Nani’s Movie:నాని ‘దసరా’ మూవీ రిలీజ్ డేట్ ఖరారు!

టాలీవుడ్ లో ఎప్పటికప్పుడు ప్రేక్షకులకు కొత్తగా కనిపించడానికి ట్రై చేసే హీరోల్లో నాని ముందువరుసలో ఉంటాడు. ఆయన తాజా చిత్రంగా ‘దసరా’ రూపొందుతున్న సంగతి తెలిసిందే. సింగరేణి బొగ్గు గనుల నేపథ్యంలో రూపొందుతున్న ఈ సినిమాలో నాని ఊరమాస్ లుక్ తో కనిపించనున్నాడు. ఆయన ఈ స్థాయి లుక్ తో కనిపించనుండటం ఇదే మొదటిసారి.

ఇప్పటికే ఈ సినిమా చాలా వరకూ చిత్రీకరణ జరుపుకుంది. తాజాగా ఈ సినిమా రిలీజ్ డేట్ ను ప్రకటించారు. వచ్చే ఏడాది మార్చి 30వ తేదీన ఈ సినిమాను రిలీజ్ చేస్తున్నట్టు చెబుతూ, అందుకు సంబంధించిన అధికారిక పోస్టర్ ను వదిలారు. సిల్క్ స్మిత బ్లాక్ అండ్ వైట్ పోస్టర్ ఉన్న గోడకి ఆనుకుని అరుగుపై కూర్చున్న నాని కనిపిస్తున్నాడు.

ఈ పోస్టర్ చూస్తుంటే కథ ఏ కాలంలో జరుగుతుందనేది ఆసక్తికరంగా మారింది. ఈ సినిమాలో నాని సరసన నాయికగా కీర్తి సురేశ్ అలరించనుంది. ‘నేను లోకల్’ తరువాత ఈ ఇద్దరి కాంబినేషన్లో రూపొందుతున్న సినిమా ఇది. సుధాకర్ చెరుకూరి నిర్మిస్తున్న ఈ సినిమాకి , సంతోష్ నారాయణ్ సంగీతాన్ని సమకూర్చుతున్నాడు.