LPG Charges: గ్యాస్ చార్జీల విషయంలో సామాన్యులకు మోదీ సర్కార్ గుడ్ న్యూస్

Modi Good News

ప్రస్తుత రోజుల్లో హోటళ్లు లేదా రెస్టారెంట్లకు వెళ్లినప్పుడు మెనూలో ఉన్న ధర కంటే బిల్లులో ఎక్కువ మొత్తం ఉండటం సామాన్యులకు గుదిబండగా మారింది. ముఖ్యంగా ఎల్‌పీజీ (LPG) ధరలు పెరిగాయనే నెపంతో కొన్ని హోటల్ యాజమాన్యాలు బిల్లులో ‘గ్యాస్ ఛార్జీలు’ లేదా ‘ఫ్యూయల్ సర్ఛార్జ్’ వంటి పేర్లతో అదనపు వసూళ్లకు పాల్పడుతున్నాయి. దీనివల్ల రూ. 10 ఉండాల్సిన టీ ధర రూ. 15కు, టిఫిన్ ధరలు కూడా భారీగా పెరిగి సామాన్యుడి జేబుకు చిల్లు పడుతోంది. ఈ అక్రమ వసూళ్లపై దేశవ్యాప్తంగా ఫిర్యాదులు వెల్లువెత్తడంతో కేంద్ర వినియోగదారుల రక్షణ ప్రాధికార సంస్థ (CCPA) రంగంలోకి దిగి, ఇలాంటి అదనపు రుసుములు వసూలు చేయడం పూర్తిగా చట్టవిరుద్ధమని స్పష్టమైన ఆదేశాలు జారీ చేసింది.

వ్యాపార నిర్వహణలో భాగంగా అయ్యే గ్యాస్, విద్యుత్ లేదా ఇతర ఇంధన ఖర్చులను హోటల్ యాజమాన్యాలే భరించాలని, వాటిని ముందే లెక్కించి మెనూ కార్డులోని ధరలను నిర్ణయించాలని ప్రభుత్వం వివరించింది. గతంలో ‘సర్వీస్ ఛార్జ్’ వసూలు చేయకూడదని నిబంధనలు తెచ్చినప్పటికీ, వాటిని తప్పించుకోవడానికి హోటళ్లు ఇప్పుడు కొత్తగా ఈ ఇంధన సర్ఛార్జీలను తెరపైకి తెచ్చాయి. వినియోగదారుల రక్షణ చట్టం 2019 ప్రకారం, కస్టమర్ అనుమతి లేకుండా బిల్లులో ఆటోమేటిక్‌గా కలిపే ఏ అదనపు రుసుము అయినా ‘అక్రమ వ్యాపార విధానం’ కిందకు వస్తుంది. మెనూలో ఉన్న ధరపై కేవలం ప్రభుత్వం నిర్ణయించిన జీఎస్టీ (GST) మాత్రమే వసూలు చేయాలని, అంతకు మించి ఒక్క రూపాయి కూడా అదనంగా అడిగే హక్కు హోటళ్లకు లేదని కేంద్రం తేల్చి చెప్పింది.

ఒకవేళ మీరు వెళ్లిన హోటల్‌లో బిల్లు పైన ఇటువంటి అక్రమ ఛార్జీలు వేస్తే, వెంటనే వాటిని తొలగించమని డిమాండ్ చేసే హక్కు మీకు ఉంది. హోటల్ యాజమాన్యం స్పందించకపోతే, వినియోగదారులు 1915 అనే నేషనల్ కన్స్యూమర్ హెల్ప్‌లైన్ నంబర్‌కు ఫోన్ చేసి ఫిర్యాదు చేయవచ్చు లేదా ‘e-Jagriti’ పోర్టల్ ద్వారా ఆన్‌లైన్‌లో కంప్లైంట్ ఇవ్వవచ్చు. నిబంధనలు ఉల్లంఘించే హోటళ్లకు భారీ జరిమానాలు విధించడమే కాకుండా, వారి లైసెన్సులు రద్దు చేసే అధికారం కూడా ప్రభుత్వానికి ఉంది. కాబట్టి వినియోగదారులు చైతన్యవంతులై బిల్లును క్షుణ్ణంగా పరిశీలించాలని, అక్రమ వసూళ్లపై గళం విప్పాలని ప్రభుత్వం సూచిస్తోంది.

Follow us