని దంపతులు విడాకులు తీసుకుని వీడిపోతున్నట్లు ప్రకటించారు. 18 ఏళ్ల వైవాహిక బంధానికి వీడ్కోలు చెబుతున్నట్లు కెనడా ప్రధాని జస్టిన్‌ ట్రూడో, ఆయన సతీమణి సోఫీ గ్రెగొయ్‌రీ ట్రూడో బుధవారం ప్రకటించారు.

పలుమార్లు సామరస్యంగా చర్చించుకున్న తర్వాత తాము విడిపోవాలనే నిర్ణయానికి వచ్చినట్లు ఇన్‌స్టాగ్రామ్‌ వేదికగా వెల్లడించారు. ఇప్పటికే తమ విడాకుల సంబంధ చట్టపర అంగీకార పత్రంపై జస్టిన్‌ ట్రూడో, సోఫీ ట్రూడో సంతకాలు చేసినట్టు ప్రధాని కార్యాలయం పేర్కొంది. కాగా 2005లో వివాహం చేసుకున్న కెనడా ప్రధాని జస్టిన్‌ ట్రూడో దంపతులకు ముగ్గురు పిల్లలు ఇద్దరు కుమారులు, ఒక కుమార్తె కూడా ఉన్నారు. అయితే విడాకులు తీసుకొని విడిపోయినప్పటికీ పిల్లల సంరక్షణను ఇద్దరూ కలిసి చూసుకుంటామని తెలిపారు. ఇప్పటికే ఒట్టావాలో మరో నివాసంకు సోఫీ ట్రూడో షిఫ్ట్ అయ్యారు. పిల్లల్ని చూసేందుకు, అధికారిక పర్యటనల నిమిత్తం ప్రధాని వెళ్లినప్పుడూ పిల్లల్ని చూసుకునేందుకు రిడియా కాటేజికి వస్తుంటానని సోఫీ ట్రూడో తెలిపారు.

ఎప్పటి లానే తమ మధ్య ప్రేమ, పరస్పర గౌరవం ఉంటాయని ప్రధాని దంపతులు చెప్పుకొచ్చారు. మోడల్‌గా, టీవీ వ్యాఖ్యాతగా సోఫీ సుపరిచితురాలే. అధికారంలో ఉండగానే విడాకులు తీసుకున్న రెండో కెనడా ప్రధాని జస్టిన్‌ ట్రూడో. ఆయన తండ్రి, మాజీ ప్రధాని పియరీ ట్రూడో కూడా అధికారంలో ఉండగానే విడాకులు తీసుకున్నారు. కెనడాలో అత్యంత ప్రభావశీల వ్యక్తిగా పేరొందిన తండ్రి పియరీ ట్రూడో నుంచి జస్టిన్‌ ట్రూడో రాజకీయ వారసత్వం పుణికిపుచ్చుకున్నారు. 2015లో ఆయన ప్రధానిగా ఎన్నికయ్యారు.