Canara Bank : ఏం తినాలో అధికారులే నిర్ణయిస్తారా?.. కోచ్చిలో కొత్త వివాదం

Canara Bank

Canara Bank : కేరళలోని కోచ్చిలో కెనరా బ్యాంక్ ఒక శాఖలో బీఫ్ వడ్డింపుపై కొత్త వివాదం తలెత్తింది. బ్యాంక్ క్యాంటీన్‌లో బీఫ్ వడ్డించకూడదని మేనేజర్ ఇచ్చిన మౌఖిక ఆదేశాలకు నిరసనగా ఉద్యోగులు ప్రత్యేకమైన పద్ధతిలో తమ ఆగ్రహాన్ని వ్యక్తం చేశారు. క్యాంటీన్‌లో అందరికీ బీఫ్ వడ్డించడం ద్వారా వారు తమ అసమ్మతిని వినూత్నంగా తెలియజేశారు. ఈ ఘటన స్థానికంగా పెద్ద చర్చనీయాంశమైంది. ఇటీవల బీహార్‌కు చెందిన ఒక అధికారి కెనరా బ్యాంక్ కోచ్చి రీజినల్ మేనేజర్‌గా బాధ్యతలు చేపట్టారు. ఆయన, క్యాంటీన్‌లో ఇకపై బీఫ్ వడ్డించరాదని సిబ్బందికి ఆదేశాలు ఇచ్చినట్లు ఆరోపణలు ఉన్నాయి. ఇదే సమయంలో సదరు మేనేజర్ తన సిబ్బందిపై మానసిక ఒత్తిడి తేవడమే కాక, అవమానకరంగా ప్రవర్తిస్తున్నాడని కూడా ఆరోపణలు వినిపిస్తున్నాయి. ఈ నేపథ్యంలో బ్యాంక్ ఎంప్లాయీస్ ఫెడరేషన్ ఆఫ్ ఇండియా (BEFI) ఉద్యోగుల తరపున నిరసన చేపట్టాలని నిర్ణయించగా, అదే సమయంలో బీఫ్ నిషేధం అంశం బయటకు రావడంతో నిరసన దిశ ఆ వైపు మళ్లింది.

Double Decker Bus : విశాఖలో డబుల్ డెక్కర్ బస్సులు ప్రారంభించిన చంద్రబాబు

ఈ ఘటనపై ఫెడరేషన్ నాయకుడు ఎస్‌.ఎస్‌. అనిల్ స్పందిస్తూ, “ఇక్కడ ఒక చిన్న క్యాంటీన్ ఉంది. ప్రత్యేకమైన రోజులలో బీఫ్ వడ్డించటం సంప్రదాయం. కానీ మేనేజర్ ఇకపై బీఫ్ వడ్డించరాదని చెప్పడం పూర్తిగా తప్పు. బ్యాంక్ రాజ్యాంగ స్ఫూర్తితో నడుస్తుంది. ఆహారం అనేది వ్యక్తిగత ఎంపిక. ఎవరికైనా నచ్చిన ఆహారం వారు తినే హక్కు ఉంది. మేమెవరికీ బలవంతంగా బీఫ్ తినమని చెప్పడం లేదు. ఇది కేవలం మా నిరసన వ్యక్తీకరణ” అని స్పష్టం చేశారు.

ఈ నిరసనకు రాజకీయ మద్దతు కూడా లభించింది. వామపక్ష మద్దతు ఉన్న స్వతంత్ర ఎమ్మెల్యే కేటీ జలీల్ ఘాటుగా స్పందించారు. “ఏం తినాలో, ఏం ధరించాలో పై అధికారులు నిర్ణయించే హక్కు లేదు. కేరళలో ఎలాంటి సంఘ్ పరివార్ ఎజెండాలను అనుమతించబోము. ఈ నేల ఎర్రనిది, ఇక్కడ ఫాసిస్టు ఆజెండాలు ఎప్పటికీ సాగవు. ఎర్రజెండా ఎగిరే చోట నిర్భయంగా స్వేచ్ఛ కోసం మాట్లాడగలము” అని ఆయన తన ఫేస్‌బుక్ పోస్ట్‌లో పేర్కొన్నారు. గతంలో కూడా ఇలాంటి సంఘటనలు కేరళలో చోటుచేసుకున్నాయి. ముఖ్యంగా 2017లో పశువుల అమ్మకాలపై కేంద్రం తీసుకొచ్చిన నిబంధనలకు వ్యతిరేకంగా రాష్ట్రంలో పెద్ద ఎత్తున బీఫ్ విందులు నిర్వహించి నిరసన తెలిపిన విషయం గుర్తుచేసుకోవచ్చు. తాజా కోచ్చి ఘటన ఆ జ్ఞాపకాలను మరోసారి రేకెత్తించింది.

TG Assembly Session : రేపటి నుంచి అసెంబ్లీ.. కేసీఆర్ వస్తారా?

Follow us