Gas Shortage : ఇండక్షన్ స్టవ్స్ వాడుతున్నారా? అయితే మీరు వీటిని గుర్తుపెట్టుకోవాల్సిందే !!

Induction Stove

వంట గ్యాస్ కొరత మరియు సిలిండర్ ధరలు సామాన్యుడికి భారంగా మారుతున్న నేపథ్యంలో, మెజారిటీ ప్రజలు ఇండక్షన్ స్టవ్‌ల (Induction Stoves) వైపు మొగ్గు చూపుతున్నారు. అయితే, సాధారణ గ్యాస్ స్టవ్‌తో పోలిస్తే ఇండక్షన్ స్టవ్ పనిచేసే విధానం పూర్తిగా భిన్నంగా ఉంటుంది. దీనిపై వంట చేసేటప్పుడు ముఖ్యంగా పాత్రల ఎంపిక విషయంలో చాలా జాగ్రత్తగా ఉండాలి. ఇండక్షన్ స్టవ్‌లు విద్యుదయస్కాంత శక్తితో పనిచేస్తాయి కాబట్టి, వీటిపై కేవలం స్టీల్ మరియు ఐరన్ (ఇనుము) పాత్రలను మాత్రమే వాడాలి. రాగి, అల్యూమినియం, గాజు లేదా మట్టి పాత్రలు వీటిపై వేడెక్కవు. పాత్ర అడుగుభాగం సమాంతరంగా (Flat) ఉంటేనే వేడి సమానంగా వ్యాపించి వంట త్వరగా పూర్తవుతుంది.

ఇండక్షన్ స్టవ్ అనేది ఎలక్ట్రానిక్ పరికరం కాబట్టి, దీని నిర్వహణలో నీటి విషయంలో అత్యంత జాగ్రత్తగా ఉండాలి. వంట చేసేటప్పుడు స్టవ్ పైన ఉండే కంట్రోల్ ప్యానెల్‌పై గానీ, స్టవ్ లోపలికి గానీ నీళ్లు వెళ్లకుండా చూసుకోవాలి. నీరు లోపలికి వెళ్తే షార్ట్ సర్క్యూట్ అయ్యే ప్రమాదం ఉంది. అలాగే, ఈ స్టవ్‌లు పనిచేసేటప్పుడు ఉత్పన్నమయ్యే వేడిని తగ్గించడానికి కింద ఒక చిన్న ఫ్యాన్ ఉంటుంది. చాలామంది స్టవ్ కింద పేపర్లు లేదా బట్టలు పరుస్తుంటారు, దీనివల్ల గాలి ఆడక ఫ్యాన్ ఆగిపోయి స్టవ్ కాలిపోయే అవకాశం ఉంది. అందుకే స్టవ్ కింద గాలి ధారాళంగా ఆడేలా వస్తువులేవీ అడ్డు లేకుండా చూసుకోవాలి.

వంట చేసే పద్ధతిలో కూడా కొన్ని మార్పులు చేసుకోవాలని నిపుణులు సూచిస్తున్నారు. స్టవ్ ఆన్ చేసే ముందే దానిపై పాత్రను ఉంచడం మంచి అలవాటు. పాత్ర లేకుండా ఖాళీగా స్టవ్‌ను ఆన్ చేయడం వల్ల సెన్సార్లు దెబ్బతినే అవకాశం ఉంది. వంట రకాన్ని బట్టి అంటే పాలు వేడి చేయడం, కూరలు వండడం లేదా డీప్ ఫ్రై వంటి వాటికి తగినట్లుగా హీట్ (Temperature) సెట్టింగ్స్ మార్చుకోవాలి. వంట పూర్తయిన వెంటనే ప్లగ్ తీసేయకుండా, లోపల ఫ్యాన్ ఆగిపోయే వరకు వేచి చూడాలి. ఈ చిన్న చిన్న జాగ్రత్తలు పాటించడం వల్ల ఇండక్షన్ స్టవ్ ఎక్కువ కాలం మన్నిక రావడమే కాకుండా, విద్యుత్ ఆదా అయ్యి ప్రమాదాలు కూడా దరిచేరవు.

Follow us