Bonalu : నాంపల్లి క్రిమినల్ కోర్టు, టీ హబ్‌లోనూ బోనాల వేడుకలు

నాంపల్లి క్రిమినల్ కోర్టులో MBCCA న్యాయవాదుల ఆధ్వర్యంలో ఆషాఢ మాస బోనాల ఉత్సవాలు ఘనంగా జరిగాయి. పోతరాజుల విన్యాసాలు, తీన్మార్ డప్పు చప్పుళ్లు ప్రత్యేక ఆకర్షణగా నిలిచాయి. న్యాయవాది, అంబర్పేట్ కంటెస్టెడ్ ఎమ్మెల్యే దేవరుప్పుల శ్రీకాంత్, సినీయర్ న్యాయవాదులు పాల్గొని ప్రత్యేక పూజలు నిర్వహించారు. మహిళలు పాల్గొని అమ్మవారికి బోనాలు సమర్పించారు.

We’re now on WhatsApp. Click to Join.

ఇదిలా ఉంటే.. బేగంపేటలోని ప్రజాభవన్‌లోని శ్రీ నల్ల పోచమ్మ ఆలయంలో ఆదివారం నిర్వహించిన బోనాల వేడుకల్లో ముఖ్యమంత్రి రేవంత్‌రెడ్డి , డిప్యూటీ సీఎం భట్టి విక్రమార్క , మంత్రులు పాల్గొన్నారు. సీఎం, మంత్రులు, ఎమ్మెల్యేలు, ఎంపీలు, రాజకీయ నేతలకు భట్టి విక్రమార్క స్వాగతం పలికి ఆలయానికి వెళ్లి ప్రత్యేక పూజలు చేశారు. ఉత్సవాల్లో భాగంగా నల్ల పోచమ్మ అమ్మవారికి భట్టి విక్రమార్క సతీమణి నందిని, దేవాదాయ శాఖ మంత్రి కొండా సురేఖ, నీటిపారుదల శాఖ మంత్రి ఉత్తమ్‌కుమార్‌రెడ్డి సతీమణి ఎమ్మెల్యే పద్మావతిరెడ్డి బోనం ఎత్తారు.

చారిత్రక గోల్కొండ కోటలో గత వారం ప్రారంభమైన బోనాల ఉత్సవాలు ఈ వారం కూడా కొనసాగాయి. ఆయురారోగ్యాలు, శ్రేయస్సు కలగాలని కోరుతూ ఎల్లమ్మ దేవిని ప్రార్థించేందుకు భక్తులు తరలివచ్చారు. కోటను రంగురంగుల అలంకరణలతో అలంకరించి, సంప్రదాయ సంగీత, నృత్య ప్రదర్శనలు ఉత్సవ స్ఫూర్తిని పెంచాయి.

తెలంగాణ ఇన్ఫర్మేషన్ టెక్నాలజీ అసోసియేషన్ (టిటా) కూడా టి-హబ్‌లో బోనాలు నిర్వహించింది. ఈ కార్యక్రమానికి దుబాయ్‌కి చెందిన ప్రముఖ వ్యాపారవేత్త బు అబ్దుల్లా ముఖ్య అతిథిగా హాజరయ్యారు. TITA ప్రెసిడెంట్ సందీప్ కుమార్ మక్తాల మాట్లాడుతూ “అమ్మవారికి 21 బోనాలు సమర్పించారు. పోతరాజులు, కొమ్ము కోయ , గుస్సాడ నృత్యం ప్రదర్శనలు టి-హబ్‌లో పండుగ వాతావరణాన్ని సృష్టించాయి.

ఉజ్జయిని మహంకాళి ఆలయంలో సికింద్రాబాద్ బోనాలు జూలై 21న నిర్వహించనుండగా, హైదరాబాద్‌లోని మిగిలిన ఆలయాల్లో జూలై 28న బోనాలు జరుపుకోనుండగా, పాతబస్తీలోని లాల్ దర్వాజ సింహవాహిని మహంకాళి ఆలయ బోనాలు ప్రధాన ఆకర్షణగా నిలిచాయి.

Read Also : Hussain Sagar : నిండుకుండను తలపిస్తున్న హుస్సేన్‌ సాగర్